Amasambililo ya Baibolo Na Yambi Yalefwaikwa
1 Yehova Lesa alepaala ukuteyanya kwakwe ukwa pe sonde mu kuba no kulunduluka kwatwalilila. Umwaka wa mulimo uwapwile, ababatishiwe mwi sonde lyonse bali 375,923—avareji wa basambi abapya ukucila pali 1,000 mu bushiku bumo, nelyo mupepi na 43 mwi awala limo! Te mulandu na makumi ya myaka ya bucushi ubo bamunyinefwe bakumanya mu fyalo fyalekanalekana, umulimo wa Bufumu ulelunduluka kabili kuli ukwingilishiwako kukalamba. Fintu caba ica kucincimusha ukubelenga ifyo ukusalanganya imbila nsuma kulelunduluka!
2 Mu mwaka wa mulimo uwapwile, mwi bala lya Zambia na mo mwali ukwingilishiwako muli avareji wa mpendwa ya bakasabankanya na bapainiya ba kwafwilisha, mu maawala yapooselwe ku kushimikila, na mu mpendwa ya tutabo, babroshuwa, na bamagazini ifyashalikwe. Kwali ukwingilishiwako mu basangilweko ku Cibukisho, mu fipempu fya kubwelelamo na mu masambililo ya Baibolo. Twakwete ukwingilishiwako kwa maperesenti yabili mu masambililo ya Baibolo. Nangu ni fyo, abengi pali aba basambi ba Baibolo tabalunduluka ukulola ku lubatisho. Nangu cingati amasambililo ya Baibolo 110,960 yalitungulwilwe, ababatishiwe bali fye 5,281.
3 Kosheni Ukufwaisha kwa Kutungulula Isambililo: Ifwe pa lwesu tukabila ukutontomesha pa kuba abakosa kabili abacincila lwa ku mupashi. Abakonshi ba cine aba kwa Kristu baba “abacincilile milimo isuma.” (Tito 2:14) Lintu twapituluka mu butumikishi bwesu, bushe kuti twatila twalipimpa sana mu kubwelelako kuntu twashalike impapulo mwi bala? Bushe twalipimpa mu kutambika amasambililo ya Baibolo kuli bonse abalefwaya ukwishibe cine? (Rom. 12:11) Nelyo bushe tulekabila ukulundulula ukufwaisha kukalamba ku kucita ifipempu fya kubwelelamo no kutendeka amasambililo ya Baibolo?
4 Ukubelenga Baibolo pa lwesu, ukusangwako lyonse ku kulongana, no kusambilile mpapulo fikatulengo kuba abacincila lwa ku mupashi no kuba abakoshiwa ku mupashi wa kwa Lesa. (Efes. 3:16-19) Ici cikakosha icitetekelo cesu no kucetekela kwesu muli Yehova no kutulenga ukutemwa abantu banensu. Cikalenga ukuti tukalesambilisha icine kuli bambi, muli fyo ubutumikishi bwesu bukawama, bukatunguluka, no kuba ubwa kucincimusha. Ee, tulingile ukufwaya amasambililo ya Baibolo na yambi!
5 Intanshi Sambilileni no Lupwa Lwenu: Abafyashi Abena Kristu abakwata abana pa ng’anda balingile ukwangwako kuli programu wabo uwe sambililo lya Baibolo ilya lupwa ilya lyonse. (Amala. 31:12; Amalu. 148:12, 13; Amapi. 22:6) Kuti caba ica kunonsha nga nshi ku bafyashi ukusambilila na bana babo muli broshuwa wa Cintu Lesa Afwaya lyene ukwalukila ku citabo ca Ukwishiba ku kubapangasha ku kuba bakasabankanya bashabatishiwa, ukuipeela no kubatishiwa. Kwena, ifyebo fyalundwako kuti fyalangulukwa, ukulingana no kukabila e lyo no mushinku wa mwana. Umufyashi uulesambilila no mwana uushabatishiwa kuti apenda isambililo, inshita, ne fipempu fya kubwelelamo, nga fintu calangililwa mu Umukululo wa Fipusho uwa Ubutumikishi Bwesu Ubwa Bufumu ubwa April 1987.
6 Wamyeniko Imibombele Yenu: Nga twamona impendwa ya bamagazini, babroshuwa, ne fitabo fyashalikwe, te ca kutwishika ukuti imbuto ishingi shiletandwa. Ishi mbuto sha cine ishabyalwa shalikwatisha amaka ya kupanga abasambi abapya. Bushe umulimi kuti aikushiwa mu cine cine nga alitwalilile ukubyala kabili pa numa ya kubombesha, akaana ukusombola ifilimwa? Awe nakalya. Mu kupalako, ukuya mu fipempu fya kubwelelamo kulakabilwa.
7 Bushe lyonse mulatantika inshita ya kuya mu fipempu fya kubwelelamo? Bweleleniko mu kwangufyanya kuli bonse abalefwaya ukwishibe cine. Citeni ifipempu fya kubwelelamo mu kuba no buyo bwa kutendeke sambililo lya Baibolo. Bushe mulasunga ubusaka icalembwa ca fipempu fya kubwelelamo, ico mulembamo lyonse, kabili icatantikwa bwino? Mufwile ukulemba ubushiku bwa kubalilapo mwaileko, pamo ne shina na keyala ifya kwa mwine ng’anda, ifyo mwashalike, mu kusupawila ifyo mwalanshenye, e lyo ne cishinka mukalandapo pa muku ukakonkapo. Mu calembwa cenu sheniko incende iya kulembapo ifyebo fyalundwako lyonse ilyo mwacita icipempu ca kubwelelamo.
8 Bebeteni Ifya Kucita Icipempu ca Kubwelelamo: Fishinka nshi ifyo mulingile ukwibukisha lintu mulecita icipempu ca kubwelelamo ku ulefwaya ukwishibe cine? (1) Beni aba nsansa, aba bucibusa, abacincimuka, no kulanda mu nshila yayanguka. (2) Lanshanyeni imilandu afwaya ukwishiba nelyo ukwasuka ifipusho akwata. (3) Landeni ifyayanguka kabili ifya mu Amalembo. (4) Lyonse ilyo mwatandalila mwine ng’anda, esheniko ukumusambilisha icintu ico akatamika. (5) Mushileni umundowendowe wa lyashi mukalanshanyapo umuku ukakonkapo. (6) Mwilakokola. (7) Mwilaipusha ifipusho ifya kukalifya mwine ng’anda nelyo ifya kumwesha. (8) Bomfyeni umucetekanya pa kuti mwisenuka imimwene yalubana nelyo imisango yabipa iya kwa mwine ng’anda ilyo ashilatesekesha ifya ku mupashi.—Moneni ica mu kati ica Ubutumikishi Bwesu Ubwa Bufumu ubwa May 1997 ku bwafwilisho bwalundwako pa fyo mwingatunguluka mu kucita ifipempu fya kubwelelamo no kutendeka amasambililo ya Baibolo.
9 Bomfyeni Inshila Shonse Ishingabomba: Mu cilonganino cimo, balitungulwike ukulemba amashina na manambala ya mayanda ya bekashi ba mu cikuulwa icilondwa sana. Kalata alituminwe ku mwikashi umo na umo, na matrakiti yabili yalibikilwemo. Ku nsondwelelo ya kalata, isambililo lya Baibolo ilya mu ng’anda lyalitambikwe kabili inambala ya foni yalilembelwepo pa kuti uwapokelela kalata engasuka. Mu nshiku fye ishinono, umulumendo alitumine foni ukulombe sambililo. Ubushiku bwakonkelepo icipempu ca kubwelelamo calicitilwe, ne sambililo lyalitendekwe mu citabo ca Ukwishiba. Mu cungulo bushiku cilya cine alisangilwe kwi Sambililo lya Citabo pa Cilonganino, kabili alitwalilile ukusangwa ku kulongana konse. Tapakokwele, atendeke ukubelenga Baibolo cila bushiku no kutwalilila ukulunduluka ukulola ku lubatisho.
10 Bakasabankanya mwi bumba limo batantike ukuya mu fipempu fya kubwelelamo capamo. Lintu nkashi umo aile kuli cimo ica fipempu fyakwe, umuntu akonkele taalipo pa ng’anda, lelo umukashana umbi aliswile icibi, no kusoso kuti: “Nacilamulolela.” Ku numa, uyu mwine ng’anda alipokeleele icitabo ca Ukwishiba ukufuma ku munankwe. Ilyo bankashi baishile pa mwakwe, aali napwisho kubelenga icitabo conse imiku ibili kabili ifyebo ifyalimo alifitemenwe icibi. Alandile ukuti taapapushiwe lintu baNte bamutandalile pali ubo bushiku pantu alepepelo kuti bakesesambilila Baibolo nankwe. Isambililo lya Baibolo lyalitendekwe, atendeke ukusangwa ku kulongana, kabili alilundulwike bwangu.
11 Pali nomba line, nkashi umo uwabatishiwa mupepi ne myaka 25, aapeele banyina icitabo ca Ukwishiba. Banyina, abalepepa kwi calici limo fi, batendeke ukubelenga ico citabo. Ilyo bapwile ukubelenge fipandwa fibili, baitile umwana wabo umwanakashi, kabili alipapile lintu batile: “Ndefwayo kuba umo uwa Nte sha kwa Yehova!” Banyina batendeke ukusambilila kabili nomba balibatishiwa.
12 Esheniko Iyi Mitubululo: Bushe mwalitala amubomfyapo inshila ya kulungatika ku kutendeka amasambililo? Kuti mwalanda fye amuti: “Nga mwingatemwa isambililo lya Baibolo ilya mu ng’anda ilya pa fye, mu maminiti fye ayanono nalamulanga ifyo licitwa. Nga mwalitemwa, kuti mwatwalilila.” Abengi tabashingashinga ukusumina nga mwalanda muli uyu musango, kabili balaiteyanya ukumonako ifyo isambililo lya Baibolo litungululwa.
13 Ilyo mwatendeka isambililo, langeni umusambi ifya kupekanishisha libela ukupitila mu kubelenga amalembo yaloshiweko ne fya kushila ifyasuko ku fipusho fyapulintwa. Tontomesheni pa fishinka fikalamba epela. Nangu cingati mu masambililo ya kubalilapo tukakabila ukuba abateuluka, calicindama ukutungulula isambililo lya Baibolo lyonse. Tontonkanyeni pa fyo mwingalangilila fintu ipepo lyaba lubali lwacindama ulwe sambililo ne fyo mwingabomfya Amalembo ku kupangasha umusambi ukulolenkana no kukaanya. Shi bombesheni ku kuwamye sambililo!
14 Nalyo line, ukulunduluka kwa basambi ba Baibolo takupalana. Bamo tabakampuka lwa ku mupashi nge fyo bambi baba nelyo ukumfwikisha bwangu ifilesambilishiwa. Bambi baba abapamfiwa sana kabili tabakwata inshita ya kupwisha icipandwa conse cila mulungu. E ico, limo limo kuti bakabila ukusambilila nalimo imiku ibili pa kuti bapwishe ifipandwa fimo no kusambilila imyeshi yalundwako ku kupwisha icitabo. Inshita shimo kuti twasambilila broshuwa wa Cintu Lesa Afwaya intanshi e lyo no kwalukila ku citabo ca Ukwishiba. Ukucite ifi, ukubikako no kusangwa ku kulongana kwa cilonganino, kukaafwa umusambi umo na umo ukukwata intendekelo yakosa mu cine.
15 Pali fyonse, pepeleni isambililo lya Baibolo! (1 Yoh. 3:22) Ukubomfiwa na Yehova ku kwafwilisha umo ukubo musambi wa kwa Yesu Kristu caba ni cimo ica fya kukumanya fyacilapo ukulambula ku Mwina Kristu. (Imil. 20:35; 1 Kor. 3:6-9; 1 Tes. 2:8) Ino nomba e nshita ya kupimpa sana mu mulimo wa kusambilisha Baibolo, no kucetekela sana ukuti Yehova akatupaala nga nshi mu kubombesha kwesu ukwa kutendeka amasambililo na yambi!
[Amashiwi pe bula 3]
Bushe mulapepela ukutendeka isambililo lya Baibolo ilipya?