Ni Shani pa lwa Balupwa Lwenu?
1 Abengi aba ifwe twalikwata balupwa abafula abashaba mu cine. Fintu tufuluka ukuti abo batemwikwa bailunde kuli ifwe mu nshila ya ku bumi! Kuti twacilapo ukwangwako pa lwa nshita yabo iya ku ntanshi nga bali ba mu ŋanda yesu. Nangu cingati twalyesha pa myaka iingi ukufwaya ukubaafwa ukwisa mu cine, tatulingile ukusondwelela ifyo te kuti basambilile.
2 Lintu Yesu abombele umulimo wakwe uwa kushimikila, “bamunyina na bo tabamutetekele.” (Yoh. 7:5) Pa nshita imo, balupwa lwakwe batontonkenye ukuti alipenene. (Marko 3:21) Nalyo line, Yesu taabatendelwe. Mu kupita kwa nshita, bamunyina balipokelele icine. (Imil. 1:14) Munyina kwa Yesu uwa mwi fumo limbi Yakobo aishileba ulupanda mu cilonganino ca Bwina Kristu. (Gal. 1:18, 19; 2:9) Nga mwingafwaya ukuipakisha ubuseko bwisa pa kumona balupwa lwenu ukupokelela icine, te kwesha ukuleka ukubashimikila imbila nsuma iya Bufumu.
3 Beni Abapembesula, Te Bapakilisha: Lintu Yesu aleshimikila kuli bambi, bakakutika bakwe bayumfwile abapembesulwa, te batiinishiwa. (Mat. 11:28, 29) Tabapakilishe fisambilisho ifyo bashali na maka ya kumfwikisha. Pa kuti mwingapembesula balupwa lwenu ku menshi ya cine, banwesheni utumakaapu pa nshita imo, te kubanwesha imbeketi yonse! Kangalila wenda alandilepo ukuti: “Abashimikila balupwa lwabo, ukubomfya ifyebo ifinono ifya kubalamuna ubuseko bwa kufwaya ukumfwa, e banonka ifya kufumamo fyawamisha.” Muli iyi nshila, nangu fye ni bakakaanya kuti batendeka ukwipusha ifipusho na mu kupelako balundulula insala ya cine.—1 Pet. 2:2; linganyeniko 1 Abena Korinti 3:1, 2.
4 Abena Kristu abengi ababa na bena mwabo abashasumina balibashimikila mu nshila ibomba bwino iya kusha ulupapulo lwaisulwa pa fyebo ifyo nakalimo bengasekelelamo. Nkashi umo uwacitile ici na kabili aletungulula isambililo ku bana bakwe lwa mupepi na pekalile umulume wakwe pa kuti alekutikako, ukulondolola ifyebo ifingamunonsha. Inshita shimo aleipusha umulume ukuti: “Nacisambilila ifya musango uyu mwi sambililo lyandi ilelo. Cinshi muletontonkanya pa lwa cene?” Mu kupelako, umulume wakwe alipokelele icine.
5 Beni aba Mucinshi, Te Basuswa: Kasabankanya umo alandilepo ukuti “nelyo fye ni balupwa balikwata insambu ku mimwene yabo na matontonkanyo.” E co tulingile ukulanga umucinshi lintu balanda ifyo baletontonkanya nelyo lintu mu kulungatika batukaanya ukubashimikila icine. (Luk. Mil. 3:7; 1 Pet. 3:15) Ilyo twaba abatekanya kabili aba kutemwa na pa kukutikisha, kuti twafwaya amashuko ya kushimikila mu kucenjela. Ukutekanya kwa musango yo kuti kwaba ukwa kulambula, nga fintu camwenwe ku mulume wa Bwina Kristu uyo mu kutekanya ashipikishe ukucushiwa ku mukashi wakwe uushasumina pa myaka 20. Lintu atendeke ukwaluka, umulume wakwe atile: “Fintu ndi uwa kutasha kuli Yehova pa kuti alingafwile ukukusha ukushishimisha, pantu nomba kuti namona ica kufumamo: Umukashi wandi alitampa ukwenda mu nshila ya bumi!”
6 Ni shani pa lwa balupwa lwenu? Nakalimo ukupitila mu myendele yenu iya Bwina Kristu iisuma no kubapepelako, “kuti mwabanonkela kuli Yehova.”—1 Pet. 3:1, 2, NW, utulembo twa mwi samba.