Ukwaafwa Abana Besu Ukwikalilila mu Cine—Ulubali 4: Ukupitila mu Kucimfya Ifipindami
1 Ulubali lukalamba mu kwaafwa abana besu ukwikalilila mu cine lwaba lisambililo lya Baibolo ilya lupwa ilya lyonse kabili ilyabamo bupilibulo. Ifya kulenga isambililo lya musango yo ukuba ilya kufumamo cimo pa kuti lingalimbe cine mu mitima ya bana benu fyalilangulwikwepo mu Ulubali 3. Lelo indupwa ishingi tabaletungulula amasambililo lyonse aya kufumamo cimo. Lekeni tulanguluke pa fipindami fimo ne nshila fingacimfiwilwamo.
2 Ifipindami kwi Sambililo lya Lupwa Ilya Lyonse: Icipindami cimo kubulisha inshita. Pa mulandu wa mitengo yaluma iya fya kulya, ifya kufwala, ne fikabilwa fimbi, bashibo nelyo fye na banyinabo kuti pambi baleshomboka ukusanga indalama shalinga isha kubomfya ku fipooswa fya lupwa. Incito ya ku mubili, amakwebo, no kwafya kwa mikalile kuti fyaambukila nga nshi isambililo lya lupwa, apantu abafyashi kuti pambi baba abanaka lwa ku mubili na lwa mu muntontonkanya mu nshita ya cungulo. Cinshi cili e kupikulula? Icikalamba, caba citetekelo—icitetekelo ca kuti Lesa akafikilisha amashiwi ya kwa Yesu ayalembwa pali Mateo 6:33 ayatila: “Lelo mubale mufwaye ubufumu . . . , ne fi fyonse [ifya ku mubili] fikalundwako kuli imwe.” Ukubala ukufwaya ifintu fya ku mupashi pa kucefyako imibombele ya musango yo iya ku mubili mu kushininkisha kukapaalwa kuli Lesa. Yehova akapayanya ifili fyonse ifyo mwabulisha. Ukukuma ku kunaka, ibukisheni ukuti ukulanshanya ifya ku mupashi lyonse kulatupembesula lwa ku muntontonkanya nelyo fye lwa ku mubili. Ciba fye kwati ni lintu waya ku kulongana nangu cingati naunaka ilyo wabwela uyumfwa uwapembesulwa, e fyo mukayumfwa abapembesulwa na pa numa ye sambililo lyenu ilya lupwa. Mwiliteulula!
3 Icipindami na cimbi caba kukanasoma kwa bafyashi. Inshita shimo shimo abana kuti babelenga bwino ukucila abafyashi babo. Mwileka ici cibe cipindami. Nangu fye ni bamunyina bashaishiba ukubelenga no kulemba balyafwa abantu basoma ukwisa mu cine. Mwi sambililo lya Baibolo ilya lupwa, nga ca kuti abafyashi tababelenga bwino, napamo kuti baeba abana ukulabelenga amaparagrafu. Nangu cingati abana kuti babelengapo bwino, tacilepilibula ukuti balyumfwikisha icine bwino bwino. Pa mulandu wa mano yabo ayasumbuka no kubelesha, abafyashi kuti baeba abana ifyebo fyakatama ifingi. E co, mwileka ukukanasoma kube ca kucilima ukutungulule sambililo lya lupwa ilya lyonse.
4 Abana bamo balaba no tumisango twabipisha tumo utukabila ukubombwapo ilyo bashilatendeka ukusendwa mu mulimo. Napamo balemenena ku kubepa, ukwiba, ukufwala busanku busanku, aba miciika, nelyo abashitesekesha ifintu fya ku mupashi. Baeluda kuti bafwaya ukumona aba bana bawamyako imibele ilyo bashilabasuminisha ukuba bakasabankanya bashabatishiwa. Mu cifulo ca kukanacitapo icili conse, abafyashi balekabila ukubombesha na maka sana ku kwaafwa abana babo ukucimfya utu tumisango. Bomfyeni impapulo pamo nga Ukukutika kuli Kasambilisha Mukalamba, Ifipusho Abacaice Bepusha, ne fipande fya kulungatika muli bamagazini ifyo filanda pa mpika isho abacaice pambi bakwata. Mwinenuka ukutontonkanye fyo abana benu tabakaaluke. Ibukisheni ukutekanya ukukabilwa ku kwaafwa abasambi ba Baibolo ukwalula ubuntu bwabo. Bushe ukubombesha kumo kwine no kutekanya te kuti fibomfiwe ku bana benu? Ukubomfya ukulamuka nga kasambilisha kuti kwalambula ukubombesha kwenu mu kuba no kutunguluka mu kutungulula abana benu ku kubombela Yehova.
5 Napamo icisangwila ku kulekelesha amasambililo ya ndupwa caba mimwene ya mu calo iya kuti abana bafyalilwa pa kuti bengaafwa abafyashi. Abana abengi baletwa mu calo pa kuti bengesasakamana abafyashi lintu bakota. Bamo kuti baitekako umutima pa kutontonkanya ukuti nangu cingati abana tabeshile mu cine kwena abafyashi bakamwenamo lwa ku mubili mu myaka ya pa numa. Caliba bwino ku bafyashi abakote ukwafwilishiwa na bana babo, lelo moneni icishinte calondololwa pali 2 Abena Korinti 12:14 apatila: “Pantu te bana abafwile ukubikila abafyashi ifyuma; lelo abafyashi e bafwile ukubikila abana.” Mu cituntulu, abafyashi babelako ukwaafwa abana babo, te bana ukwaafwa abafyashi babo. Ukufumyapo imimwene iili yonse iya kaso, iya ku calo iyo pambi abafyashi bengakwata kuti kwabaafwa ukuipeela bulilambo, ee, ukuibikilishako, pa mulandu wa bana babo. Ici cilangililwa ku kubombesha kwa mukoosha ukwa kusungilile sambililo lya Baibolo ilya lupwa ilya lyonse.
6 Nga twatemwa abana besu no kufwayako icingabawamina tuli no kuseshiwa ukuwamyako. Cilaba ica bulanda lintu abana abakushiwa mu cine babwelela ku calo. Nga batwalilila ukuba ku calo, bali no kuloba pa Armagedone. Fintu cikaba ica buseko nga ca kuti tatupuswike fye fweka pa Armagedone no kusanguka ulubali lwe bumba likalamba ilikabako pa numa ya Armagedone ilyalondololwa mu Ukusokolola icipandwa 7, lelo nga ca kuti na bana besu bonse bapusunsukila pamo na ifwe.
7 Mu cipande ca kusondwelela muli kuno kukonkana, Ulubali 5, tukatontomesha pa cintu bambi, ukusanshako baeluda na bamunyina ne nkashi abakosoka bengacita ku kwaafwa abafyashi, ukucilisha balya bakwata indupwa shikalamba.