Imyendele ya Bwina Kristu pa Sukulu
1 Nga ca kuti uli musepela wa Bwina Kristu uucili pa sukulu, ulekabila icitetekelo cakosa pa kusungilila bumpomfu bobe. Ulesansalikwa ku ba kubishanya na bo ababipa na ku mibele iingeesha icitetekelo cobe. Cili icacindama ukuti ubomfye ukufunda kwa kwa Petro ‘ukwenda bwino mu Bena fyalo; ukuti, . . . bacindike Lesa mu bushiku bwa cipempu pa kuloleshe milimo yobe isuma.’ (1 Pet. 2:12) Ulekabila ubukose no mupampamina pa kubomba no ku kusonsomba.
2 Pa sukulu nelyo ku nse ye sukulu, washingulukwa ne fya kusonga fikowesha ifya kwampana kwa bwamba ukwa pa ntanshi ya cupo, imilandile ya nsele, fwaka, no kubomfya bubi bubi imiti ikola. Cila bushiku, ulakumanya amatunko ayengabosha ukushimikwa kobe ukwa myendele isuma. Ukupala abakalamba, ufwile ‘ukulwila icitetekelo’ nga ca kuti uli no kushipikisha ifya kwesha fya musango yo.—Yuda 3; mona Ulupungu lwa kwa Kalinda ulwa July 15, 1991, amabula 23-6.
3 Pa sukulu, kwalibako ukusefya kwa kupupa buluko na maholide ya ku calo. Bushe walishiba amaholide ya buluko na ya fya mipepele ayacitwa pa sukulu uyako? Nga ca kuti kwaimako imibele ya kusonsomba, bushe kuti ‘wakwata kampingu musuma, ukuti . . . baseebane abatuke mibele yobe isuma’?—1 Pet. 3:16.
4 Kuti pambi watunkwa ku kubeleleka kwa fyangalo fya ku sukulu nelyo ukubungana kwa kwangalila capamo. Ufwile ukuba uwapempwila ukwishiba inshila intu iyi mibombele imoneka ukuba iya kuipakisha inganashishamo icitetekelo cobe. Ulekabila ukusala ifibusa fyobe abo wingaipakisha ‘ukukoseleshanya’ na bo, bonse ukukoshanya ku citetekelo ca munankwe.—Rom. 1:12, NW.
5 Mu Kuba no Kwaafwa kwa kwa Yehova, Kuti Washipikisha: Satana lyonse aleesha icitetekelo cobe. Ifya kwesha ifyo ufwile ukushipikishako kuti fyaba ifyatapata, lelo ifilambu filenga kwene ukuba ukwawaminwa ukubombesha. (1 Pet. 1:6, 7) Pa lobe fye weka te kuti ushipikishe mu kutunguluka; ufwile ukushintilila pali Yehova ku kwafwiwa. Yesu acincishe abasambi bakwe ukuti: “Loleni no kupepa, ukuti mwiingila mu kweshiwa.” (Mat. 26:41) Ukuisalapula no kuilama fyalikatama.—1 Kor. 9:27.
6 Lyonse ibukisha ukuti uli no kulubulula kuli Yehova pa myendele yobe. (Luk. Mil. 11:9) Nangu cingati cintu ucita te kuti pambi cimonwe kuli bambi, Yehova alishiba cintu ucita kabili akakupingwilapo. (Heb. 4:13) Ukufwaisha kwafumaluka ukwa kumutemuna kulingile ukukusesha ‘ukubombele ipusukilo lyobe no mwenso no kututuma.’ (Fil. 2:12) Ukubelenga Icebo ca kwa Lesa lyonse kulaafwa sana. Caisulamo ukufunda kwawamisha ne fya kumwenako fishaiwamina ifya kupashanya.—Heb. 12:1-3.
7 Mwe bafyashi, mulabomba ulubali lwakatama. Mulekabila ukusopa abana benu, ukwishiba impika balolenkana na sho, no kupayanya ukwaafwa lintu kwakabilwa. Bushe mulomfwana bwino na bana benu? Bushe mwalibafundisha ukutesekesha amafunde ya kwa Lesa ne fishinte? Lintu balolenkana no kutitikisha nelyo amatunko, bushe abana benu baliba abakosa, nelyo bushe balanenuka bwangu? Bushe balafuupulwa pa mulandu wa kuti bafwile ukuba abapusanako ku banabo? Pamo nga bafyashi, mwalikwata icishingamo ca kubaafwa. (Amala. 6:6, 7) Nga ca kuti mwabomba bwino umulimo wenu, kuti mwabaafwa ukucimfya ubulwi bwa citetekelo.—Amapi. 22:6.