Afweni Abalemenena ku Busuma
1. Bushe ni bani Yehova aleilonganikila mu nshiku shesu?
1 Umuntu onse aba ne mibele yalemenena ku fyaba mu mutima wakwe uwa mampalanya. (Mat. 12:35) Baibolo ilanda pa muntu ‘wa mutima wa bulwi.’ (Amalu. 55:21) Bamo ‘bantu ba bukali.’ (Amapi. 29:22) Lelo kwaba na “[balemenena] ku bumi bwa muyayaya.” (Imil. 13:48) Mu nshiku shesu, Yehova aleilonganikila abantu ba musango yu abalemenena ku busuma. (Hag. 2:7) Bushe kuti twabaafwa shani ukuba bakapepa wa kwa Yehova?
2. Bushe mu mulimo wesu uwa kulenga abasambi mwaba finshi?
2 Pooseniko Amano ku Kubwelelako: Ukwishiba ubucindami bwa kubwelelela ku balefwaya ukwishibilapo na fimbi kwalicindama pa kuti tufishepo umulimo wesu uwa kulenga abasambi. (Mat. 28:19, 20) Bushe tulabwelelako bwangu ku balesekelela? Bushe tulabwelela kuli bonse abapokelela impapulo nelyo abalefwaya ukwishibilapo na fimbi pa mbila nsuma? Bushe tulaba no mukoosha mu kubombesha ukubafwa ukukula lwa ku mupashi? Apo uyu mulimo usanshamo imyeo ya bantu, tufwile ukweshaesha ukulundululula ubuseko bwa bantu twasanga.
3. Cinshi tufwile ukucita pa numa ya kulanshanya no muntu mu butumikishi?
3 Ilyo mucili muletontonkanya pa fyo mwacilanshanya no ulefwaya ukwishibilapo na fimbi, lembeni ishina lyakwe ne nambala ya ng’anda. Lembeni ilyashi mwaciba mulelanshanya, amalembo yacibelengwa, ne mpapulo mwacishalika. Pa numa ya ico pangeni ukubwelelako bwangu.
4. Bushe kuti twacita shani ifipempu fya kubwelelamo ifisuma?
4 Ifya Kucita Icipempu ca Kubwelelamo: Ilyo mulecita icipempu ca kubwelelamo, cisuma ukuba aba nsansa kabili aba bucibusa no kulanga ukuti namwangwako kuli mwine ng’anda. Ifyo mulelanshanya filingile ukuba ifya-anguka ukuumfwa kabili ifya mu Malembo. Pekanyeni ilyashi lya kucincimusha ilya mu Baibolo ilya kulanshanyapo, kabili pa mpela ya ico cipempu, ipusheni icipusho ico mwingesayasuka ilyo mwabwelelako. Cisuma ukukanakansana pa fintu ifyo mwine ng’anda alanda ifishilingene na malembo. Tukuteni ukusambilisha icine ukubomfya ifyebo muleumfwaninapo.—Kol. 4:6.
5. Bushe painiya abombeshe shani, kabili finshi fyafuminemo?
5 Ukucita ifipempu fya kubwelelamo ku balefwaya ukwishibilapo na fimbi kukabila ukuibikilishako, lelo ifilambu fifumamo fisuma. Painiya wa ku Japan aimike ubuyo bwa kubwelela ku bantu bafulilako cila mweshi. Atendeke ukulemba bonse alekumanya mu mulimo wa ku ng’anda ne ng’anda, kabili alebwelelako mu nshiku 7. Alepekanya bwino ifyo ali no kulanda kabili alebomba umulimo wakwe naicetekela no kuicetekela. Pa cipempu ca kubwelelamo cimo, alitendeke isambililo no muntu uwasosele ati: “Ukutula fye kale nshifwaya ukulanshanya na imwe. E muku wa kubalilapo ukukutika kuli imwe.” Umupampamina wa kwa uyu painiya uwabamo ukutemwa waletele ifisuma. Pa mpele ya mweshi acitile lipoti amasambililo ya Baibolo 10.
6. Mulandu nshi tulingile ukuba no mupampamina wa kucita ifipempu fya kubwelelamo?
6 Imibele ya bantu ilaaluka lyonse. (1 Kor. 7:31) Ilingi pa kuti tusange umuntu pa ng’anda na kabili kano twabwelelako imiku iingi. Ilyo tulebikako amano ukubwelela ku balefwaya ukwishibilapo na fimbi, kuti twa-afwa abalemenena ku busuma ukuya ku nshila ya ku bumi bwa muyayaya.—Mat. 7:13, 14.