Umukululo Wa Fipusho

◼ Nomba pa kuti natukwata icitabo ca Ukwishiba Uko Kutungulula ku Mweo wa Muyayaya, butali bwaba shani isambililo lya Baibolo ilya mu ŋanda lilingile ukutungululwa?

Ubutumikishi Bwesu Ubwa Bufumu ubwa September 1993 bwatubulwile ukuti isambililo lya Baibolo ilya mu ŋanda lilingile ukutwalilila na balesekelela abapya ukufikila ifitabo fibili fyasambililwa. Nomba pa kuti natukwata icitabo ca Ukwishiba, cilemoneka icisuma ukuteulula iyi nshila, nga fintu calondololwa pe bula 13 na 14 mu Ulupungu lwa kwa Kalinda ulwa January 15, 1996.

Icitabo ca Ukwishiba capekanishiwa ku kwaafwa “abasontelwe ku kuya mu mweo wa muyayaya” ukusambilila fintu balekabila ukwishiba pa kuti bengaipeela kuli Yehova no kubatishiwa. (Imil. 13:48) E ico, pa numa ya kupwishishisha ulu lupapulo lupya, tacili icakabilwa ukusambilila icitabo ca cibili no musambi umo wine. Ilyo abasambi benu aba Baibolo batendeka ukupokelela icine, kuti mwabakoselesha panono panono ukukumanisha ukwishiba kwabo pa kusangwa ku kulongana kwa Nte sha kwa Yehova capamo no kubelenga Baibolo ne mpapulo sha Bwina Kristu ishalekanalekana.

Nga ca kuti mwalibeleshanya ne fipusho pa mabula 175 ukufika ku 218 mu citabo ca Abateyanishiwa ku Kupwilikisha Ubutumikishi Bwesu, ici kuti cayafwa. Nangu cingati tamulingile ukulalosha kuli ifi fipusho nelyo ukufipitulukamo no musambi wa Baibolo, kuti caba icisuma ukukomaila pa fishinka mu citabo ca Ukwishiba ifyo fikalenga umusambi ukulumbulula ukumfwikisha kwalinga ukwa cine ca Baibolo ica kutendekelako lintu baeluda balepituluka mu fipusho no uleya ku lubatisho.

Takuli ukukabila kwa kongeshapo pa fyebo fyaba mu citabo ca Ukwishiba, ukuletamo ifyebo fishikumineko nelyo ifishinka fyalundwapo ku kwafwilisha ifisambilisho fya Baibolo nelyo ukusuusha ififundisho fya bufi. Ici kuti catanununa fye isambililo ukufika ku ciputulwa ca nshita icalepelako. Mu cifulo ca ico, cilesubilwa ukuti icitabo kuti capwishishiwa mu kwangufyanyako nga nshi, nakalimo mu myeshi mupepi na mutanda. Ici cileebekesha ukukabila kwa kuti ifwe tusambilile kabela ifyebo mu kufishapo pa kuti twingafilondolola mu kumfwika kabili mu kwipifya. Mu nshila imo ine umusambi alingile ukucincishiwa ukusambilila libela, ukubelenga amalembo yaloshiweko, no kutukusha ukwiluka fintu icitabo cilesambilisha mu kumfwika mu cipandwa cimo cimo.

Ulupungu lwa kwa Kalinda lwalikomaila pa kukabila kwa kuti Inte sha kwa Yehova baletungulula amasambililo ya Baibolo aya kufumamo cimo ayafulilako mu ciputulwa ca nshita icicepeleko. (Moneni Esaya 60:22.) Ukubomfya kwa kufumamo cimo ukwa citabo ca Ukwishiba kuti kwaafwa abapya ukunonka ukwishiba uko kutungulula ku mweo wa muyayaya no kubomba mu kumfwana na kwene.—Yoh. 17:3.