Imibele Nayaluka
1 Baibolo itweba ukuti ‘imibele ya pano isonde ileyaluka.’ (1 Kor. 7:31, NW) Fintu ico caba ica cine ilelo! Nangu fye ni mu nshita yesu iya bumi, twalimona ukwaluka kukalamba mu kutontonkanya ne myendele ya bantu pa cipimo icili conse ica bwikashi bwa bantu. Nga twingatunguluka ku kubashimikila ubukombe bwa Bufumu, inshila yesu iya kushimikilamo ilingile ukulingana ne mibele ileyaluka. Tufwaya ukushimikila imbila nsuma mu nshila ya kuti yacebusha abantu no kubakunta ku mutima.
2 Imyaka yapitapo, mu fyalo ifingi umulimo wa kushimikila wali uwapusanako, ukucilisha pa mulandu wa kuti abantu baikele mu cibote, kabili baleyumfwa abacingililwa. Bamwene ukupepa nga ukwashila mu bwikashi bwabo. Baibolo yalikatamikwe apakalamba. Muli shilya nshiku ukucitilo bunte ilingi line kwabimbilemo ukusuusha ififundisho. Ilelo, imikalile ya bantu ili mu cimfulumfulu. Imipepele ilepumiwa. Banono fye bakwata icitetekelo muli Baibolo. Kabili ku bengi, imfundo ya kusanguka yalyonaula icitetekelo muli Lesa.
3 Kangalila wenda umo alandilepo ukuti: “Cilemoneka kwati nomba, kuli amafya ayengi no bucushi mu mikalile ya bantu ica kuti tufwile ukubasambilisha ifya kuisakamana.” Ukusakamikwa kwa ndakai ukwa bantu mu cifyalilwa e kulandwapo fye, indupwa shabo, na masakamika yabo. Ifi e fintu balandapo ilingi line ilyo bakumana capamo. Tulekabila ukulaibukisha ico mu mulimo wesu uwa kucitilo bunte.
4 Ubufumu bwa kwa Lesa E Subilo Lyashininkishiwa Lyeka Fye Ilya ku Ntanshi: Abantu abengi tabacetekela nga nshi amakamfulumende ya bantu. Batontonkanya ukuti tabengenekela ukumona icalo cawaminako mu nshita ya bumi bwabo. Ukupepa kwa bufi kwalifilwa ukubapeela umufula we subilo uuli onse. Uyo e mulandu wine ukukabila kwakulisha ukwa mutundu wa muntu kwaba kuumfwa imbila nsuma pa lwa Bufumu bwa kwa Lesa. Londolola fintu mu kupelako bukapayanya inshila sha kucimfishamo amafya yonse ayalolenkana no mutundu wa muntu.
5 Baibolo E Ntulo Fye Yashintililwapo Iya Butungulushi: Cinkupiti wa bantu ilelo balilufiwa ku ntungulushi isho shashintilila pa mano ya buntunse na mano ya ku calo. Abantu bacili tabalaishiba ukuti “te kwa muntu uuleya ukushikimika amatampulo yakwe.” (Yer. 10:23) Isambililo lyacindamisha ilingasambililwa lya kuti bafwile ‘ukutetekela Yehova umutima wabo onse, na ku kwiluka kwabo abene ukukanashintililako.’ (Amapi. 3:5) Ilintu imibele nayaluka, Baibolo tayalwike. E ico, mu butumikishi bwesu lyonse tulingile ukulanda pa Cebo ca kwa Lesa, ukusambilisha bambi ukutesekesha ubutungulushi bwa iko bwapuutwamo, ubwa bulesa. (2 Tim. 3:16, 17) Pa kufikilisha iyo mifwaile, tulingile ukutwalilila ukulangilila abantu ubucindami bwa Baibolo pa kulosha kuli yene mu kushimikila kwesu, ukuibomfya mu kwasuka ifipusho fyabo, no kulondolola ukukabila kwa kusambilila yene no kubomfya amano ya iko ayabomba.
6 Nangu fye ni mu mibele ileyaluka iya lelo, ubuyo bwesu mu butumikishi butwalilila ukuba cimo cine. Tufwile ukushimikila imbila nsuma iya Bufumu, ukukuula ukucetekela mu Cebo ca kwa Lesa, no kwaafwa bambi ukumona ukukabila kwa kusambilila Baibolo na ifwe. Fintu tulesosa filingile ukumfwana no kukabila kwa ndakai ukwa abo tulecitilako ubunte. Nga twacite fyo, kuti twaba abakumako ku mbila nsuma iyo tubila kuli bambi na muli ifyo ukunonka abantu abengi.—1 Kor. 9:19, 23.