Ukulongana kwa Mulimo Ukwa August

ICISHIBISHO: Ubutumikishi Bwesu Ubwa Bufumu bukatantika Ukulongana kwa Mulimo ukwa mulungu umo na umo mu ciputulwa ca nshita ye bungano. Ifilonganino kuti fyateulula nga cilekabilwa ku kuleka fisangwe kwi Bungano lya “Imikalile ya Bukapepa” no kuti fikapituluke mu fishinka fikalamba ifya programu mu maminiti 30 pa Kulongana kwa Mulimo umulungu ukakonkapo. Ukupitulukamo muli programu we bungano ukwa bushiku no bushiku kulingile ukupeelwa libela kuli bamunyina batatu abafikapo abakakomaila pa fishinka fikalamba. Uku kupitulukamo kwapekanishiwa bwino kukaafwa icilonganino ukwibukisha ifishinka fikalamba ifya kubomfya mu bumi na mwi bala. Ifya kulandapo ukufuma mwi bumba ne fya kukumanya filingile ukwipifiwa no kufika pa cishinka.

Umulungu wa Kutampa August 3

Ulwimbo 216

10 min: Ukubilisha kwa pa mwenu. Ukubilisha kwasoobolwamo mu Ubutumikishi Bwesu Ubwa Bufumu. Landeni pali lipoti wa mulimo wa mwi bala uwa April uwa Zambia no wa cilonganino cenu. Lipoti wa April natusansamusha. Ubwingi bwa milimo isuma iyacitwa busanshamo icipendo ca pa muulu ica bakasabankanya 100,559. Tulepeela ukutasha ne lumbo kuli Yehova uulenga ukubombesha kwesu ukutunguluka. Ukushimikila kwesu ukusuma nakulangililwa pali lipoti pe bula 8. Umulimo twabombele mu April, lintu walundwa ku mulimo ulebombwa mwi sonde lyonse ulelangilila umupashi wa kuipeelesha kwa bukapepa no wa kuipeela bulilambo. Ifwe bonse natutwalilile ukutungilila no buseko imilimo isuma ku kuleta ubukata kuli Lesa.

15 min: “Bushe Umweshi wa August Ukaba Uwaibela?” Ifipusho ne fyasuko. Koselesheni bonse ukubombako mu butumikishi mu August na mu myeshi yonse iya mwaka wa mulimo uupya.

20 min: “Bomfyeni Babroshuwa Bafika pa Mutima.” Ukulanshanya ne bumba lyonse. Mu kwipifya pitulukeni muli babroshuwa basabankanishiwe kale ku kwishibisha abantu pa lwa fintu fyacindama ifya mu Malembo. (Moneni Watch Tower Publications Index 1986-1995, amabula 652-3.) Landeni pali babroshuwa ba ndakai, kabili lanshanyeni pa bengafwaisha ukupokelelako umo na umo. Bomfyeni icilangililo cimo nelyo fibili pa lwa fya kutambika.

Ulwimbo 191 ne pepo lya kusondwelela.

Umulungu wa Kutampa August 10

Ulwimbo 127

10 min: Ukubilisha kwa pa mwenu. Lipoti wa ndalama. Landeni pa lwa buyo bwa bakasabankanya bonse ukubombako mu butumikishi bwa mwi bala mu August.

15 min: Ukukabila kwa pa mwenu.

20 min: “Mwe Bacaice—Bomfyeni Bwino Inshita Ilyo Mucili pa Sukulu.” Ifipusho ne fyasuko. Sanshenimo ifyebo fyalinga ukufuma muli Loleni! wa April 8, 1992, amabula 23-25, na Ulupungu lwa kwa Kalinda ulwa July 15, 1991, amabula 23-6.

Ulwimbo 37 ne pepo lya kusondwelela.

Umulungu wa Kutampa August 17

Ulwimbo 163

10 min: Ukubilisha kwa pa mwenu. Laalikeni ibumba ukulandapo mu kwipifya pa lwa fyo twingapoka ishina na keyala ifya muntu twashimikila mu musebo, mu parka nelyo ukuli konse, pa kuti twingayamushimikila pa lwa cine alefwaya ukwishiba.

35 min: “Amasambililo ya Baibolo na Yambi Yalefwaikwa.” Ilyashi no kulanshanya ne bumba lyonse ukutungululwa na kangalila wa mulimo. Pitulukeni mu mulimo wa kusambilisha Baibolo uwa cilonganino cenu. Tasheni umo icilonganino cacita bwino. Landeni pa fyafulilako ifingacitwa ku kutendeka no kutungulula amasambililo ya Baibolo, ukusanshako na masambililo ya ndupwa. Langilileni paragrafu 5 ukupitila mu kwipusha umufyashi uutungulula isambililo lya lupwa lyonse. Belengeni paragrafu 8, no kukomaila pa fishinka 8 ifitantikwe. Londololeni paragrafu 13 ukupitila mu kulaalika kasabankanya uutungulula bwino amasambililo ukushimika ifyo twingapwisha ifipandwa ukwabula ukonaule nshita. Sanshenimo ica kukumanya cisuma icilangilila ifyo icilonganino caisakwata ifya kufumamo fisuma.

Ulwimbo 108 ne pepo lya kusondwelela.

Umulungu wa Kutampa August 24

Ulwimbo 213

12 min: Ukubilisha kwa pa mwenu. Langulukeni umukululo uleti “Tulefwaya Tukafike 100,000!” mu Ubutumikishi Bwesu Ubwa Bufumu ubwa July 1998. Apo kushele fye impela ya mulungu imo mu August, koselesheni bonse ukubombako mu butumikishi ilyo umweshi ushilapwa.

18 min: Ifya Kuba uwa Mukoosha mu Mulimo wa Bupainiya. Ilyashi lishimpilwe pa Ulupungu lwa kwa Kalinda ulwa September 15, 1993, amabula 28-31. Ipusheni painiya uwaishiba ifya kwikala na mafya yakalamba kabili uutwalilila na bupainiya.

15 min: Bomfyeni Bwino Ubutumikishi Bwesu Ubwa Bufumu. Ukulanshanya ne bumba lyonse. Ukubomfya ifya kumwenako fya ndakai, langilileni ifyebo fya mu nshita ifisangwa mu Ubutumikishi Bwesu Ubwa Bufumu ne fyo tunonkelamo: (1) ifipande fitukunta ukubombako lyonse mu butumikishi; (2) ifya kukumanya fitukoselesha mu mulimo wesu uwashila; (3) imitubululo itwaafwa ukulanshanya na bambi imbila nsuma mu nshila isuma; (4) ukubilisha kwa mpapulo shipya ishilipo ishaba sha kunonsha mu cifulo tubombela; (5) amalipoti ya mulimo, ayalangilila ifyo umulimo wa Bufumu uleenda; (6) Ilyashi lya Teokrasi, ilishimika pa lwa kulunduluka kwa mulimo we sonde lyonse; (7) ukubilisha no kutantika ifitwishibisha pa lwa fili no kucitika; (8) Imikululo ya Fipusho iilanda pa milandu iya katama; ne (9) ifya mu kati mu Ubutumikishi Bwesu Ubwa Bufumu ifitweba pa lwa mabungano, amakampeni yaibela ne fintu fimbi ifitulenga ukupoosako amano ku fyo tukabila lwa ku mupashi. Koselesheni bonse ukubelenga Ubutumikishi Bwesu Ubwa Bufumu bumo na bumo, ukubomfya imitubululo ya buko no kwisa na bwene ku Kulongana kwa Mulimo no kukumana kwa mulimo wa mwi bala, no kubusunga muli laibrare wenu ku kuloshako ku ntanshi.

Ulwimbo 210 ne pepo lya kusondwelela.

Umulungu wa Kutampa August 31

Ulwimbo 65

12 min: Ukubilisha kwa pa mwenu. Cinkuleniko bonse ukuleta amalipoti ya mulimo wa mwi bala aya August. Abatungulula Isambililo lya Citabo pa Cilonganino balingile ukushininkisha ukuti uuli onse mwi bumba lyabo naleta lipoti ku kuleka yonse yatantikwe ilyo September 6 ishilafika. Langulukeni pa mpapulo shikalatambikwa mu September. Mu kwipifya langilileni inshila ya kulanshanishishamo iimya icipusho ca kuti, “Mulandu nshi tulingile ukubomfesha ishina lya kwa Lesa?” Asukeni ukubomfya icitabo ca Ukwishiba, icipandwa 3, paragrafu 6.

15 min: “Bakangalila Abatungulula—Kangalila wa Kutangilila.” Ilyashi na kangalila wa kutangilila. Pa numa ya kupituluka mu milimo yakwe, atasha icilonganino pa kubombela capamo na baeluda ilyo balecema umukuni.

18 min: Afweni Abana Benu Ukwikala na Mafya ya pa Sukulu. Eluda alanshanya na bafyashi babili nelyo batatu abakwata abana mu sukulu. Mu kwipifya landeni pa mafya yamo ayaseeka ayo abana bakumanya, nga fintu yalondololwa muli Loleni! wa August 8, 1994, amabula 5-7. Lyene, ukulosha ku mabula 8-10, lanshanyeni ifyo abafyashi bengacingilila abana babo no kusungilila ukwampana kusuma na bakafundisha.

Ulwimbo 24 ne pepo lya kusondwelela.