Ukusangwilako ku Kukosha Ubwikashi Ukupitila mu Kukosha Ifyakatamikwa fya mu Lupwa na mu Kufusha Insansa
1 Ilelo indupwa shili mu busanso ukucila kale lyonse. Ukusonga kwa maka kulesansa indupwa. Abantu abengi nabasakamikwa pa lwa kulekana kuleingilishiwako no kubongoloka kwa fyakatamikwa mu ndupwa mu bwikashi bwesu. Ilelo indupwa shilealuka. Bucipondoka bwa bapungwe, ukucusha abana, ukupumana, bucakolwa, na mafya yambi fipwisha insansa sha ndupwa ishingi. Ku bana abengi na bakalamba, ulupwa te cubo ca mutende.
2 Indupwa shibomfya ifishinte fya Baibolo no kutangisha ifya Bufumu bwa kwa Lesa shasanga ukuti amafya ya shiko yalacepanako nelyo fye ukupikululwa no kupikululwa kabili shalisanga ne nsansa. Bushe te bukombe busuma ubwa kutwalila indupwa mu cifulo mubombela mu mweshi wa June, ukubomfya icitabo ca Icaba Inkaama ku Nsansa sha Lupwa? Ni shani tukacite ci? Kupitila mu kubalosha ku Cebo ca kwa Lesa, icaimika ifishinte fya bumi bwa lupwa ubwa nsansa. Ubumi bwa lupwa ebo abantu baletontonkanyapo. Itemenweni ukulanshanya na bantu pa lwa bumi bwa lupwa. Landeni ifisuma pa lwa bwene. Bushe ni shani mwingatendeka?
3 Kuti mwatendeka muli iyi nshila:
◼ “Njishile ku kulanshanya nenu ifyebo fimo pa lwa bwafya bukumine icinabwingi ca ba mu calo ilelo. Busanshishemo insansa sha lupwa. Bonse ifwe tufwaya ulupwa lwesu ukuba ne nsansa, lelo twalishiba ukuti te ndupwa ishingi ishaba ne nsansa. Cinshi mulemona cingaafwa abantu ukusanga insansa shafulilako mu bumi bwabo ubwa lupwa? [Lekeni asuke.] Amalyashi yalangilila ukuti abantu abengi bapita mu mafya pa ng’anda. Cinshi mwaishiba icingaafwa indupwa ukushikatala no kukwata insansa shafulilako? [Lekeni asuke.] Bushe tamusuminisha ifyo kuti caba ica kunonsha ukumfwa ku fyo Kabumba wa lupwa asosa? Alimika ukutungulula kukabilwa mu Baibolo. Ifi fishinte fyalilandwapo muli ici citabo ca Icaba Inkaama ku Nsansa sha Lupwa. Mulangisheni imitwe ya fipandwa inono iicebusha. Kupukuleni pe bula 10 no kubelenga sentensi wa kulekelesha uwa paragrafu 17 ukufika na ku mpela ya paragrafu 18. Tambikeni icitabo. Londololeni ukuti fingi mwingalanshanya kabili mwipusheni ilyo mwingakumana na kabili.
4 Nelyo kuti mwatendeka ukulanshanya ukupitila mu kulumbula ubwafya, napamo ukusosa ukuti:
◼ “Nangu cingati uuli onse afwaya ukuyumfwa uwaikushiwako, cimoneke fyo te ndupwa ishingi shatunguluka muli ci. Cinshi muletontonkanya cingabaafwa ukusanga insansa sha cine cine? [Lekeni asuke.] Kale sana, Baibolo yasokolwele amafya twali no kumona mu ndupwa ilelo. [Belengeni 2 Timote 3:1-3.] Nangu cibe fyo, Baibolo na kabili yeba indupwa ifya kucita ku kupikulula aya mafya no kukwata insansa shibelelela. Ifishinte fya iko fyaimikwa muli ici citabo, Icaba Inkaama ku Nsansa sha Lupwa.” Lyene mulangeni umukululo wa kupitulukamo pa mpela ya cipandwa cilingile, belengeni, no kutambika icitabo.
5 Ilyo mwabwelelako, kuti mwabombela pa buyo bwa kutendeka isambililo lya Baibolo ukupitila mu kusosa ukuti:
◼ “Naletontonkanya pa fyo mwasosele pa lyashi lya bumi bwa lupwa, kabili nimuletela icintu ndetontonkanya ifyo kuti mwaipakisha. [Mulangeni broshuwa wa Cinshi Cintu Lesa Afwaya Kuli Ifwe, kupukuleni pe bula 16, no kubelenga ifipusho 6 pa muulu.] Umo umo mu lupwa afwile ukubomba ulubali lwakwe ku kusangwilako ku nsansa sha lupwa. Nga ca kuti namukwatako amaminiti yanono, nalalangilila ifya kucita pa kuti munonkelemo sana mu fyebo ifi.” Lyene tendekeni ukusambilila Isambililo 8.
6 Nga ca kuti umuku wa kubalilapo mwalanshenye pa bucindami bwa kumfwila Kabumba wa lupwa, tendekeni ukulanshanya ukupitila mu kusosa ukuti:
◼ “Bamo bayumfwa ukuti ukupanda mano ukwa Baibolo takubomba muli cino calo ca nomba. Bushe imwe muyumfwa shani pa lwa ico? [Lekeni asuke.] Bushe te kuti musuminishe ukuti icitabo cipayanya ukufunda kusuma ukwingatulenga ukuba no bumi bwa lupwa ubwa nsansa cilabomba? [Lekeni alandepo.] Ififundisho ne fibelesho fisanshamo ubumi bwa lupwa fyalyaluka kabili ne fyafumamo ifyo tumona ilelo te fisuma. Lelo indupwa shibomfya ifyo Baibolo isosa shalishikatalako kabili sha nsansa.” Belengeni Abena Kolose 3:18-21. Londololeni ukuti tulatambika isambililo lya Baibolo ilya pa ng’anda apa fye.
7 Kwena, ilyo mulelanshanya na bantu pa lwa mafya ya mu bumi bwa lupwa, mukaba abacenjela. Mulesengauka ukucilenga ukumoneka ifyo muletontonkanya ukuti mwine ng’anda ali na mafya mu lupwa lwakwe. Kuti cacilapo ukuwama ukulosha ku bwafya nga bumo ubo ubwikashi bonse bukwete.
8 Natushininkisha ukuti mulesuminisha ifyo ici citabo cikaba ica kwaafwa sana ku ndupwa mu cifulo mushimikilamo. E co, ilyo mulepanga abasambi, muletontonkanya ifyo mwingaafwa bonse aba mu lupwa. Bafweni ukumona ubucindami bwa bukombe bwa Bufumu pa kuti na bo bene bakesekwata amapaalo capamo ku ntanshi. (Ukus. 21:4) Natushalike konse konse icitabo ca Nsansa sha Lupwa ku kuleka abantu konse bafwiwe ku Cebo ca kwa Lesa ukukwata inshita ya ku ntanshi iibelelela.—1 Tim. 6:19.