Ukusangwa ku Kulongana—Cishingamo Cakakala

¹ Ni shani wakatamika ukusangwa ku kulongana? Ico cili cipusho ca kufwailisha, bushe te ifyo? Ukwabulo kutwishika ubwingi bwa ifwe tuyumfwa ukuti tulatesekesha ukulongana. Nangu cibe fyo, amalipoti yalangisha ukuti ukusangwa ku kulongana mu filonganino ifingi kwalibwelela pa nshi mu nshiku sha nomba line. Cinshi cingalenga? Bushe bamo aba ifwe tulesuminisha incito ya ku calo iingasengaukwa, ukunaka, umulimo wa ku sukulu uwa kubombela ku ŋanda, ukulwala kunono, nelyo imiceele yabipa panono ukucilima ukukakililwako kwesu ukwa kusangwa ku kulongana lyonse? (Amala. 31:12) Apantu ici caba icifwaikwa ca mu Malembo, uuli onse uwa ifwe alingile ukulanguluka mu kubamo ipepo icipusho ca kuti, Ni shani fintu nakatamika ukusangwa ku kulongana?

² Bamo aba bamunyinefwe benda amaawala ayengi mu misebo ya lukungu no kwabuka imimana yaisulamo iŋwena pa kuti bengasangwa ku kulongana. Mu cilonganino cenu mwine, kuti limbi kwabako aba busumino abo “abashipuswa” te mulandu ne mpika sha butuntulu bwa bumi ishatapata, ubulema, ukufulisha kwa ncito uko kuntu babomba, nelyo umulimo wa ku sukulu uufwaya inshita iikalamba. (Luka 2:37, NW) Mulandu nshi bacitila ukubombesha pa kuti bengasangwako? Pantu balishiba ifyo te kuti babombe no kusonsomba kwa ici calo caisulamo ukutitikisha mu maka yabo. Bafwile ukushintilila pa maka ayo Lesa apayanya.—2 Kor. 12:9, 10.

³ Ilelo tukonka icipasho caimikwe na Bena Kristu ba mu kubangilila, abalekumana lyonse ku kupepa, ukwakana ifya kukumanya, no kusambilila Icebo ca kwa Lesa. (Imil. 4:23-30; 11:4-18; Kol. 4:16) Tulapokelela ukufunda pa lwa masesemo ya Baibolo ne cifundisho, pamo pene na pa lwa myendele ya bukapepa ne mibele ya Bwina Kristu, capamo no kukonkomesha kwa pa nshita yalinga pa kuwamyako ubumi bwesu nomba ukupitila mu kubomfya mu kusakamanisha ifishinte fya mu Baibolo. (1 Tim. 4:8) Mu kulundapo, tulacinkulwako ulwe subilo lyesu ilya kuti kasuba kamo kukabako impela ku mpika no kucula. Caliba icakatama ukuti ili isubilo lisungwe ilyumi.—Heb. 6:19.

⁴ Bushe ulupwa lobe lwakatamika shani ukusangwa ku kulongana? Bushe kwaba lubali lwa kutantika kwenu pamo ngo kulye ca kulya nelyo ukuya ku ncito? Pa nshiku sha kulongana, bushe muisanga mwe bene mulepaashanya nampo nga muli no kusangwako atemwa iyo, nelyo bushe ukubishanya kwa lyonse na bamunyinenwe cintu mwingalasapo fye nga mulefwaya mu ŋanda mu mwenu? Bakasabankanya abengi balebukisha ica kumwenako ca bafyashi babo baipeela lintu balekula. “Icintu cimo pa lwa kwa Tata,” e fibukisha eluda umo mu kufuluka, “cali ca kuti lyonse aleshininkisha ifyo ulupwa lwaleya ku kulongana. Nga ca kuti umo alilwele, umo uwa ifwe aali no kushala pa ŋanda na wene, lelo abashala baleya ku kulongana!”

⁵ Mu kukonkana kuleisa ukwa Ubutumikishi Bwesu Ubwa Bufumu, tukalalanshanya pa bucindami bwa kulongana kwa cilonganino kumo na kumo mu kuba ne cilolwa ca kwaafwa ukukuula ukutesekesha kuli uku kupayanya kwa ku mupashi. Nga ca kuti ukusangwa kobe ku kulongana kuti kwacilapo ukuba ukwa lyonse, tuli abashininkisha ukuti ifipande fikakwaafwa ukwiluka cintu ulepuswa. Fikasanshamo ifya kucinkulako fya kwaafwa kuli abo abatungulula ukulongana, pamo pene ne mitubululo iyo ifwe bonse twingabomfya lintu tulepekanishisha ukulongana no kwakanamo. Mulandu nshi te kwikalila pa nshi ngo lupwa no kukwata ukulanguluka kwabamo ipepo mu cibelesho cenu ica kusangwa ku kulongana? Lyene citeni ukuteulula ukuli konse ukwakabilwa mu kutantika kwenu. Ukusangwa ku kulongana ukwa lyonse lwaba lubali lwakatama ulwa masomo ya teokratiki kabili kulingile ukusendwa mu kukatama mu cine cine.