Katamikeni nga Nshi Ishina Ilyayemba Ilya kwa Yehova
1 Satana aliseebenye ishina lya kwa Lesa lintu alengele abafyashi besu ba kubalilapo ukubembuka. Kaseebanya mu manshoko alandile ukuti Yehova alibepele Adamu. (Ukute. 3:1-5) Apantu ishina lya bulesa lyalyampana na maka ya kwa Lesa aya kufikilisha icebo cakwe, ifyo Satana alandile fyali fya museebanya uwabipisha. Ukupitila mu kufikilisha panono panono imifwaile yakwe iya bulesa, Yehova alifumyapo umuseebanya pe shina lyakwe no kuliyemfya.—Esa. 63:12-14.
2 Tuli bantu abo Yehova ‘ainika ishina lyakwe.’ (Imil. 15:14, 17) Ici citupeela ishuko lya kulanga fintu tuyumfwa pa lwa kushishiwa kwa liko. Twalisange shina lya kwa Yehova ukuba ilyayemba icine cine, apantu limininako icintu conse icisuma, ica cikuuku, ica kutemwa, ica nkumbu, kabili icalungama. Ubukulu bwe shina lya bukata ilya kwa Lesa bulatutiinya. (Amalu. 8:1; 99:3; 148:13) Cinshi ici cilingile ukutulenga ukucita?
3 Shisheni Ishina lya kwa Lesa: Kale kale ishina lya kwa Lesa lyalishilisha. Lelo ukupitila mu myendele yesu iyasanguluka no kushimikila pa lwa Bufumu, kuti twalangisho kuti twalikatamika nga nshi ishina lya kwa Lesa. Natubilishe atuti: “Tooteleni Yehova, lilileni kwi shina lyakwe, lengeni abantu na bantu ukwishibe milimo yakwe, lengeni ukwibukisho kuti ishina lyakwe lyalisansuka.” (Esa. 12:4) Ni shani twingacite ci?
4 Kuti twabomfya bwino inshita yonse ku kubilishe shina lya kwa Yehova na fyonse fintu limininako. Nampo nga tulecito bunte ubwatantikwa nelyo ubwa mu lyashi, ku ng’anda ne ng’anda nelyo mu mashitolo, mu musebo, nelyo pali lamya, umulimo wesu uwa kushimikila ulacindika Yehova. Lintu twasanga abalefwaya ukusambilila icine abakutika, tulingile ukubwelelako no kubasambilisha ifingi pa lwa kwa Yehova. Ico cilepilibulo kuti tufwile ukufikilisha ifipangano fya nshita no kutwalilila ukutukuta mu kutendeka amasambililo ya Baibolo aya mu ng’anda. Ku ca nsansa, cila mwaka abengi baleshiba, ukucindika, no kushishe shina ilyayemba ilya kwa Yehova.
5 Ukuibimbamo kwesu no mutima onse mu mulimo wa kushishe shina lya kwa Lesa ukwabulo kutwishika kulangisha pantu twaiminina pa mulandu untu Satana aimishe mu Edene. Uyu e mulimo uukankaala nga nshi kabili uwa mucinshi untu twingabombako. Shi natukatamike nga nshi no kulumbanya mu kupimpa ishina ilyayemba ilya kwa Yehova!—1 Imila. 29:13.