Nani Engasumina Ukusambilila Baibolo?

¹ Kasesema Amose asobele ukuti mu Israele mwali no kuba insala, “te nsala ya cilyo kabili te cilaka ca menshi, lelo ica kuumfwe cebo ca kwa Yehova.” (Amose 8:11) Pa kuti abali ne nsala ne cilaka ca ku mupashi banonkelemo, ukuteyanya kwa kwa Yehova kulasabankanya impapulo ishingi ishashimpwa pali Baibolo mu calo conse.

² Ukufika pali ino nshita, twalipulinta ifitabo fya Ukwishiba ukufika ku mamilioni 70 na mabroshuwa ya Cintu Lesa Afwaya amamilioni 91. Tulatasha pa fyo ishi mpapulo shabe shayanguka kabili ishaumfwika mu kusambilishe cine. Nangu cibe fyo, abantu abengi abakwate mpapulo shesu tabalati basambilile Baibolo na ifwe. Cinshi tufwile ukucita pali ici?

³ Onse uo Tushalikako Impapulo Kuti abo Musambi! Langulukeni pa ca kukumanya ca kwa kasabankanya uwatambike isambililo ku mwanakashi pa muku wa kubalilapo ukulanshanya nankwe pa mwinshi. Umwanakashi alisumine ukusambilila apo pene. Mu kuya kwa nshita, uyu mwanakashi aebele kasabankanya ukuti: “Ni mwe fye mweka mwaipeelesha ukusambilila Baibolo na ine.” Ni banga, mu cifulo cenu ica kubombelamo abakwata kale impapulo shesu kabili abengalanda cimo cine? Conse cintu mwashalika cikamulenga ukubwelelako no kutendeka isambililo lya Baibolo.

⁴ Apo ilingi line tulasanga abantu abakwata impapulo shesu, ni shani fintu twingabaafwa ukuti bengatemwa ifyaba mu mpapulo shesu? Nte umo mu kulungatika aipwishe mwine ng’anda nga ca kuti alikweteko amepusho ya mu Baibolo ayali yonse, lelo uyu mwine ng’anda ayaswike ati: “Awe.” Nkashi alipampaminepo fye ukuti, “Nangu cibe shani amepusho yena namukwata.” Alipwishe, kabili ne sambililo lyalitendeke. Mulandu nshi tamwingepushisha mwine ng’anda nga kuti atemwa ukwishiba fintu Baibolo ilandapo pa cipusho cakwe atemwa ilyashi lyonse ilimukumine? Ipekanyeni ukwipusha icipusho ca kumulenga ukwankulako nga ca kuti takwete cintu aletontonkanyapo. Ukulanshanya kwa musango yu kupayanya intendekelo ye sambililo lya lyonse ilya fisambilisho fya mu Baibolo ifya kutendekelako.

⁵ Ukusambilisha Baibolo e mutima wa mulimo wesu. Apo tatwishiba uwingasumina ukusambilila, tufwile ukutambika lyene ku uli onse uo twakumanya. Lombeni Yehova mwi pepo, kabili bombeni ukulingana na mapepo yenu. Mukamona ukuti lintu mwatambika isambililo ku muntu akapokelela!—1 Yoh. 5:14, 15.