Umukululo wa Fipusho

◼ Ni shani fintu amaparagrafu yalingile ukubelengwa mwi Sambililo lya Citabo pa Cilonganino na pe Sambililo lya Ulupungu lwa kwa Kalinda?

Amaparagrafu ilingi line yalabelengwa no kulandwapo imo imo. Nangu cibe fyo, nga ca kuti icipusho cakumbinkanya amaparagrafu yabili nelyo yatatu capamo, kabelenga akabelenga ayo maparagrafu yonse capamo. Pa numa ya kubelenga katungulula abelenga icipusho no kufwaya abemishe amaboko pa kuti basuke. Pa numa ya ico aleba kabelenga ukubelenga paragrafu ukonkelepo. Tacatashiwa ukuti amaparagrafu ayengi yabelengwe pa nshita imo nga fintu cicitwa mu filonganino fimo.

Kabelenga tabelenga amalembo yaloshiweko mu fya kwisalila ( ) nelyo ayali pa mpela ya paragrafu. Aya malembo yalasanshiwamo ku kwafwilisha imfundo sha mu malembo ishili mu paragrafu kabili bonse balakoseleshiwa ukuyabelenga lintu balepekanishisha isambililo. Utulembo twa mwi samba uto tulelundako ubulondoloshi kuli paragrafu tulingile ukubelengwa lelo nga ca kuti utu tulembo tulelumbula fye ukuti ulupapulo lumo lwalembwa na Sosaite nelyo ukuteyanya kumbi, tacili icakabilwa ukutubelenga.

Imifwaile ya kubelenga amaparagrafu pa kulongana yaba kunonsha abasangilwepo lwa ku mupashi. E ico, bakabelenga balingile ukubombesha ku kushininkisha ukuti babelenga bwino, mu kulongoloka pa kulongana. Lintu umuntu aletubatuba pa kubelenga, katungulula kuti camwafya ukupwisha isambililo pa nshita yalinga. Ukulufyanya ukushimpa amashiwi, ukushimbula kwalubana no kuipununa kuti kwaba ukwa kupumfyanya nga nshi, ukwa kufulunganya kuli bamunyina na bantu balesekelela abaleesha ukutontomesha pa fyebo. Ukubelenga kwa pa cintubwingi kufwile ukuba ukwalongoloka. (Haba. 2:2) Apantu ukubelenga kwa pa cintubwingi kwaba kusambilisha bambi, kabelenga wa pa cintubwingi afwile ukwishiba fintu alebelenga mu kufishapo no kumfwikisha bwino ico uwalembele alefwaya, ukuba uwasakamanisha mu kubelenga ku kusengauka ukulumbula imfundo shalubana kuli kakutika. Ukulingana no Ukusokolola 1:3, ababelenga bulya busesemo mu kupongomoka, capamo na abo abomfwa ifyebo no kufibaka, bakashuka.

Pali iyi milandu abo bapeelwa ukubelenga pa kulongana kwa cilonganino balingile ukukuntwa na mashiwi ya mutumwa Paulo pali 1 Timote 4:13 aya kuti: “Ubike umutima pa kubelenga, ukucincisha, no kusambilisha.”