Umukululo wa Fipusho
◼ Butali bwaba shani isambililo lya Baibolo ilya lyonse lilingile ukutungululwa ku muntu mu citabo ca Ukwishiba?
Yehova alepaala ukuteyanya kwakwe ilelo. Tulamona ubushinino bwa ici cila mwaka ilyo amakana ya bapya baleiminina ku cine. Icitabo ca Ukwishiba cili cibombelo caluma mu kupwishishisha ici. Ulupungu lwa kwa Kalinda ulwa January 15, 1996 lwalondolwele ukuti ici citabo capekanishiwa ukwaafwa umusambi wa Baibolo ukulunduluka lwa ku mupashi mu kwangufyanyako, nakalimo ukufika ku kubatishiwa mu myeshi fye inono.
Pa mulandu wa ici, Ulupungu lwa kwa Kalinda lumo lwine, pe bula 17, lwatwebele ukuti: “Pa numa uyu muntu abe napwisha isambililo lya Baibolo mu citabo ca Ukwishiba kabili nabatishiwa, te kuti cibe icakabilwa ukumutungulula isambililo mu citabo ca cibili.”
Ni shani pa lwa muntu uushibatishiwe pa numa ya kupwisha icitabo ca Ukwishiba? Ubutumikishi Bwesu Ubwa Bufumu ubwa June 1996, pe bula 6, paragrafu 23, bwatucinkwileko ulwa cishinka calondolwelwe mu Ulupungu lwa kwa Kalinda pa lwa kukanasambilila ifitabo fyalundwako no musambi umo wine pa numa ya kupwisha icitabo ca Ukwishiba. Bushe ici cilepilibula ukuti tatulefwaya ukwaafwa umusambi wa Baibolo ukulunduluka ukucila pali ici cipimo? Iyo. Tulefwaya abantu ukusambilila icine ca kutendekelako. Nalyo line, cileenekelwa ukuti mu ciputulwa ca nshita icacepako, kasambilisha waswatuka akaba na maka ya kwafwilisha umusambi uwafumaluka ukunonka ukwishiba kwakumanina ukupingulapo mu kubamo mucetekanya ukubombela Yehova. Nakalimo kuti caba ifyo pa mulandu wa mibele ya pa lwabo, abasambi ba Baibolo bamo bakafwaisha fye no kusambilila ukucila pa muku umo mu mulungu.
Mu kushininkisha, abasambi bamo balalunduluka panono panono ukucila bambi. Lelo nga ca kuti pa numa ya kusambilila icitabo ca Ukwishiba, nakalimo icasendeleko inshita yalepelako ukucila iingenekelwa, umuntu talapingulapo ukuti alefwaya ukubishanya ne cilonganino, kasabankanya alingile ukulanshanya ico na umo uwa baeluda baba muli Komiti wa Mulimo uwa Cilonganino. Nga kuliko imibele iya limo limo fye, nakalimo ukwaafwa kwalundwapo kuti kwakabilwa. Ici cili mu kumfwana ne cishinte ca fyalondololwa mu maparagrafu 11 na 12 pe bula 17 mu Ulupungu lwa kwa Kalinda ulwa January 15, 1996.
Ukwibukila ulwa kusambilila nangu fye cine ca kutendekelako kulingile ukukunta umusambi ukusangwa ku kulongana kwa Bwina Kristu. Ici kuti catungulula umusambi ku kulangilila apabuuta ukuti alefwaisha ukubombela Yehova. Nga ca kuti takuliko ukutesekesha kwa ku mupashi ukwa musango yo pa numa isambililo mu citabo ca Ukwishiba nalitungululwa pa ciputulwa ca nshita icalepelako, kuti cawama ukuleka isambililo.