“Cindika Yehova ku Fyuma Fyobe”
1 Aya mashiwi yalelondolola ukwafwilisha kwesu umulimo wa kushimikila uwa mu kusaalala kwa calo. (Amapi. 3:9) Pa mbali ya kwakanamo mu kulungatika mu mulimo wa kushimikila no kusambilisha, tulacindika Yehova pa kubomfya mano mano ifikwatwa fyesu ifya ku mubili. Ku ca kumwenako, muli Israele wa pa kale lintu indalama shakabilwe pa tushita twaibela, pamo nga isha kukuulila ica kwikalamo na pa numa itempele, kwalebako ukubilisha kwayanguka kabili abantu baleankulako muli bukapekape nga nshi ica kuti pa nshita shimo balepeela ifya kuti ‘fyashalanapo.’ Mu kulundapo tulacinkulwako pa lwa fyo Yesu na basambi bakwe bakwete icikwama nelyo icipao umo balefumya indalama sha kwafwilamo ababusu no kusakamana ifipooswa fimbi ifyalekabilwa.—Ukufu. 36:5-7.
2 Ilelo, Inte sha kwa Yehova shitwalilila ukukonka ishi nshila sha pa kale isha kubombesha no kupeela muli bukapekape. E ico, icilonganino cimo na cimo calikwata utubokoshi twa misangulo, ilingi line ku numa ya Ŋanda ya Bufumu kabili twalilembwapo mu kumonekesha ukuti Umulimo wa mu Kusaalala kwa Calo uwa Sosaite, Indalama sha Mayanda ya Bufumu ku Sosaite, no kukabila kwa cilonganino cesu. Na kabili calitubululwa ukuti utubokoshi twa misangulo twingapayanishiwa pa fifulo fye sambililo lya citabo ifyalekanalekana. Indalama shipokelelwa pa Ŋanda ya Bufumu ne fi fifulo shibomfiwa ku fipooswa fya Ŋanda ya Bufumu nelyo ukutwala pa ntanshi amabuseko ya Bufumu ukulingana ne fyo icilonganino cingapingulapo. Bushe icilonganino cenu calikwata utubokoshi twa misangulo utwa musango yo uko umo na umo engaya no kusangwilako ishili shonse isho apingulapo ukwabula ukuyumfwa ukuti nakakililwako nelyo ukupatikishiwa?—2 Isha. 12:9, 10; Luka 21:1.
3 Mu kulundapo, kwalibako indalama sha fitabo na magazini isha Sosaite isho icilonganino cisakamana ukupitila muli eluda nelyo umubomfi utumikila uwapeelwa uyo mulimo ne bumba lya baeluda. Ku ca bulanda, ifilonganino fimo tafyasunga bwino ifyalembwa fyabo ifya ndalama, icafumamo amaakaunti ya fitabo na bamagazini ukubipa. E ico, ifishinka fili mu fipusho fyakonkapo ne fyasuko fili no kuba ifya kwaafwa:
◼ Pa numa ya kulongana kumo na kumo, bamunyina babili balingile ukwisula akabokoshi ka misangulo no kupende ndalama. Mulandu nshi ici cabela icakabilwa?
Iyi nshila ilalenga bonse ukwebekeshiwa ukuti indalama shisangulwa shilesungwa bwino. Tulingile ukuba abayangwako nga fintu Paulo ayangilweko mu kusakamana “ukupeelesha” ukwafumine ku filonganino ku kupayanya ukukumbusuka kuli bamunyina ba mu Yudea. Mona ubulondoloshi bwalembwa pali 2 Abena Korinti 8:19-21. Mu cikomo 19 Paulo alandile ulwa kwa Tito uwasontelwe ukuya na o “mu kupyunga uku kwa nkumbu.” Mulandu nshi uwa kucitila ifintu muli iyi nshila? Paulo ayasuka mu fikomo 20 na 21 pa kulanga ukuti tulacefyako ukutunganya bamunyina ukushakabilwa ukwingemako nga ca kuti indalama shaluba.
◼ Cinshi cilingile ukucitwa ku malisiti ayalembwa lintu indalama shapokwa?
Lisiti wa karboni uwasainwapo na bamunyina bonse babili alingile ukupeelwa kuli kalemba, kabili lisiti wa kubalilapo alingile ukuba pamo ne ndalama mu fyalembwa fya mubomfi wa ndalama. Ici cilingile ukucitwa lintu mulelonganya imisangulo pa Ŋanda ya Bufumu na pa cifulo ce Sambililo lya Citabo pa Cilonganino. Kuti cayafwa nga ca kuti munyina aleafwilisha umubomfi wa ndalama nakwata enifulupu uwalembwapo ishina lya kwa kalemba umo engalabika amalisiti kabili lyene ukuyapeela kuli kalemba umuku ukonkelepo bakumana.
◼ Bushe calisuminishiwa ifyo uulesakamana indalama sha misangulo kuti “aashimapo” indalama mu nshita ya bukangalume? Nelyo, bushe kuti caba icalinga ukusuminisha abali bonse “ukwashima” indalama mu nshita ya bukangalume?
Indalama shisangulwa sha cilonganino conse. Takwaba icilundwa cimo icipingula ifya kubomfya indalama. Ilintu ibumba lya baeluda lilasuminisha ukulipila ifipooswa fya lyonse ifya cilonganino, lintu kwabako ukulipila kushili kwa lyonse, baeluda balatuula uyu mulandu ku cilonganino conse pa kuti bengasuminisha. “Ukwashima” indalama lintu kwabako ubukangalume kanshi bupuupu.—Mona Ulupungu lwa kwa Kalinda ulwa April 15, 1994, amabula 19 na 20.
4 Mu cine cine lyaba lishuko ukwafwilisha ukulipila ifipooswa fya cilonganino no kwakana mu kutwala pa ntanshi umulimo wa Bufumu. Nangu cibe fyo, tatulefwaya ukulombelesha indalama ica kuti bamunyina bayumfwa nga balepatikishiwa, lelo tulefwaya ukubeshibisha ifyo icilonganino cibomba ne shuko bakwatamo muli kuno kuloshako. Bamunyina na kabili balikwata ishuko lya kwaafwako uyu mulimo pa kupayanishisha bakangalila ba miputule na ba fitungu umwa kusendama ne ca kulya mu nshita mu nshita. Aya yonse yaba mashuko ya mulimo kabili yafwaya umupashi wa kuitemenwa. Shi kanshi natwakanemo mu kulundulula umulimo wa Bufumu ukupulinkana icifulo cesu conse ica kubombelamo ukupitila mu misangulo yesu iya kuitemenwa kabili no kushininkisha ukuti ifyalembwa fya maakaunti ya cilonganino filesungwa bwino. Muli fyo tukacindika Yehova ku fyuma fyesu.