Angweni ku Kusangwa ku Kulongana Lyonse
1 Indupwa sha Bwina Kristu shalyangwa nga nshi ku kusangwa ku kulongana lyonse. Lelo ifikabilwa mu bumi muno nshiku, kuti fyalenga amafya. Bushe imilimo ya pa ng’anda, incito ya ku mubili, nelyo isukulu liletonawila inshita iyo tufwile ukubomfya mu kupepa Yehova? Ukumona ifintu mu nshila Yehova afimwena kukatwafwa ukwangwa ukusangwa ku kulongana.—1 Sam. 24:6; 26:11.
2 Umwaume umo umwina Israele ku mufulo akeene ukumwena ifintu mu nshila Yehova afimwena ilyo aile mu kuteeba inkuni pe Sabata. Nalimo ena aletontonkanya ukuti cali fye bwino pantu alesakamana ulupwa lwakwe nelyo atontonkenye ukuti tawali mulandu ukalamba. Lelo, ubupingushi Yehova apeele, bwalangilile ukuti ukucita ifintu fimbi mu nshita iyo tufwile ukubomfya mu kumupepa, mulandu uukalamba nga nshi.—Impe. 15:32-36.
3 Ifya Kupwisha ubu Bwafya: Abengi cilabakosela pa kuti balesangwa ku kulongana ukwabula ukupumfyanishiwa ne ncito ya ku mubili. Pa kupwisha ubu bwafya bamo balilanda na bakalamba ba ncito, baleeba abanabo ukubabombelako icipani cabo e lyo nabo babomba ica banabo, balifwaya incito iyalinga, nelyo ukwangushako fye imikalile yabo. Ukwabula no kutwishika, amalambo ya musango yu ayapeelwa ku kupepa kwa cine e yateemuna Lesa.—Heb. 13:16.
4 Nangu fye lisukulu kuti lyalenga ubu bwafya. Umwaice umo atile: “Mbelenga ifya ku sukulu ilyo nshilaya ku kulongana, lyene ifishalako njisa mu kubelenga ilyo nabwela ku kulongana.” Nga ca kuti umwana teti apwishe imilimo bamupeele ku sukulu pa bushiku ilyo kuba ukulongana, abafyashi bamo balondolwela bakafundisha ukuti ulupwa lwabo lwa lyangwa nga nshi ku kulongana kwa Bwina Kristu.
5 Ukubombela pamo no kuteyanya bwino e kwingalenga ulupwa lonse ukupwisha imilimo ya pa ng’anda pa kuti bonse tabacelelwe ku kulongana. (Amapi. 20:18) Nangu fye bana abanono kuti mwabasambilisha ukulaipekanya inshita ya kuya ku kulongana nga yapalama. Ifyo abafyashi bacita kuti fyasambilisha abana ukuti ukulongana kwalicindama nga nshi.—Amapi. 20:7.
6 Apo amafya aya bwikashi buno yalekulilako, calicindama ukuti tulesangwa ku kulongana lyonse. Shi natutwalilile ukumona ifintu nge fyo Yehova afimona no kwangwa ukusangwa ku kulongana.—Heb. 10:24, 25.