Fintu Cawama Ukulongana Lyonse!
1 Pa makumi ya myaka ku Bulaya bwa ku Masamba, bamunyinefwe batemwikwa abengi balibindilwe ukulongana pa cintubwingi. Tontonkanyeni ifyo batemenwe lintu icibindo cafumishiwepo kabili batendeke ukulongana mu buntungwa!
2 Lintu atandalile icilonganino cimo ica musango yu, kangalila wa muputule alembele ukuti: “Pali Cibili icungulo bushiku, lintu twalongene ubushiku bwa kubalilapo fye, icikafya umwela calekele ukubomba. Pa nse palitalele nga nshi, kabili mu kati mwatalele amadigri 5 Celsius. Bamunyina baikele ninshi nabafwala amajaketi, ifitambala, amakalapushi, ifisote, ne nsapato shikafya amakasa. Tapali abalekupukula Baibolo, apantu te kuti bakupukule amabula. Naiminine pa cisebele muli suti wandi ninshi ndetutuma nga nshi ku mpepo, kabili cila nshita nalanda, nalemona umwela ulefuma mu kanwa. Lelo icansansamwishe ca kuti tapali uwailishenye. Bonse bamunyina balelanda pa lwa fintu caweme ukusangwa ku kulongana!” Bamunyina balya tabaletontonkanya na pa kupuswa kulya kulongana!
3 Bushe E Fyo Tuyumfwa? Bushe tulakatamika ishuko lya kulongana cila mulungu mu buntungwa? Nelyo bushe tatupoosako amano ku kulongana lintu imibele ili bwino? Ukulongana lyonse te kuti kwanguke, kabili kuti kwaba inshita shimo lintu tukwete umulandu wine wine uwa kukanasangilwapo ku kulongana. Nangu cibe fyo, twilaba ukuti kwaliba bamo pali ifwe abo te mulandu no kukota, ukulwalilila, ubulema, incito ibasendela sana inshita, ne milimo imbi abamona ubucindami bwa kulongana kabili lyonse balasangwako. We fya kumwenako busuma fintu twingapashanya!—Linganyeniko Luka 2:37.
4 Natulenge ukutungilila ukupepa kwa cine ukuba umwata wesu ukupitila mu kulongana kwa Bwina Kristu lyonse, ukutendekela mu kusangwa kwi sambililo lya citabo ukufika fye na kwi bungano likalamba. Mulandu nshi tulingile ukukatamikila ukusangwa kuli uku kulongana? Ni pa mulandu wa kuti lyaba likambisho lya bulesa ukuti tulelongana capamo. Lelo kwaliba imilandu imbi iyacindama. Bonse tukabila ubunonshi bwa kusambilisha kwa bulesa no bwafwilisho bwa mupashi wa mushilo, ifintu tupokelela ku kulongana. (Mat. 18:20) Tulakuulililwa ukupitila mu kukoseleshanya lintu tulebishanya na bamunyinefwe.—Heb. 10:24, 25.
5 Pa kwaluka kwa kwa Yesu, Petro asosele ukuti, “Mwe Cibinda, cawama ifwe ukuba pano.” (Luka 9:33) E fyo tufwile ukuyumfwa pa lwa kulongana kwa Bwina Kristu konse. Cine cine, ukulongana lyonse kwaliwama!