Ukwaafwa Abana Besu Ukwikalilila mu Cine—Ulubali 3: Ukupitila mwi Sambililo lya Baibolo Ilya Lyonse

¹ Ulubali 2 ulwa kuno kukonkana lwalangilile umulandu abafyashi bashilekabila ukushingashinga ukutampa ukusenda abana mu mulimo. Apa kutendekela pene ku kwaafwa abana benu ukulunduluka ni bumupashi bwabo. Kabili ico cashintilila pa kutungulula isambililo lya Baibolo ilya lupwa ilya lyonse, ilya kufumamo cimo. Mu mbali 3 na 4 tuli no kubomba na luno lubali lwa kwaafwa abana besu ukwikalilila mu cine.

² Ca cine ukuti te mwana onse akasanguka umubomfi wa kwa Yehova. Ici caba pa mulandu wa kuti umuntu umo na umo, te mulandu na fintu akushiwa bwino mu cine, afwile ukuisalilapo umwine ukuti mu cituntulu alefwaya ukubombela Yehova. Te kuti tubapatikishe ukukwata uko kufwaisha. (Languluka ifya kumwenako fya kwa Isaki na Ishmaele, Yakobo na Esau.) Te mulandu no kukansha mu ŋanda na bumupashi bwa bafyashi, abana pa nshita imo bafwile ukusalapo ico balefwaya ukucita. Nga tabekalilile mu cine, lekeni cibe ni pa mulandu wa mutima wabo uushipokelela, te pa mulandu wa kubulisha ukukansha no kusakamana pa lubali lwa bafyashi babo ne cilonganino.—1 Yoh. 2:19.

³ Isambililo lya Baibolo Ilya Lupwa: E ico, tulelomba abafyashi ukuluminisha ukubombesha kwabo mu kutungulula abana babo ku kubombela Yehova. Ukutungulula isambililo lya lupwa ilya lyonse kwalicindama apakalamba. (Efes. 6:4) Nga ca kuti tamulati mutantike isambililo lya lupwa, tantikeni uno mulungu ukwabulo kufilwa. Nga ca kuti mulatungulula lyene, kwateni lyene lyonse cila mulungu. Mwileka icili conse cicilikile ulu lubali lwacindamisha ulwa mibombele yenu iya teokrasi.

⁴ Na kabili, isambililo lyenu ilya lupwa talilingile ukuba fye ciputulwa ca fipusho ne fyasuko ku kumona nga ca kuti abana benu kuti bayasuka ifipusho. Lilingile ukubamo ubupilibulo no kuipakisha. Shininkisheni ukuti, ukulingana no mushinku wabo no kulamuka, kuti balumbulula ifyasuko mu mashiwi yabo yene. Bebeteni nga ca kuti mu cituntulu balisumina mu co balesosa pa kubepusha ifipusho pamo nga: Cinshi wasumina? Bushe mu cituntulu uletontonkanye fyo ici cikacitika? Bushe ici e co ulefwaya ukucita? Lekeni bailumbulwile ukuyumfwa kwabo kwine ukwa kufuma ku mutima. Mwibakalipila nga tabaswike fintu mwacilafwaya, lelo esheni na maka yonse ukulimba icine mu mitima yabo. (Amala. 6:4-7) Bikeniko umuntontonkanya no mweo onse muli iyi mibombele ya kusambilisha. Na kabili, lyonse lombeni Yehova ku butungulushi bwakwe, ukucilisha lintu mwakwata amafya pa kutungulula abana benu mu nshila ya cine.

⁵ Ukutula pa nshita bali utunya, mulingile ukulundulula mu mitima ya bana benu ukufwaisha kwaluma ukwa kubombela Yehova. Muli yo nshila, nelyo fye lintu bashilati bafike pa mushinku wa myaka 10, bakafwaya ukuba bakasabankanya ba Bufumu. Moneni cene nge shuko lishaiwamina no buyo, ilili no kufwaikwa nga nshi. Mwinenuka mu kulundulula uku kufwaisha kwaluma. Imibele yenu ine iya mutima ukulola ku mulimo wa kushimikila yalicindama. Nga ca kuti mwaliba abashimunuka ukwakana muli wene, tamusangamo ubuseko muli wene, mushimikila fye pantu cilekabilwa, abana benu bakamona cene. Bakaseshiwa ukumupashanya te kupashanya amashiwi yenu. Pa kukansha abana benu, kuti mwakabila ukuikansha mwe bene no kusakamana imibele yenu iya mutima ukulola ku kubombela Yehova.

⁶ Umulimo wa Kukuula: Ubuyo bwenu bwa kukuula abana benu mu kuba abasambi ba kwa Kristu. Moneni cintu Paulo asosele pali 1 Abena Korinti 3:10: “Awe onse umo umo asakamane ifyo akuulapo.” Lyene atwalilila ukulanga ukuti kuti pambi tulekuulila mu kuba ne fisolobelo fishawama ifishingakokola, pamo nga ifimuti, icani, ne mpimbili. Ilyo cabomfiwa ku ndupwa, kuti capilibula ukuti imibele ya kusambilisha, ukukansha, ne ca kumwenako yalibipa. Ukucila, tulefwaya ukukuula abana besu mu kuba ababomfi ba kwa Yehova mu kuba ne fisolobelo ifishonaika pamo nga golde, silfere, na mabwe yaumo mutengo. Mu mashiwi yambi, lundululeni imibele yaumo mutengo pamo nga icitetekelo, ukutemwa, ukuipeelesha kwa bukapepa, no kushipikisha iyo ikasesha abana besu ukubombela Yehova no kwikalilila mu mulimo wakwe.—Moneni Ulupungu lwa kwa Kalinda, March 1, 1985, amabula 23-27.

⁷ Mu lubali lukonkelepo ulwa kuno kukonkana, tuli no kulanguluka ifya kucimfya ifipindami fya kutungulula amasambililo ya ndupwa.