“Ningeshiba Shani Kano Umuntu Antungulula?”
1 Lintu Filipi, kabila wa mbila nsuma aipwishe mutungwi umwina Etiopia nga naumfwa ifyo alebelenga mu Cebo ca kwa Lesa, ulya mwaume ayaswike ukuti: “Ningeshiba shani kano umuntu antungulula?” Mu nsansa, Filipi amwafwile ukumfwikisha imbila nsuma pali Yesu, icalengele no kuti uyo mwaume abatishiwe ilyo line. (Imil. 8:26-38) Filipi aleumfwila ifunde lya kwa Kristu ilya ‘kulenga aba nko shonse ukuba abasambi, ukubabatisha no kubasambilisha.’—Mat. 28:19, 20.
2 Tufwile ukumfwila ifunde lya kupanga abasambi, nga fintu fye Filipi acitile. Lelo, te lingi tumona abantu tusambilisha Baibolo ukulunduluka lwa ku mupashi lubilo lubilo nge fyo cali kuli ulya mutungwi umwina Etiopia. Ulya mwaume, umuYuda insangu uwaishibe Amalembo, akwete umutima wa cumfwila kabili alekabila fye ukupokelela Yesu nga Mesia walaiwe. Cintu cayafya nga ca kuti abo tusambilisha tabaishiba ifya mu Baibolo, nga balilufiwa ku fisambilisho fya bufi ifya mipepele, nelyo nga balifinininwa ku mafya ya pa lwabo. Cinshi cikatwafwa ukutungulula bwino abasambi ba Baibolo ku kuipeela no lubatisho?
3 Ishibeni Ifyo Umusambi wa Baibolo Alekabila lwa ku Mupashi: Ica mu kati ca Ubutumikishi Bwesu Ubwa Bufumu ubwa May 1999 calandile pa nshita twingabomfya mu kusambilisha abantu, muli broshuwa wa Cintu Lesa Afwaya na mu citabo ca Ukwishiba. Twalangililwe ukutila: “Calicindama ukumona amaparagrafu umo engasambilila cila nshita ukulingana ne mibele no kulamuka kwa musambi. . . . Tatulefwaya umusambi elaumfwikisha ifyebo pa mulandu wa kufwaya ukupwisha bwangu. Umusambi uuli onse akabila icitendekelo cakosa ica citetekelo cipya ico asangile mu Cebo ca kwa Lesa.” E co, caliwama ukukanasambilila lubilo lubilo mu citabo ca Ukwishiba pa mulandu wa kufwaya ukupwisha icitabo mu myeshi 6. Kuti pambi cakabila imyeshi ukucila pali 6 pa kwafwa abantu bamo ukulunduluka ukufika na ku lubatisho. Ilyo muletungulula isambililo umulungu no mulungu, mulebomfya inshita ingakabilwa ku kwafwa umusambi ukumfwikisha no kusumina ifyo alesambilila mu Cebo ca kwa Lesa. Limo limo, imilungu ibili nelyo itatu kuti yakabilwa pa kupwisha icipandwa cimo mu citabo ca Ukwishiba. Ici kuti camupeela inshita ya kubelenga no kulondolola bwino amalembo ayengi ayaloshiweko.—Rom. 12:2.
4 Lelo, ni shani nga ca kuti pa numa ya kupwisha icitabo ca Ukwishiba, mwamona ukuti ubwishibilo bwa cine ubwa musambi tabulafikapo nelyo ukuti talacincishiwa ukukonka icine no kuipeela kuli Lesa? (1 Kor. 14:20) Cinshi cimbi ico mwingacita ku kumutungulula ku nshila ya mweo wa muyayaya?—Mat. 7:14.
5 Ikusheni Ukukabila kwa ku Mupashi Ukwa Musambi wa Baibolo: Nga nacimoneka ukuti uyo muntu alelunduluka, nangu ca kuti alelunduluka panono panono, no kuti aleya aletesekesha ifyo alesambilila, lyene twalilileni isambililo lya Baibolo mu citabo ca cibili pa numa ya kupwisha broshuwa wa Cintu Lesa Afwaya ne citabo ca Ukwishiba. Ici te kuti cikabilwe lyonse, lelo lintu cilefwaikwa, twalilileni isambililo mu citabo ca [True Peace], icitabo ca Abaikatana, nelyo icitabo ca Baibolo—Cebo ca kwa Lesa Nelyo ca Muntu?. Bakasabankanya abengi balikwata ifi fitabo fya kubomfya nga ca kuti icilonganino tacikwete. Icitabo ca Icebo ca kwa Lesa Nelyo ca Muntu? e citabo fye ceka icingaordwa ku Brooklyn. Mulingile lyonse ukutampila ukutungulula isambililo muli broshuwa wa Cintu Lesa Afwaya ne citabo ca Ukwishiba. Isambililo lya Baibolo, ukubwelelamo kwacitwa, ne nshita yabomfiwa mu kusambilila filingilwe ukupendwa kabili mulingile ukulemba lipoti, nangu ca kuti umusambi abatishiwa ilyo ashilapwa icitabo ca bubili.
6 Bushe ici cilolele mu kuti ababatishiwe nomba line lelo abasambilile fye mu citabo cimo nomba balingile ukwafwiwa ukusambilila mu citabo ca bubili? Te sana. Lelo, napamo limbi balileka ukubomba nelyo limbi tabalunduluka mu cine, kabili kuti baumfwa ukuti balekabila ukwafwiwa pa kuti bengacilapo ukukonka icine mu bumi bwabo. Mulingile ukulanshanya na kangalila wa mulimo ilyo isambililo lishilabukululwa na kasabankanya wabatishiwa. Lelo, nga mwalishibako bamo abalesambilila kale mu citabo ca Ukwishiba lelo tabaalundulwike ukufika ku kuipeela no lubatisho, pambi kuti mwafwaya ukulanshanya na bo ukumona nga kuti batemwa ukubukulula isambililo lya Baibolo.
7 Ukupoosa amano ku muntu umo na umo ulesekelela uo tulesambilisha kwaba cishibilo ca kutemwa kwa Bwina Kristu. Ubuyo bwesu kwafwa umusambi ukushilimukilako mu kwishiba pa lwa cine ca mu Cebo ca kwa Lesa. Lyene pa kuba no bwishibilo kuti apingulapo ukwabula ukuitwishika ukukonka icine no kuipeela kuli Yehova, no kulangilila uko kuipeela ukupitila mu lubatisho lwa mu menshi.—Amalu. 40:8; Efes. 3:17-19.
8 Bushe muleibukisha icacitike lintu mutungwi umwina Etiopia abatishiwe? ‘Aile pa lwendo lwakwe alesekelela’ pa kuba umusambi mupya uwa kwa Yesu Kristu. (Imil. 8:39, 40) Shi ifwe na bo tutungulula ukutwala mu nshila ya cine tusange ubuseko bukalamba mu kubombela Yehova Lesa—nomba na ku ciyayaya!