Ifipempu fya Kubwelelamo Fitungulula ku Masambililo ya Baibolo
1. Mulandu nshi ifipempu fya kubwelelamo fyacindamina?
1 Yesu atumine abasambi bakwe ukushimikila no ‘kupanga abasambi . . . , ukubasambilisha.’ (Mat. 28:19, 20) Incito ya kwa kashimikila kubila, lelo kafundisha acita ifingi. Alasambilisha, ukulondolola, no kupeela ifishinka. Inshila imo tubomfya pa kusambilisha bambi kucita ifipempu fya kubwelelamo ku balefwaya ukusambilila pa kuti twingatendeka amasambililo ya Baibolo kuli bena.
2. Ni bani tulingile ukubwelela?
2 Ni kuli bani mulingile ukucita ifipempu fya kubwelelamo? Shininkisheni ukuti mwabwelela kuli balya bonse abapokeleko impapulo nelyo balya bashalefwaya sana ukukutika ku mbila nsuma. Nga mwasanga abalefwaya ukusambilila ilyo muleshimikila apali abantu abengi, esheni ukupoka akeyala ka uyo muntu nelyo inambala ya lamya pa kuti mwingayalundulula ukufwaisha. Cincimukeni pa kutendeka amasambililo ya Baibolo. Twalilileni ukufwaya abengasumina ukusambilila Baibolo, kabili kuti mwabasanga.—Mat. 10:11.
3, 4. Finshi fyasanshiwa mu fipempu fya kubwelelamo ifibomba bwino?
3 Balangeni Ukuti Namubatemwa: Ukupekanya bwino icipempu ca kubwelelamo kutendeka pa muku wa kubalilapo. Bakashimikila babomba bwino baleshiba ico mwine ng’anda atemwa, kabili ico cine e co babomfya ku kutwalilila ukulanshanya nankwe. Bamo basanga ukuti cisuma ukwipusha icipusho pa mpela ya kutandala pa kuti mulenge mwine ng’anda afwaishe ukumfwilapo na fimbi ilyo mukatandala umuku umbi. Ukutemwa bambi ukwafumaluka kutulenga ukulatontonkanya pali bena na lintu twafuma pa mwabo, kabili ici citulenga ukubwelelako mu kwangufyanya. Nga cingamwangukila, esheni ukubwelelako ilyo acili alefwaisha—nalimo ubo bwine bushiku nelyo pa numa ya nshiku shibili.
4 Ilyo mulecita icipempu ca kubwelelamo, esheni ukulunda pa fyo mwalandile pa kulanshanya kwafumineko. Bikeni ubuyo bwa kulanshanya nangu fye cishinka cimo ica mu Malembo ica kukoselesha cila nshita, kabili itemenweni ukukutika. Ishibeni mwine ng’anda bwino. Lyena pa kutandala ku kakonkapo, lanshanyeni icine ukufuma mu Cebo ca kwa Lesa icilelanda mukulungatika pa filemusakamika.
5. Ni nshila nshi imo iyayanguka iingabomfiwa ku kutendeka amasambililo ya Baibolo?
5 Akutontonkanyeni pa fyo Mwingatendeka Amasambililo ya Baibolo: Beni no buyo bwa kutendeka isambililo lya Baibolo ilyo mulecita ifipempu fya kubwelelamo. Bushe ici kuti cacitwa shani? Landeni ukuti mulefwaya ukubebako icishinka cimo icisuma, kabili kupukuleni icitabo ca Ukwishiba nelyo broshuwa wa Cintu Lesa Afwaya pali paragrafu mulemona ukuti balatemwa ukuumfwa. Belengeni paragrafu, asukeni icipusho, kabili landeni pe lembo limo nelyo yabili ayalimo. Ici kuti cacitwa pa mwinshi pene mu maminiti ya sano ukufika kuli 10. Sondweleleni ne cipusho cikonkelepo kabili umfwaneni ukwisalanshanya na fimbi inshita imbi.
6. Kuti twalanga shani ukuti twalyumfwikisha ubucindami bwa kucita ifipempu fya kubwelelamo?
6 Ukulenga bonse abo twasanga ukuti basambilile icine e lubali lwacindama ulwa butumikishi bwesu. E ico, pa nshita mwatantika ukubomba cila mulungu patuleniko inshita ya kucita ifipempu fya kubwelelamo. Ukucite ci kukamulenga ukubomba bwino ubutumikishi bwenu no kumuletela insansa shine shine.