Mulafulukwa!
1 Mu nshita mu nshita, kuti pambi twapuswa ku kulongana kwa cilonganino kumo nelyo ukwafulilako, ukutontonkanyo kuti ‘tapali nangu umo uukamfuluka; tabengeshiba fye no kuti nshilimo.’ Ifyo te fyo caba iyo! Umo na umo uwa ifwe aliba no mulimo uukalamba mu mibombele ya cilonganino, pamo nge fyaba ifilundwa fyesu ifya mubili. (1 Kor. 12:12) Ukukanaba kwesu pa kulongana ukwa cila mulungu kuti kwayambukila ubutuntulu bwa ku mupashi ubwa bambi abasangilweko. Nga tamuli pa kulongana, ishibeni ukuti—mulafulukwa!
2 Umulimo Uukalamba Untu Mubomba: Paulo alefuluka ukubishanya na bamunyina. Abena Roma 1:11, 12 balalondolola umulandu ukuti: “Ukuti imupeeleko ica bupe ica bumupashi . . ., tusansamushiwe pamo na imwe uko muli, ine ku citetekelo cenu, na imwe ku citetekelo candi.” Mu nshila yapalako, ukupitila mu kwasukapo kwesu, amalyashi yesu mu kulongana, no kusangwako fye, tulasangwilako nga nshi ku kukuulana pa kuti tuletwalilila mu busumino.—1 Tes. 5:11.
3 Bushe tamufwaisha nga nshi ukuyamonana na bambi pa kulongana kwa cilonganino? Mulakutikisha ku kulandapo kwabo no kutesekesha ukulumbulula kwabo ukwa citetekelo. Ifya bupe fyabo ifya ku mupashi filasangwila ku kukuulililwa kwenu. Nga tabalipo pa kulongana, kuti mwayumfwe fyo napabulilapo icintu cimo icacindama. Ifyo fine e fyo bamunyina ne nkashi bayumfwa ulwa imwe nga tamulipo.
4 Umulimo Wakatama Untu Ukulongana Kubomba: Ulupungu lwa kwa Kalinda pa nshita imo lwalandile pa fintu ukulongana kwakatama pa kuti twingaba abomi lwa ku mupashi, lintu lwatile: “Muli cino calo calepaulwa ku kukansana, ica bucisenene, icilonganino ca Bwina Kristu cintelelwe cine cine ica ku mupashi . . . , cubo ca mutende no kutemwa. Muli ifyo, ba uusangwapo lyonse pa kulongana konse.” (w93-CW 8/15 11) Cila bushiku tukumanya imibele iitutompola lwa ku mupashi. Nga tatucenjele, kuti twaobelwa na masakamika ya pa lwesu ica kuti twalaba ku fintu fyacindama ifya ku mupashi. Bonse twashintilila pali umo no munankwe ku kukoseleshiwa kuntu tukabila pa kuti twingatwalilila abaikatana kabili abapimpa mu mulimo wa kwa Lesa.—Heb. 10:24, 25.
5 Ukusangwa kwesu pa kulongana kwalikatama. Ukulwala nelyo ifiponako ifyabulo kwenekela kuti pambi fyatulenga ukupuswako mu nshita mu nshita. Nga tacili fyo, pampamineni pa kulasangwa pa kati ka nkuta ishilumbanya Yehova capamo!—Ilu. 26:12.