Twalikwata Umulimo
1 Yesu akambishe abakonshi bakwe ‘ukulenga aba nko shonse ukuba abasambi.’ (Mat. 28:19) Mu fyalo 232 na mu fishi ukushinguluka isonde lyonse, bakalumbanya ba kwa Yehova Lesa ukucila pa mamilioni yasano baba bushinino bwa kuti ikambisho lya kwa Yesu lyalifikilishiwa. Lelo ni shani ifwe pa lwesu? Bushe tulamona umulimo wa kushimikila mu kukatama?
2 Icishingamo Cesu: Umulimo waba “ikambisho lya kubomba ifintu fyalondololwa.” Twalikonkomeshiwa na Kristu ukushimikila. (Imil. 10:42) Umutumwa Paulo aishibe ukuti alekabila ukubilisha imbila nsuma, nelyo caali cishingamo cakwe. (1 Kor. 9:16) Ukulangilila: Elenganyeni ukuti muli mubomfi wa mu ngalaba ilebunda. Kapitao amukambisha ukusoka abalendo no kubasontela amato yasendwa mu ngalaba aya kupusukilamo ilyo yabunda. Bushe mukasuula uko kukambisha no kwangwa ukuipususha fye mwe bene? Nakalya. Bambi bashintilile pali imwe. Ubumi bwabo buli mu busanso! Namushingamwa ukubomba umulimo wenu uwa kubaafwa.
3 Twalitumwa na Lesa ukubilisha ukusoka. Yehova mu kwangufyanya akonaula ino micitile ibifi iya fintu yonse. Ubumi bwa mamilioni ya bantu tabwashininkishiwa. Bushe kuti caba icalungama kuli ifwe ukusuula ubusanso ubo abantu bambi balimo no kwangwa fye ukuipususha fwe bene? Kwena iyo. Twalishingamwa ukwafwilisha ukupususha ubumi bwa bantu bambi.—1 Tim. 4:16.
4 Ifya Kumwenako fya Citetekelo Ifya Kukonka: Kasesema Esekiele ayumfwile uwashingamwa mu kubilisha ubukombe bwa kusoka ku bena Israele babula icitetekelo. Yehova mu kukosa amusokele pa lwa fya kufumamo nga ca kuti afililwe ukubomba umulimo wakwe, atile: “Ilyo nasosa ku mubifi, nati, Ukufwa ukafwa, na iwe tausokele, . . . umubifi wena akafwila mu mampuulu yakwe, lelo umulopa wakwe nkafwaya ku minwe yobe.” (Esek. 3:18) Esekiele abombele umulimo wakwe muli bucishinka te mulandu no kukaanya kwabipisha. E ico, alisekelele lintu Yehova aputunkenye ubupingushi bwakwe.
5 Imyanda ya myaka yakonkelepo, umutumwa Paulo alembele pa lwa cishingamo cakwe ica kushimikila. Abilishe ukuti: “Ndi wa kaele ku mulopa wa mwe bonse; pantu nshakwindile ukulondolola kuli imwe ukupanga konse kwa kwa Lesa.” Paulo ashimikile pa cintubwingi na ku ŋanda ne ŋanda pantu alishibe ukuti ukufilwa ukucita ifyo nga kwamulengele ukuba uwa mulandu wa mulopa pa ntanshi ya kwa Lesa.—Imil. 20:20, 26, 27.
6 Bushe twalipimpa nga fintu Esekiele apimpile? Bushe tulakuntwa ukushimikila nga fintu Paulo acitile? Umulimo wesu umo wine nga fintu uwabo waali. Tufwile ukutwalilila ukufikilisha icishingamo cesu ica kusoka bambi, te mulandu no kukanayangwako kwabo, imisuula, nelyo ukukaanya. Amakana ya bantu balundwako kuti bayankula ku bukombe bwa Bufumu no kubilisha ukuti: “Tuleya na imwe, pantu natuumfwo kuti muli na Lesa.” (Seka. 8:23) Shi ukutemwa kwesu Lesa na bantu banensu nakutukunte ukukanaleka. Twalikwata umulimo wa kushimikila!