Ukushimikila Kulatupaatulako
1 Abantu abengi bepusha ukuti: “Mulandu nshi Inte sha kwa Yehova shapusanina ku mipepele imbi?” Kuti mwaasuka shani? Londololeni fintu twasuminamo ifyaba mu Baibolo. Bushe Mwalitala amulanguluka pa fyo umulimo wa kushimikila ku uuli onse utupaatulako ku mipepele imbi?—Mat. 24:14; 28:19, 20.
2 Pali ndakai, abantu ba ncepela fye e bafwaya ukushimikilako bambi fintu basuminamo. Batontonkanye fyo ukumfwila amafunde ya kwa Kaisare, ukukwata imibele isuma, atemwa ukuba bwino kuli bambi e fifwaikwa epela. E co tabatontonkanya ukuti waba mulimo wabo ukwaafwa bambi ukusambilila fintu Baibolo isosa pa lwa kupusuka. Twapusanako shani?
3 Ukupimpa kwesu mu kushimikila imbila nsuma kwalipusana sana ku mitukuto ya mipepele imbi. Ukucila pa myaka 100, Inte sha kwa Yehova isha pali ndakai shalishimikila imbila nsuma mu calo conse, ukupala Abena Kristu ba kubalilapo. Umulandu tucitile fyo kwaafwa abantu abengi nga nshi ukwalula imibele yabo pa kuti yumfwane na fintu Lesa afwaya.—1 Tim. 2:4; 2 Pet. 3:9.
4 Bushe Mwaishibikwa Shani? Bushe abantu bamwishiba nga bakashimikila bapimpa aba Cebo ca kwa Lesa? (Imil. 17:2, 3; 18:25) Apo mulashimikila, bushe abena mupalamano benu balaimwena abene ukuti imipepele yabo yalipusana ne yenu? Bushe bamwishiba ngo muntu uufwaya ukushimikilako bambi isubilo lyakwe? Bushe mwalitantika ukulabombako ubutumikishi lyonse? Ibukisheni ukuti te shina lyeka fye litupaatulako kuli bambi lelo no kucita ifyo ili line shina lipilibula—ukubelako Yehova ubunte.—Esa. 43:10.
5 Ukutemwa Lesa no muntu munensu e kutulenga ukubombako umulimo wa kushimikila. (Mat. 22:37-39) Ukupala Yesu na bakonshi bakwe, tulafwaisha ukushimikila kuli bambi pa lwa Bufumu konse kuntu twingaba. Shi natutwalilile ukuba abapimpa mu kushimikila imbila nsuma kuli bonse abalefwaya ukumfwa. Nga twacite fyo, tukaafwa aba mitima ya bufumacumi ‘ukumona apalekanina . . . uubombela Lesa no ushimubombela.’—Mal. 3:18.