Ukumona Ukulunduluka kwa Mulimo we Pamfya uwa Kupanga Abasambi

¹ Ilyo ashilafuma pe sonde, Yesu akambishe abakonshi bakwe ‘ukulenga aba nko shonse ukuba abasambi.’ Ici capindile ukushimikila sana no kusambilisha kabili ukutanununa umulimo wabo mwi sonde lyonse. (Mat. 28:19, 20; Imil.1:8) Bushe balemona uyu mulimo nge cisendo? Ukulingana no mutumwa Yohane te fyo cali. Pa numa ya kupanga abasambi pa myaka 65, alembele ukuti: “Pantu uku e kutemwa Lesa, ukuti tunakile amafunde yakwe. Kabili amafunde yakwe tayayafisha.”—1 Yoh. 5:3.

² Ilyashi lyaba mu Malembo pa mulimo wa Bena Kristu ba mu kubangilila lishininkisha ukuti babombele umulimo wabo uwa kupanga abasambi ba kwa Yesu Kristu ne pamfya. (2 Tim. 4:1, 2) Bacitile ci te pa mulandu wa kuti wali mulimo bapeelwe, lelo pa mulandu wa kuti balefwaya ukulumbanya Lesa no kulenga bambi bakwate isubilo lye pusukilo. (Imil. 13:47-49) Mu mwanda wa myaka uwa kubalilapo, icilonganino ca Bwina Kristu calekula lubilo lubilo pa mulandu wa kuti bonse abaleba abasambi na bo bene balepanga abasambi.— Imil. 5:14; 6:7; 16:5.

³ Umulimo wa Kupanga Abasambi Watendeka Ukulunduluka Lubilo Lubilo: Umulimo wa kupanga abasambi uwakulisha ulecitwa mu mwanda wa myaka uwalenga 20! Iminshipendwa ya bantu balipokelela icine no kucikonka. (Luka 8:15) Apo impela ya buno bwikashi ilepalama lubilo lubilo, “umusha wa cishinka kabili uwashilimuka” alitupayanishisha ifisolobelo ifilenga abantu ba bufumacumi ukusambilila bwangu icine.—Mat. 24:45.

⁴ Mu 1995 twapokelele icitabo ca Ukwishiba Uko Kutungulula ku Mweo wa Muyayaya, kabili mu 1996 pakonkele broshuwa wa Cinshi Cintu Lesa Afwaya Kuli Ifwe? Pa lwa citabo ca Ukwishiba, Ulupungu lwa kwa Kalinda ulwa January 15, 1996, pe bula 14 lwatile: “Ici citabo ca mabula 192 mu kulinganyako kuti casambililwa mu nshita fye iipi, kabili abo ‘[mu bulungami abakongamina, NW] ku kuya mu mweo wa muyayaya’ balingile ukuba na maka ya kusambilila ifyalinga ica kuti kuti baipeela kuli Yehova no kubatishiwa.”—Imil. 13:48.

⁵ Ica mu kati ca Ubutumikishi Bwesu Ubwa Bufumu ubwa June 1996 caleti “Ifya Kupanga Abasambi pa Kubomfya Icitabo ca Ukwishiba,” catukoseleshe ukuti: “Ukushintilila pa mibele no kulamuka kwa musambi, kuti cacitikako ukupwisha ifipandwa ifingi mu fiputulwa fya nshita ifye awala fye limo nelyo ukucilapo, ukwabula ukukwankwanya fye. Abasambi bali no kulunduluka bwino nga ca kuti bonse babili kasambilisha no musambi balekonka icipangano caimikwa ica nshita ya kusambilila cila mulungu.” Icipande cakonkenyepo ukuti: “Cilingile ukwenekelwa ukuti ukufika pa nshita umuntu alepwisha ukusambilila icitabo ca Ukwishiba, ukufumaluka kwakwe no kushika kwa buseko bwa kubombela Lesa fikaba nafimonekesha.” Umukululo wa Fipusho mu Ubutumikishi Bwesu Ubwa Bufumu ubwa October 1996 walondolwele ukuti: “Cileenekelwa ukuti mu ciputulwa ca nshita icacepako, kasambilisha waswatuka akaba na maka ya kwafwilisha umusambi uwafumaluka ukunonka ukwishiba kwakumanina ukupingulapo mu kubamo mucetekanya ukubombela Yehova.”

⁶ Icitabo ca Ukwishiba Cilebomba: Ilyo umukashana umo alebatishiwa, alandile ifyo aletontonkanya ilyo alesambilila icitabo ca Ukwishiba. Pa nshita inono alesambilila mu citabo ca Kuti Waikala. Lintu icitabo ca Ukwishiba cafumine, nkashi walemutungulula isambililo atendeke ukubomfya icitabo cipya. Mu kwangufyanya, uyu musambi aishilemona ukuti alekabila ukupingulapo, kabili camwafwile ukulunduluka lubilo lubilo ukutula lilya line. Uyu mukashana uuli nomba ni nkashi yesu atila: “Icitabo ca Kuti Waikala cangafwile ukutemwa Yehova, lelo icitabo ca Ukwishiba cangafwile ukupingulapo ukumubombela.”

⁷ Moneni fintu umwanakashi na umbi asambilile icine bwangu. Pa numa ya kusambilila umuku wa cibili, asangilwe ku kulongana ku Ng’anda ya Bufumu lintu kwali kangalila wa muputule. Ulya mulungu, umuku wa butatu ukusambilila, aebele kangalila wa muputule ukuti aliipeele kuli Yehova no kuti alefwaya ukuba kasabankanya ushabatishiwa. Baeluda balimukumenye no kumusuminisha ukuba kasabankanya, kabili umulungu wakonkelepo atendeke ukuya mu mulimo wa mwi bala. Aishileobelwa sana ne sambililo lyakwe ilya Baibolo ica kuti apokele ulusa ku ncito pa kuti alesambilila imiku ibili nelyo itatu mu mulungu no kupoosa inshita yafulilako mu butumikishi. Limo, balesambilila ifipandwa fibili nelyo fitatu pa nshita imo. Atendeke ukubomfya ifyo alesambilila mu bumi bwakwe, ukupwisha ukusambilila icitabo ca Ukwishiba mu milungu ine, no kwisabatishiwa!

⁸ Umulume wa kwa nkashi umo ailondolola ukuti ali “mulume ushasumina umwine mwine.” Bushiku bumo, munyina amwipwishe nga engatemwa ukusambilila Baibolo mu citabo ca Ukwishiba no kumweba ukuti nga alefwaya kuti aleka ukusambilila pa numa ya kusambilila icipandwa ca kubalilapo nelyo ifyafulilako. Umulume wa kwa uyu nkashi alisumine ukweshako, nangu cingati tasomeshe ilyo ali ku sukulu kabili tasambililepo ifya mapepo ifili fyonse pa myaka ukucila pali 20. Ayankwileko shani ku kusambilila icitabo ca Ukwishiba? Atile: “Nalisekelele pa kusanga ukuti ici citabo ca kwaafwa ukusambilila Baibolo cali icayanguka ukumfwa. Ifyebo fyali ifyaumfwika kabili ifyalondoloka ica kuti mu kwangufyanya fye, natendeke ukulafuluka ukusambilila. Kafundisha wandi mano mano akonkele inshila sha kupangilamo abasambi ishalondololwa na Sosaite, kabili pa kwafwilishiwa no mupashi wa kwa Yehova, nalibatishiwe pa numa ya myeshi ine. Kuti natila nga twalundulula ukutemwa kwa kupanga abasambi, ukutwalilila ukufwaya abalefwaya ukwishiba icine mu butumikishi bwa mwi bala, ukubomfya icitabo ca Ukwishiba ne mpapulo shimbi ishafwilisha ukusambilila Baibolo isho Sosaite ipayanya ne cacindamisha, ukupepela ubutungulushi bwa kwa Yehova, kuti twakwata ishuko lyaibela ilya kwaafwa ukupanga abasambi.” Ifi fya kukumanya fyalondololwa pano tafyaseeka sana. Abasambi besu abengi tabesa mu cine bwangu umusango yu.

⁹ Ukulunduluka kwa Basambi Kulapusana: Tulingile ukusumina ukuti ukulamuka kwa bakafundisha na basambi aba Cebo ca kwa Lesa kuti kwapusana apakalamba. Umo kuti akula lwa ku mupashi lubilo lubilo nelyo panono panono. Abasambi bamo balalunduluka mu myeshi fye inono ukucila bambi. Amasomo ya muntu, ifyo atesekesha ifya ku mupashi, na fintu aipeelesha kuli Yehova filambukila ukulunduluka kwakwe ukwa ku mupashi. Te bonse abo tusambilisha ababa “no kucankwa konse” pa kusambilila Amalembo cila bushiku, nga fintu abena Berea ba pa kale abaishiletetekela balecita.—Imil. 17:11, 12.

¹⁰ E mulandu wine ica mu kati ca Ubutumikishi Bwesu Ubwa Bufumu ubwa August 1998 icitila “Amasambililo ya Baibolo Na Yambi Yalefwaikwa” citulangilila bwino ukuti: “Nalyo line, ukulunduluka kwa basambi ba Baibolo takupalana. Bamo tabakampuka lwa ku mupashi nge fyo bambi baba nelyo ukumfwikisha bwangu ifilesambilishiwa. Bambi baba abapamfiwa sana kabili tabakwata inshita ya kupwisha icipandwa conse cila mulungu. E ico, limo limo kuti bakabila ukusambilila nalimo imiku ibili pa kuti bapwishe ifipandwa fimo no kusambilila imyeshi yalundwako ku kupwisha icitabo.”

¹¹ Bakapanga ba Basambi Balingile Ukuba ne Mimwene Yalinga: Calicindama ukumona amaparagrafu umo engasambilila cila nshita ukulingana ne mibele no kulamuka kwa musambi. Apo tulekoseleshiwa ukutendeka amasambililo muli broshuwa wa Cintu Lesa Afwaya, kuti casenda imyeshi ibili ukufika na kuli itatu pa kuti tupwishe ilyo tushilatendeka ukumusambilisha mu citabo ca Ukwishiba. Nga ca kuti twabomfya imitubululo yonse iyalondololwa mu ca mu kati ca Ubutumikishi Bwesu Ubwa Bufumu ubwa June 1996, kuti casenda imyeshi 6 ukufika kuli 9 pa kupwisha icitabo ca Ukwishiba. Bamo abatendeka ukusambilila mu citabo ca Ukwishiba balatendeka broshuwa wa Cintu Lesa Afwaya ku kwaafwa umusambi ukusambilila bwangu ifishinka fya kutendekelako ifya mu Baibolo. Lyene balabwelela mu kusambilila icitabo ca Ukwishiba. Nga ca kuti mwatendeka ukusambilisha umo mu citabo ca Ukwishiba kabili alecita bwino, kuti cawama ukusambilila broshuwa wa Cintu Lesa Afwaya pa numa ya kupwisha icitabo, na muli fyo ukupitulukamo lubilo lubilo mu fishinka fya kutendekelako ifya Cebo ca kwa Lesa. Lelo, tatulefwaya umusambi elaumfwikisha ifyebo pa mulandu wa kufwaya ukupwisha bwangu. Umusambi uuli onse akabila icitendekelo cakosa ica citetekelo cipya ico asangile mu Cebo ca kwa Lesa.

¹² Pa mulandu wa nshita tulipo, ukwaafwa bambi ukusambilila icine waba mulimo we pamfya sana. Pa mbali ya kupepa lyonse ukuti tutendeke amasambililo ya Baibolo ayapya, natulepepelako abo tusambilisha. Lyene tukasekelela mu kutwalilila ukubatisha abasambi na bambi “ukufika na pa kupwa kwa nshita.”—Mat. 28:20.