Ilyashi lya Teokrasi

Ukubombesha kwa kukalakasha amakuule ya Mayanda ya Bufumu nakupaalwa mu kuba no kupwishishiwa kwa Ŋanda ya Bufumu iipya ku Livingstone. Iyi Ŋanda ya Bufumu, umwingekala abantu 250, yapeelwe pa April 27. Tuletasha icilonganino ca Livingstone Central ku kubombesha kwabo kabili tulesubila ukuti abantu abengi bakakonkomokela kuli iyi Ŋanda ya Bufumu isuma ku kusambilila ifingi pa lwa kwa Yehova ne mifwaile yakwe.

Umulimo wayakanishiwe ukubombwa pa mpela sha milungu shine, March 15 ukufika ku April 14, lelo inshita ya bukuule bwine bwine yafikile ku nshiku 9. Mu mpela sha milungu, ibumba lya bakakuula ukufuma ku musambo lyaleya ku Livingstone ku kwangalila umulimo. Pa March 15 na 16 babikile slabu. Imilungu yakonkelepo ibili icilonganino ca Livingstone Central calitamine injelwa. Pa March 29 na 30, icimpangilile ca Ŋanda ya Bufumu ica fyela calimikwe no mutenge ukufimbwapo. Impela ya mulungu iyakonkelepo, bakakuula balamuka, ababomfi ba kuitemenwa ukufuma ku Lusaka, baile na basi ku Livingstone ku kukuula ifibumba no kupaatula imiputule. Ukuwaminisha kwabombelwe pa April 13 na 14, ukwali incito ya kubika imipaipi ya menshi, amalaiti, ukupenta, ukubika ifisoselo ne fipuna. Pa Mulungu icungulo kasuba Iŋanda ya Bufumu yalipwishishiwe no kulonganinamo umuku wa kubalilapo.

Imyeshi yafulilako iyapitapo, mwalyebelwe ukuti Dipartimenti wa Bukuule bwa Mayanda ya Bufumu uwaba pa musambo akapyanikwapo na Makomiti ya Makuule ya mu Citungu (regional building committees [RBC’s]). Nomba umo alipangwa mu Lusaka, umwaba bamunyina 5 abalamuka mu fya makuule. Kuliko amapekanyo ya kupanga uwa cibili ku Mikoti. Ukutula ino nshita no kuya ku ntanshi ba RBC e bakalayangalila ubukuule bwa Mayanda ya Bufumu, ilintu Kingdom Hall Desk pa musambo ikalapayanya fye ifya kubatungulula.

Nga ca kuti mwalishiba imilimo ya fya makuule kabili kuti mwaitemenwa ukubombako pa makuule ya ku ntanshi, twapaapaata lembeleni ku musambo no kwipusha formu wa “Umutande wa Fipusho fya kwa Kabomba mu Bukuule bwa Mayanda ya Bufumu.”