Umukululo wa Fipusho

◼ Ni kuli finshi abafyashi balingile ukupempwila lintu abana babo abanono baleshimikila mu mulimo wa mwi bala?

Abafyashi Abena Kristu balacita bwino ukuya na bana mu butumikishi bwa mwi bala, ukubakansha ukushimikila imbila nsuma ya Bufumu kuli bambi. Pa kucite fyo, balingile ukulasopa abana babo pa mulandu wa masanso ayengabako mu cifulo ca kubombelamo, nangu fye ni mu ncende ishimoneka isha “mutende.” Abana abengi balasanswa no kucendwa pa mulandu wa kufulilako kwa bufunushi na bucisenene muli shino “nshita ishayafya” tuleikalamo. (2 Tim. 3:1-5) Abafyashi balingile ukupempwila ku kucingilila abana abanono ku bantu abengabasansa. Kuti babacingilila shani?

Mano mano Baibolo ilatufunda ukuba abacenjela no kumwena libela amasanso ayengabako. (Amapi. 22:3; Mat. 10:16) Pano tatulepampamika amafunde, lelo kuti cawama umufyashi nelyo umukalamba umbi ukubombela pamo no mwana mu mulimo wa mwi bala. Nga bakasabankanya babili abakulileko balebombela pamo, kuti cawama umufyashi nelyo umukalamba umbi ukuba lwa mupepi na bo lyonse. Kwena, ilintu umwana alekulilako no kutendeka ukulaipingwila, abafyashi kuti bapingulapo nga ca kuti alekabila ukulasopwa panono.—Moneni no Mukululo wa Fipusho mu Ubutumikishi Bwesu Ubwa Bufumu ubwa October 1992.

Na kabili cisuma lyonse ukulapempwila ku masanso ilyo muleenda muli bamotoka na lintu muleenda ne nkasa. Ukukonka amafunde ilingi line kulacincintila amasanso no bulanda ubufumamo, tamwingonaula indalama ku fipatala, kabili tamwingapeelwe milandu ku bantu ba muli cino calo abatemenwe ukubutukila ku filye.

Abacaice balingile ‘ukutashe shina lya kwa Yehova.’ (Amalu. 148:12, 13) Ifyebo fyabo ifya kunashanasha ne mibele isuma balanga mu butumikishi bwa mwi bala filatemuna bambi no kuletela Yehova umucinshi. E ico, mwe bafyashi bombesheni ukwafwilisha abana benu ukubilisha imbila nsuma lyonse kabili muleba abapempwila lyonse ku kubacingilila ku masanso ayengabaponena!