Ukusungilila Ukwikatana Kwesu Ukwa Bufumu
1 Ubufumu bwa kwa Lesa ni kamfulumende wa cine cine, uwakwata amaka no bulashi. Ubu bufumu bwali e mutwe wa kushimikila kwa kwa Yesu. (Mat. 4:17) Ukusambilisha bambi no kucitilo bunte ku cine ca Bufumu fyali e lubali lukalamba ulwa butumikishi bwa kwa Yesu. Atusambilishe ukupepela Ubufumu no kutwalilila ukufwaya bwene intanshi. (Mat. 6:9, 10, 33) Ukutwalilila ukuba abapalamisha kuli Yehova no kuteyanya kwakwe, ukufikilisha ukutumwa kwesu ukwa kushimikila, no kuba abapaatukako ukufuma ku calo fitulenga ukusungilila ukwikatana kwesu ukwa Bufumu. Ukupitila mu ncitilo shesu na mashiwi, tulangisha ukuti twaba ku lubali lwa Bufumu.—Yoh. 18:37.
2 Ukutula 1914, Ubufumu bwalisanguka ubwa cine cine ku mamilioni ya batekwa. Ukwikatana ukwalangwa na aba batekwa ba Bufumu kwalipusana nga nshi ne calo cayakanikana. Tufwile ukulenga Ubufumu ukuba ubwa cine cine mu bumi bwesu nga buli no kuba amaka yekatanya. Cinshi cilenga bwene ukuba ubwa cine cine kuli ifwe?
3 Ukupala amakamfulumende yambi, Ubufumu bwalikwata umutande wa mafunde. Lelo, bwalipusanako ni mu kuti amafunde ya buko yasangwa muli Baibolo. Ukubelenga lyonse Icebo ca kwa Lesa kulatucinkulako lyonse ulwa cifwaikwa kuli ifwe nga batekwa ba Bufumu. Isambililo lya pa lwesu ilya mpapulo shesu no butungulushi bwa “musha wa cishinka kabili uwashilimuka” filatwaafwa ukubomfya amafunde ya kwa Lesa mu bumi bwesu ubwa cila bushiku. (Mat. 24:45) Ilyo tulebomfya fyene pa lwesu muli uyo musango, Ubufumu bulacililako kuba ubwa cine cine kuli ifwe, ukutupalamika capamo muli bumunyina bwa mu kusaalala kwa calo, ukutulenga ukuba ulupwa lwaikatana ulwa bakapepa pe samba lya mitekele ya kwa Yesu.
4 Ukwikatana Ukupitila mu Kushimikila pa lwa Bufumu: Ukutumwa kwesu kwa kushimikila imbila nsuma iya Bufumu “ukufika ku mpela ya pano nse.” (Imil. 1:8) Ukushimikila ‘no mutima umo’ kulatwikatanya ilyo tuletukuta ‘ukucindika’ Yehova. (Rom. 15:5, 6) Mu kupimpa ukubombela pamo na bakabomba banensu mu kusaalala kwe sonde kulakosha icitetekelo cesu no kusuminisha umupashi wa kwa Yehova ukubombela muli ifwe ku kupwilikisha ukufwaya kwakwe. “Ukupikintika pe mu mulimo wa kwa Shikulu” kutulenga ukuba “abashangila, abashitelententa.”—1 Kor. 15:58.
5 Mu fyalo ifingi Satana alesha ukupumfyanya ukwikatana kwesu pa kucilima umulimo wesu uwa kushimikila. Alabomfya inshila ishingi isho asanga ku kutanda ifikansa no kuletako ukukanaumfwana, ku kwesha ukuletako ulubuli ne fitaala. (Amapi. 6:19; Gal. 5:19-21, 26) Kuti atemwa ukutumona ukuibimba mu kukansana kwa calo no kwafwilishako fye ulubali lumo mu milandu ya mapolitiki ne ya kwangalila capamo. (Yako. 3:14-16) Amalembo yatukonkomesha ukucincintila ukusonga kwakwe; nga te ifyo, ali no kutulya nge ca kutakanya cakwe. (1 Pet. 5:8, 9) Bucine bwe subilo lya Bufumu tabufwile ukusuminishiwa ukufuutwa mu mitima yesu ne mintontonkanya.
6 Ukusungilila ukwikatana kwesu cifwaya ukutekanya na mano yafuma ku muulu. Lintu amafya yaimako, ukucilisha nga ca kuti yalebimbamo bamunyinefwe, tufwile ukulangisha ifisabo fya mupashi ku kusungilila umutende. Imibele ya ku calo, pamo nga icilumba, ulunkumbwa, ne miiya, filalekanya kabili tufwile ukuficimfya. (Efes. 4:1-3; Kol. 3:5-10, 12-14) Tulekabila ukwisusha imintontonkanya yesu na matontonkanyo ayashininkishiwa, ayakuulilila. Ubufumu bwa cine cine kuli ifwe! Lelo tufwile ukuba abalola pa kubusungilila muli iyo nshila!—Efes. 6:11, 13.
7 Bucine bwe subilo lyesu ilya Bufumu ilyawamisha bulatwikatanya mu mupashi wa buumo ubo bushakatale abupwa.—Ilu. 133:1.