April—Umweshi wa ‘Kubombesha no Kupilikita’

¹ Imilungu ya mu nshiku sha Cibukisho ni nshita ya kwetetula ku bantu ba kwa Yehova. Betetula pa co imfwa ya kwa Kristu yaacita na pe subilo lyapeelwa na Lesa ilyalengwa ukubako pa mulandu wa mulopa wasuumiwe uwa kwa Yesu. Ilyo mwatontonkanya pa fyo cali pa April 19 umwaka wapwile, cinshi mwibukisha? Bushe kuti mwaibukisha abantu mwamwene cilya cungulo bushiku? bushe mwaibukisha bumupashi ubusuma nga nshi ubwa pa Cibukisho? bushe mwaibukisha ilyashi ilisuma ilyalandilwe na mapepo yapepelwe aya kufuma ku mutima? Nalimo mwatontonkenye ukuti mufwile ukutasha nga nshi pa kutemwa uko Yehova na Yesu bamutemwa. Bushe ukwetetula pa fya musango yo kuti kwalenga mwacita cinshi?

² Tatuletwishika no kutwishika ukuti abantu ba kwa Yehova balatasha, te kutasha fye kwa pa kanwa iyo. (Kol. 3:15, 17) Na kucilisha, mu April umwaka wapwile, twalicitilepo cimo ku kulanga ukutasha kwesu pa kupekanya kwa kwa Yehova ukwe pusukilo pantu twalibombeshe mu butumikishi bwa Bwina Kristu. Bapainiya ba kwafwilisha bali abengi nga nshi, amapesenti 40 ukucila pa mpendwa yakulisha iyabalile aibako muno Zambia. Ukubombesha kwabo, pamo na bakasabankanya bambi aba Bufumu, kwalengele kwaba impendwa shipya ishakulisha isha maawala, bamagazini bashalikwe, ne fipempu. Twalisekelele nga nshi pantu twatendeke amasambililo ya Baibolo ayapya ayengi sana ne cipendo icipya ica basangilwe ku Cibukisho!

³ Cine cine, ukwishiba ukuti isubilo lyesu lya cine cine kutucincisha ukuswangaana. Tucita fye nge fyo umutumwa Paulo alandile ati: “[Tubombesha, NW] no kupilikitila ici cine, ica kuti twacetekela kuli Lesa wa mweo, uuli Mupusushi wa bantu bonse, ukucishako wa batetekela.”—1 Tim. 4:10.

⁴ Bushe uno mwaka mu nshiku sha pa ntanshi na pa numa ya Cibukisho, mukalanga shani icitetekelo cenu mu kupekanya kwa kwa Yehova ukwa kuti abantu bakakwate umweo? Mu April umwaka wapwile, impendwa ya bakabilisha ba Bufumu yacilile pa mpendwa yonse iyabalile aibako kale muno Zambia. Bushe mu April uno mwaka kuti twacilapo na pali ilya mpendwa? Amaka ya kucilapo yena natukwata. Lelo kano fye kasabankanya onse, uwabatishiwa no ushabatishiwa, akabombeko umulimo. Abapya abengi na bo bene kuti babombesha. Kanshi ilyo mulepekanya ukubombesha no kupilikita mu April uno mwaka, tontonkanyeni pa fyo mwingacita ku kucincishako na bambi, ifili nga abapya na balya abashilabelesha, ukuti babombele pamo na imwe.

⁵ Ukwafwa Bamo Ukuti na Kabili Batendeke Ukubomba: Nga namwishibako bamo abashashimikile umweshi umo nelyo ibili iyapita, napamo kuti mwabakoselesha no kubalaalika ukuti babombe na imwe mu butumikishi bwa mwi bala. Nga ca kuti bamo mu cilonganino balileka ukushimikila, baeluda bakabombesha na maka yonse ukutandalila ababa ifyo no kubakoselesha ukutendeka na kabili ukushimikila mu April.

⁶ Bonse tufwile ukutwalilila ukulomba umupashi wa kwa Yehova ukuti uletukosha mu mulimo wakwe. (Luka 11:13) Cinshi tufwile ukucita pa kuti tupokelele uyo mupashi? Kubelenga Icebo ca kwa Lesa icapuutwamo. (2 Tim. 3:16, 17) Tufwile no ‘kumfwa ico umupashi ulesosa ku nkuta’ pa kusangwa lyonse ku kulongana konse kusano ukubako cila mulungu. (Ukus. 3:6) Nomba e nshita twingashukila ku kwafwa bamanshintula na baleka ukushimikila ukuti bacincileko ukusambilila ifya ku mupashi no kutendeka ukusangwa lyonse ku kulongana. (Amalu. 50:23) Ilyo tulecite co, natulepempwila na kuli bumupashi bwesu bwine. Nalyo line, kuli na fimbi ifilekabilwa.

⁷ Umutumwa Petro atile Lesa apeela umupashi wakwe uwa mushilo ku “bamunakila” nga kateka. (Imil. 5:32) Ukunakila kwa musango yo kusanshamo no kumfwila ifyo atweba ukuti ‘tubile ku bantu, no kushimikisha.’ (Imil. 1:8; 10:42) E co, nangu ca kuti tulakabila umupashi wa kwa Lesa ukutukosha pa kushimikila, tufwile no kwishiba ukuti ilyo tulanga ukufwaisha kwesu ukwa kusekesha Yehova, e lyo na o wine atwafwa na sana. Shi kanshi twicefya ubucindami bwa kuitemenwa ukuba ne cumfwila mu fya kubalilapo ifyo twebwa ukuti tucite!

⁸ Afweni Abacaice: Mwe bafyashi, bushe mwalimona ukuti abana benu balafwaya ukulanda pa lwa cine ca Bufumu kuli bambi? Bushe mulaya na bo mu mulimo wa mwi bala? Bushe baba ne mibele isuma? Nga e fyo baba, bushe ninshi pali ne fya kulolela? Moneni eluda wa muli Komiti wa Mulimo uwa Cilonganino, pa kuti kube ukumona nga umwana wenu kuti apendwa ukuti ni kasabankanya mu April. (Moneni icitabo ca Abateyanishiwa, amabula 99 na 100.) Ishibeni ukuti abana benu na bo bene kuti balenga kwaba ukupunda kwa maka ukwa kulumbanya Yehova mu nshiku sha pa ntanshi na pa numa ya Cibukisho.—Mat. 21:15, 16.

⁹ Namayo umo Umwina Kristu ku Luanshya, lyonse alabomba ubutumikishi pamo no mwana wakwe umwaume. Umwaka wapwile mu April, ilyo uyu mwana mwaume aali mu butumikishi na banyina, atambike broshuwa wa Cintu Lesa Afwaya ku mwanakashi. Atendeke ubunte ukwipusha uyu mwanakashi nga ca kuti bumpulamafunde mu bwikashi bulengwa pa mulandu wa kufilwa kwa bafyashi ukusambilisha abana babo. Umwanakashi ayaswike ati: “Ee, ni fyo fine.” Umwanakashi alipapile ukumfwe cipusho ca musango yo kuli kalume wa myaka fye 7. Lyena kalume abulile broshuwa wa Cintu Lesa Afwaya no kukupukula pe Sambililo 8 paragrafu 5 kabili aipwishe umwanakashi ukubelengapo. Umwanakashi taumfwikishe amashiwi yonse ayali muli uyu broshuwa. Ilyo aipwishe ubupilibulo bwe shiwi limo ilisangwamo, aenekele nyina kwa mwana ukucilima no kulondolola. Alipapile ukuti uyu kalume alilondolwele umo ishiwi lyalolele. Ico calengele uyu mwanakashi ukufwaya ukwishibilapo na fimbi ukupitila mwi sambililo lya Baibolo kabili afwaishe ukuti uyu wine kalume eo alesambilila nankwe. Na kuba, uyu mwanakashi aba mu calici lya UCZ kabili akwata na bana bane. Apeelwa icifulo ca bu dikone mu calici. Alisumine ukuti mu calici lyabo tabakansha abana ukulasambilishako bambi. Uyu kalume pali nomba alatungulula amasambililo ya Baibolo aya mu ng’anda yasano.

¹⁰ Abaice abengi kale kale ni bakasabankanya kabili tulatemwa ukubomba na bo mu mulimo. Abaice ba ifyo kuti bacincisha no kukoselesha bambi abo balingene na bo. Lelo April mweshi usuma na ku lupwa lumo na lumo ukukosha ukutemwana kwabo no kukuula bumupashi ukupitila mu kubombela pamo umulimo washila. Imitwe ya ndupwa ifwile ukuba pa ntanshi muli uyu mulimo.—Amapi. 24:27.

¹¹ Afweni Abapya: Ni shani pa lwa bapya abo musambilila na bo Baibolo? Bushe na bo kuti babombako umulimo waibela mu April uno mwaka? Nalimo ilyo mwalesambilila icipandwa 2, paragrafu 22 nelyo icipandwa 11, paragrafu 14, mu citabo ca Ukwishiba balangile ukuti balefwaya ukwebako bambi ifyo balesambilila. Nga namupalama ku kupwa icitabo, pekanyeni ukulandapo pali uyu mulandu ukwabula ukupita mu mbali ilyo mukasambilila icipandwa 18, paragrafu 8, umwaba amashiwi yatila: “Napamo ulefwaisha ukwebako balupwa, ifibusa, na bantu bambi pa lwa fintu ulesambilila. Napamo kale kale ulabashimikilako, nga fintu fye Yesu ashimikile imbila nsuma ku bantu bambi mu kulanda fye lyashi. (Luka 10:38, 39; Yoh. 4:6-15) Nomba kuti pambi ulefwaya ukucita ifyafulilako.” Bushe ifi e fyo cili kuli bamo abo musambilila na bo?

¹² Bushe umusambi wenu alisumina mu Cebo ca kwa Lesa? Bushe alacita ifintu umwabela ifishinte fya mu Baibolo? Bushe alyalula imikalile yakwe ukufika pa fipimo fya bulesa? Bushe alasangwa ku kulongana? Bushe alefwaya ukubombela Yehova Lesa? Nga e fyo cili, ninshi tapali ifya kulolela, mukoselesheni ukuti alande na baeluda pa kuti bamone nga nafikapo ukuba kasabankanya uushabatishiwa pa kuti akabombe pamo na imwe mu April. (Moneni icitabo ca Abateyanishiwa, amabula 97 ukufika ku 99.) Nga acite co, akatendeka ukuimwena ifyo ukuteyanya kwa kwa Yehova kukamutungilila ilyo alefwaya ukubombesha mu mulimo wa kubombela Yehova.

¹³ Ca cine, abasambi bamo balalunduluka bwangu ukucila bambi. E co, ukulingana ne fyalandile Ubutumikishi Bwesu Ubwa Bufumu ubwa June 2000, ibula 4, amaparagrafu 5 na 6, bamo balitendeka ukusambilila icitabo ca bubili na bantu abo pa kubala abatemenwe ukusambilila lelo abalekabila ukwafwa kwalundwako pa kuba abakosa mu kubishanya ne cilonganino. Tatutendeka ukumona abantu ba bufumacumi aba musango yo ukuti tabakatale ababa abasambi bene bene aba kwa Kristu, “nangu ni mu nshita inono nangu ni mu ikalamba.” (Imil. 26:29) Nalyo line, nga ca kuti inshita mwasambilila na bantu ba musango yo kuti mwatila ca cine “ikalamba,” bushe inshiku sha pa ntanshi na pa numa ya Cibukisho ca uno mwaka kuti lyaba e shuko lisuma ilya kuti umusambi wenu alange ukuti alatasha nga nshi icilubula ca kwa Kristu?

¹⁴ Ifya Kubafwa Ukuti Babombe: Nga twabebeta ifyo Yesu asambilishe abasambi bakwe, kuti twasambililako sana ifyo twingacita pa kwafwa abalefikapo ukuti batendeke ukufumina mu butumikishi. Tasangile fye ibumba lya bantu no kweba abatumwa bakwe ati aleni akulandeni. Atalile akomailapo kuli bene ukuti umulimo wa kushimikila walekabila ukubombwa, abakoseleshe no kupepa pa kubomba. Lyene abapeele ifintu fitatu ifyacindamisha: uwa kubomba na o, icifulo ca kubombelamo, no bukombe. (Mat. 9:35-38; 10:5-7; Marko 6:7; Luka 9:2, 6) Kuti mwacita cimo cine na imwe. Nampo nga mwakulayafwa umwana wenu, umusambi mupya, nelyo uushafumina mu mulimo wa mwi bala pa nshita imo, kuti cawama ukubombesha na maka yenu yonse ukucita ifi twalalanda muno.

¹⁵ Komaileni pa Kutila Umulimo Ulekabila Ukubombwa: Mulondolweleni bwino ukuti umulimo wa kushimikila walicindama. Imwe bene monekeni ukuti mwalitemwa umulimo. Mushimikileni ifyo icilonganino cilebomba mu butumikishi. Langeni umupashi Yesu alandile pali Mateo 9:36-38. Koselesheni uwaleka ukushimikila nelyo uwingafikapo ukuba kasabankanya ukulapepa ukuti akatendeke ukushimikila kabili mukoselesheni alepepelako uyu mulimo wa mwi sonde lyonse ukuti uleenda bwino.

¹⁶ Mukoselesheni Ukutontonkanya pa Mashuko Ayengi Aya Kushimikila: Mukoselesheni ukusangwa ku kukumana kwa pe sambililo lya citabo pa kuya mu bunte bwa ku ng’anda ne ng’anda. Mulondolweleni pa lwa kulanda na balupwa lwakwe na bantu aishibana nabo, abo abomba nabo nelyo abo asambilila nabo, ukulanda na bo pa nshita ya kutuusha. Ilyo umuntu ali muli motoka wa cintubwingi pa bulendo, kuti ashimikila ku bantu ali na bo muli motoka, kulila fye aitendekelako ukulanda na bo. Nga twabalilapo ukulanda no muntu, ilingi line kuti twashimikila bwino kuli wene. Cine cine kwaba fye inshita ishingi ilyo twingalanda pa lwe subilo lyesu ku bantu bambi “akasuba na kasuba.”—Amalu. 96:2, 3.

¹⁷ Lelo kwena, kuti cawama bwangu bwangu imwe bene mwabombela pamo na kasabankanya umupya mu mulimo wa ku ng’anda ne ng’anda. Nga mwaimika ubuyo bwa kubombesha mu butumikishi mu April, ipusheni umubomfi wa cifulo ca kubombelamo ukumweba nga icifulo ca kubombelamo e ko cili. Nga e ko cili, ninshi mukapwisha bwino bwino ukubomba ubutumikishi muli ico cifulo. Ku ca kumwenako, ilyo mwainuka mu mulimo nelyo lintu muleya ku kulongana nelyo muleya kumbi, nalimo kuti mwamona abantu pa ng’anda apashali muntu ubushiku mwatandelepo nelyo kuti mwapita mupepi na po mwasangile abalefwaya ukusambilila icine. Nga kuti caba fye bwino, pitenipo ilyo line pantu ninshi napamo kuti mwatunguluka. Ico kuti calenga mwalayumfwa bwino ukuti mulebombako umulimo kabili mukacilapo ukusekelela mu butumikishi.

¹⁸ Pekanyeni Ubukombe Ubuleumfwika Bwino: Umuntu kwena kuti afwaya ukushimikila ubukombe bwa Bufumu, lelo apaba kantu ni pa kuicetekela ukuti kuti alanda bwino na bantu, maka maka nga mupya nelyo nga alitalile aleka ukushimikila pa nshita ntali. Ukwafwa abapya na baleka ukushimikila ukuti bapekanye ifya kushimikila e kubomfya bwino inshita yesu. Ukulongana kwa Mulimo no kukumana kwa mu mulimo wa mwi bala kulasambilisha ifya kulanda bwino, lelo takwaba icingacila pa cishinka ca kuti umuntu umwine afwile ukupekanya.

¹⁹ Kuti mwayafwa shani abapya ukupekanya umulimo wa mwi bala? Balilenipo ukubalanga ifya kutambika magazini, kabili citeni fye akayanguka! Bebeni ukwibukishako fye ilyashi lyacitike ilyo napamo lisakamike aba mu cifulo ca kubombelamo, lyene basange icishinka cipalileko muli magazini wa nomba line. Pitenimo capamo na bo mu fya kuyalanda, kabili bwangu bwangu bomfyeni ifyo mu butumikishi.

²⁰ Natubombele pa Maka Twakwata aya Kufulilako: Umwaka wapwile, abasangilwe ku Cibukisho mwi sonde lyonse bacilile pa mamilioni 14.8. Abatumine amalipoti ya bukasabankanya bali fye ukucila pa mamilioni 6. E kutila abantu nalimo amamilioni 8.8 balefwaya ukumfwako icine ica kuti basangilwe kuli kulya kusefya kwaibela uko baumfwile icisambilisho cimo icikalamba ica mu Baibolo ilyo calondolwelwe. Bamo pali ifwe twalishibene na bo, kabili bafwile balyumfwile bwino. Abengi balatulandilako bwino, balapeelako ubupe ku mulimo wa mwi sonde lyonse kabili balatusoselako ilyo baumfwa abantu baletulengulula. Ili bumba likalamba lilelanga ukuti natukwata amaka ya kufula ku ntanshi uku tuleya. Cinshi twingacita ku kubafwa ukuti balunduluke?

²¹ Abengi abesa ku Cibukisho kulaba umo pali ifwe uwabalaalike. E kutila ilingi line kanshi ilyo umuntu esa ninshi kale kale naishibako nangu fye Nte umo. Nga umo aisa pa kuti kwali uwamulaalike, mulimo wesu uwa kumupokelela bwino no kumwafwa ukuti amwenemo sana muli programu. Apo kukaba abantu abengi sana, mwafweni ukusanga apa kwikala. Mwashimeniko Baibolo wenu, kabili mwebeni apalame pa kuti alemonako mu lwimbo lwenu. Asukeni ifipusho fyonse ifyo engepusha. Ukuba aba bucibusa no kwangwa sana kuli wene kuti fyalenga alundulula ukufwaisha kwakwe. Lelo kwena, uyu waba mulimo wesu bonse, nga twamona umuntu umo uo tushaishiba, tufwile ukumuposha bwino sana no kulanshanyako nankwe pa kuti twishibane.

²² Ukusangwa ku Cibukisho kuti kwalenga umuntu atontonkanya sana pa co engacita pa fyo omfwile. Icishinka ca kuti naisa ku Cibukisho nalimo kuti calanga ukuti alifilwa ukusanga ico afwayafwaya kabili alemona ukuti ifwe nalimo twalikwata cimo ico engatemwa ukubebeta bwino bwino. Ukulondolola ubusuma bwa cilubula nalimo kuti kwaba cintu cimo icacindama icingasokololwa ku muntu uushaishiba ukuti ukutemwa kwa kwa Yehova kwafika apatali. Kuti amona ukuti twaliibela, tuli ba cishinka, aba bucibusa, aba kutemwa kabili aba mucinshi. Umo tulelonganina tamupalanako nelyo fye panono ku fyo nalimo abantu bamona mu macalici umuba ifilubi kabili umo bakonka ifishilano fyabula no kwishiba umo fyalola. Abapya bwangu bwangu balamona ukuti mwi bumba lyesu muli abantu ba njikalo shalekanalekana kabili takuba ukulombelesha indalama. Ilyo bamona ifi fyonse, kuti fyaba fintu fya maka ifingabacincisha ukubwela.

²³ Ilyo Icibukisho capita, kasabankanya onse afwile ukupoosesha amano ku kutandalila abasangilweko no kubafwa. Kumfwa nga mwalilaalike bamo, ninshi muli no mulimo waibela. Ilyo bashilaya, shininkisheni ukuti mwabalondolwela pa lwa kulongana kumbi ukubako pa Ng’anda ya Bufumu. Bebeni umutwe wa lyashi lya ku cintubwingi ilikabako. Bebeni inshita no bushiku bwe Sambililo lya Citabo pa Cilonganino ilyapalama ku ng’anda ku mwabo. Inshita imbi, batwalileni icitabo ca Insansa sha Lupwa, kabili bebeni no kuti umulungu wa April 30 tukasambilila icipandwa icileti: “Cingilileni Ulupwa Lwenu ku fya Kusonga Ifyonaula.” Londololeni ukuti cila mwaka kulaba amabungano ya citungu ukusangwa abantu abengi sana ku kukuulililwa lwa ku mupashi.

²⁴ Pekanyeni ukuti mukabatandalile ku ng’anda ku mwabo. Mwilaba ukusenda broshuwa wa Cintu Lesa Afwaya ne citabo ca Ukwishiba, pantu muli ifi e mo bakasambilila ifisambilisho fyacindama ifya mu Baibolo. Nga tabalatendeka ukusambilila, bebeni ukuti mulefwaya ukulasambilila na bo Baibolo. Balondolweleni no kutila kuti babelenga na broshuwa wa Inte sha kwa Yehova—Ni Bani? Finshi Basuminamo?, bwino sana ifyo ukuteyanya kwesu kubomba. Abakwata ifya kutambilamo vidio kuti babalaalika na ku kutamba amatepu, pamo nge ya Our Whole Association of Brothers. Tantikeni ukubatwalako na kuli bamunyina bambi mu cilonganino. Mu myeshi ileisa, monaneni na bapya; balaalikeni ukusangwa ku kulongana ilyo kangalila wa muputule akatandalila icilonganino nelyo lintu kukaba ukulongana kwa muputule nelyo ubushiku bwa kulongana kwaibela. Bacitileni ifingi pa kuti babe ne shuko lya kuilanga ukuti bantu ‘basontelwa ku kuya mu mweo wa muyayaya’!—Imil. 13:48.

²⁵ Ico Baeluda Bengacita: Pa kuti ukubombesha kwaibela uko tulelandapo kukabeko mu April, cishintilile sana sana pali baeluda. Nga mulatungulula isambililo lya citabo, tantikeni umutande wa fyo mufwile ukucita pa kuti onse uwaba mwi bumba lyenu akabombeko muli iyi nshita yaibela. Bushe mwi bumba lyenu mwaliba abaice, abapya, bamanshintula, nelyo abaleka ukushimikila? Fwailisheni mwishibe nga ca kuti abafyashi, bapainiya nelyo bakasabankanya bambi balyesha ukwafwa aba musango yo. Na imwe bene bafweni ukufika apengapela amaka yenu. Nkashi umo uwali manshintula mu mulimo wa mwi bala pa myaka ibili, abombele amaawala ukucila pali 50 mu April umwaka wapwile. Cinshi calengele ukuti abombe fyo? Atile mulandu wa fipempu fya bucemi ifya kukuulilila ifya baeluda.

²⁶ Baeluda na babomfi batumikila bafwile ukubombela pamo ku kushininkisha ukuti kuli icifulo ca kubombelamo icalinga, bamagazini ne fitabo ifya kubomfya mu April. Bushe kuti mwatantikako inshiku na shimbi isha kufumina mwi bala? Nga mwatantika, bilisheni ku cilonganino. Ne cacindamisha, mu mapepo ya pa lwenu na ya pa cintubwingi, lombeni kuli Yehova ukuti apaale umulimo wesu mu mweshi wa kubombesha kwaibela ukwa mulimo wa Bufumu.—Rom. 15:30, 31; 2 Tes. 3:1.

²⁷ Mu April umwaka wapwile, mu cilonganino cimo ku Luanshya, baeluda bakoseleshe sana abengi ukuti babombeshe mu butumikishi. Bakasabankanya bacinkwilweko ukuti batontonkanyepo no kupepela ukulembeshako bupainiya bwa kwafwilisha. Lyonse baeluda na babomfi batumikila balelandapo sana ukuti mu April tufwile ukubomba ifyo tushabala atubomba kale. Icafuminemo ca kuti, amapesenti 46 pali bakasabankanya bonse kumo na baeluda bonse na babomfi batumikila elyo na bena mwabo balibombeleko bupainiya bwa kwafwilisha mu April! Baeluda batatu no mubomfi utumikila umo bali kale kale ni bapainiya wa nshita yonse.

²⁸ Ukusekelela Kufuma mu Kubomba na Maka Yonse: Mapaalo nshi yaba mu ‘kubombesha no kupilikita’ mu butumikishi? (1 Tim. 4:10) Ukulanda pa fyo icilonganino cabo cabombeshe mu April umwaka wapwile, balya baeluda tulumbwile mu kubangilila balembele abati: “Bamunyina na bankashi ilingi line balelanda ukuti nabatemwana sana no kwishibana bwino pa mulandu wa kubombela pamo mu butumikishi.”

²⁹ Munyina wacaice umo uwalemana na o wine alefwaisha ukubombesha mu April umwaka wapwile. Ukupitila mu kutantika bwino ifya kucita no kwafwa kwa banyina na bamunyina ne nkashi aba ku mupashi, aipakishe ukubombesha muli ulya mweshi nga painiya wa kwafwilisha. Bushe umwine aumfwile shani pa fyo abombele? Atile: “Ukutula apo nafyalilwa, e lyo nayumfwilepo uwakosa kwati naba fye ifyaba abantu bonse.”

³⁰ Tatutwishika no kutwishika ukuti Yehova alafumfumwina amapaalo pali bonse abakatamika nga nshi ishuko lyabo ilya kulanda pali bumfumu bwakwe. (Amalu. 145:11, 12) Ilyo tuleibukisha imfwa ya kwa Shikulu, tuleshiba ukuti amapaalo yakafuma mu kuipeelesha kuli bukapepa yakafula sana ku ntanshi uku tuleya. Umutumwa Paulo alefulukisha icilambu ca bumi bwa muyayaya. Lelo alishibe no kuti ico te cintu engalolela fye ninshi naikala napeta na makunda. Alembele ati: “E co na co [ndebombesha, NW], ukupilikita umwabelo kubomba kwakwe ukubombela muli ine.” (Kol. 1:29) Yehova, ukupitila muli Yesu Kristu, apeele Paulo amaka ya kubomba bwino sana ubutumikishi bwa kupususha abantu, kabili na ifwe bene kuti Atupeela amaka. Bushe e fyo cikaba kuli imwe mu April uno mwaka?

[Akabokoshi pe bula 3]

Nani Mwingakoseleshako Ukushimikila mu April?

Bushe mwana wenu?

Bushe musambi wa Baibolo?

Bushe ni ulya uwaleka ukushimikila?