Tufwile Ukuba Bakasambilisha, Te Bakashimikila Fye
1 Calimonwa ukuti “Inte sha kwa Yehova mu nshila ya cine cine balikumanye sonde no bunte bwabo.” Cacitikako shani ico? Te ku bulamba nelyo ku maka ya buntunse, lelo ni ku mupashi wa kwa Lesa uubomba pa babomfi bakwe ilyo balebomfya ukupayanya kwalekanalekana ku kufishapo umulimo wabo uwa kushimikila no kusambilisha.—Seka. 4:6; Imil. 1:8.
2 Ukubomfye mpapulo e nshila ifumamo cimo iya kubombelamo umulimo wa kushimikila. Mu kupita kwa myaka, amabilioni ya fitabo, ututabo, amabroshuwa, bamagazini, na matrakiti fyalipulintwa no kwananishiwa ne Nte sha kwa Yehova ku kwafwilisha ukwishibisha imbila nsuma iya Bufumu. Amalipoti muli 1997 Yearbook yalelango kuti ukupange mpapulo kufikile pa fipimo fyasumbana. Ukufika pali ino nshita, ukucila pa maBaibolo ya New World Translation amamilioni 91 yalipulintwa. Mu mwaka umo impendwa ya bamagazini ba Ulupungu lwa kwa Kalinda na Loleni! abapulintilwe mu United States yaninine ukufika ku maperesenti 7.1. Mu Germany, ukusabankanya bamagazini kwaile pa muulu na maperesenti 35. Ukucila pali umo muli bamagazini batatu abasabankanishiwe kulya baali ba mwi bala lya ku Russia.
3 Mulandu nshi impapulo shafule fi shilekabilwa? Mu calo conse, kuliko ukwankulako kwawamisha ku kukoselesha kwapeelwe ukwa kuti tuleshimikila apali ponse apengasangwa abantu. Ilyo ubwingi ubwa ifwe tuletanununa umulimo wesu uwa kushimikila—mu fifulo fya cintubwingi, mu misebo, na mu fifulo fya makwebo—impapulo ishingi shileshalikwa ku bantu abasekelela. Ubwingi ubwa aba, ni limo limo fye, nalimo tabaumfwanapo ubukombe bwa Bufumu ku numa. Pa kuti aba na bo bengasakamanwa, ifilonganino filakwatako impapulo shalekanalekana isha kubomfya mu mbali shonse isha butumikishi.
4 Cinshi Caba E Buyo Bwesu mu Kwananya Impapulo? Ubuyo bwesu te kushalika fye impapulo. Umulimo wa kupanga abasambi usanshamo imbali shibili—ukushimikila no kusambilisha. Ica kubalilapo, twaliba ne shuko lya kushimikila imbila nsuma iya Bufumu, ukulenga abantu ukwibukilo kuti e subilo fye lyeka ilya muntu. (Mat. 10:7; 24:14) Impapulo shesu ishashimpwa pali Baibolo shalyeshiwa pa nshita ntali kabili shalibomba bwino nge nshila ya kubimbwilamo ubuseko no kwishibisha bambi pa lwa Bufumu.
5 Ica cibili, nga tuli no kupanga abasambi, tufwile ukusambilisha fyonse fintu Yesu atwebele. (Mat. 11:1; 28:19, 20) Na kabili, impapulo shilabomba umulimo ukalamba mu kupampamike cine mu mitima ya balesambilishiwa, ukubafwilisha ukuba abasambi.
6 Abo bapokelela impapulo kuti pambi baba ‘aba kumfwa icebo,’ lelo tacilemoneke fyo bali no kusanguka bakacita wa ciko nga twabasha fye beka. (Yako. 1:22-25) Te bengi bakaba abasambi kano fye nga umo engabatungulula. (Imil. 8:30, 31) Balakabila kasambilisha uwa kubaafwa ukushininwa ulwa cine icisangwa mu Malembo. (Imil. 17:2, 3) Ubuyo bwesu bwaba kubaafwa ukulunduluka ukufika na ku kuipeela no kubatishiwa no kubakansha ukufikapo bwino bwino ku kusambilishako bambi.—2 Tim. 2:2.
7 Ukukabila Kwakulisha Kuli kwa Bakasambilisha na Bambi: Lintu tushimikila, tubilisha imbila nsuma apabuuta. Nangu cibe fyo, ukusambilisha kubimbamo ukufundisho muntu panono panono. Ilintu ukushimikila kulenga bambi ukwibukila pa lwa bukombe bwa Bufumu, ukusambilisha kwafwilisha abantu ukupokelela imbila nsuma no kucitapo cimo. (Luka 8:15) Kasambilisha alacisha pa kubila fye; alalondolola, alapeelulula no kupaasha ukusuma, alapeela ubushinino, kabili alanashanasha.
8 Icinabwingi cesu ukufika pantu twingapesha tulingile ukuba bakasambilisha, te bakashimikila fye. (Heb. 5:12a) Ukwananye mpapulo lubali lwakatama ulwa mulimo wesu, lelo ukufika pa buyo bwa cibili ubwa butumikishi bwesu kwi pele pele cishintilila pa cintu tucita nga bakasambilisha. Nangu cingati cilatupeelo buseko lintu twashalika impapulo, pa kupwilikisha ubutumikishi bwesu, tatulingile ukumona ukushaliko lupapulo ngo buyo bwesu ubwa kupelako. (2 Tim. 4:5) Ifyo tushalika fiba ni nshila yawamisha iya kwisulo mwinshi ku mashuko ya kusambilisha bambi icine.
9 Bweleleniko pa Kuti Mwingatendeka Amasambililo ya Baibolo: Ifwe bonse cilemoneke fyo twalishalikapo ifitabo ifingi, amabroshuwa, na bamagazini, ifingapanga umutande wa fipempu fya kubwelelamo. Tulingile ukutantika inshita ya lyonse iya kubwelelako ku kubimbulo buseko. Imifwaile yesu iikalamba mu kubwelelako taili kushalika impapulo na shimbi lelo kukoselesha abantu ukubelenga no kunonkela mu sho bakwata kale. Bushe ifwe nga twapelele pi mu kulunduluka kwesu ukwa ku mupashi akukanabako umo uwalebwela libili libili ku kutwaafwa ukunonka ukwishiba kwalungikwa?—Yoh. 17:3.
10 Bweleleniko ku balesekelela bonse mu kuba no buyo bwa kutendeka isambililo lya Baibolo atemwa muli broshuwa wa Cinshi Cintu Lesa Afwaya Kuli Ifwe? nelyo mu citabo ca Ukwishiba Uko Kutungulula ku Mweo wa Muyayaya. Ishi mpapulo shibili shilondolola ubukombe bwa Bufumu mu nshila iyayanguko kumfwa. Broshuwa wa Cintu Lesa Afwaya akwatamo kosi wa kusambililamo uwakumanina bwino, uwikata pa fisambilisho fya kutendekelako ifya Baibolo. Icitabo ca Ukwishiba cilenga umo ukusambilisha icine mu kusooboloka, lelo mu kwanguka, mu kumfwika, kabili mu kwipifya.
11 Programu wa kusambilisha uwayangushiwako, uwalondololwa mu ca mu kati ica Ubutumikishi Bwesu Ubwa Bufumu ubwa June 1996, alacilengo kwanguka kuli kasambilisha pa kufunda na ku musambi pa kusambilila. Muleba na cilya ica mu kati lwa mupepi ukulapitulukamo mu misambilishishe ne nshila ishibomba bwino. Imo iya mitubululo iyabamo ibimbamo ifya kulango kusekelela kwa cine cine mu musambi, ubwingi bwa fyebo fya kusambilila pa nshita imo, ifya kubomba na mepusho ayashikumine ku cilesambililwa, fintu bonse babili kasambilisha no musambi bengapekanishisha isambililo mu kubangilila, ne fya kutungulula umusambi ku kuteyanya kwa kwa Yehova. Pa kukonka iyi mitubululo, ubwingi ubwa ifwe, ukusanshako na bapya, kuti twaba na maka ya kutungulula amasambililo ayalunduluka.
12 Amalipoti ya Kutunguluka Ukufuma mwi Bala: Broshuwa wa Cintu Lesa Afwaya ne citabo ca Ukwishiba nafishininkishiwo kuba fya kwaafwa fya mutengo mu kukwankwanya imibombele ya kupanga abasambi. Munyina umo mu Bolivia, lintu apokelele fye broshuwa wa Cintu Lesa Afwaya ilyo line fye alimubomfeshe ku kutendeka isambililo ku mwaume umo. Imyeshi ine pa numa pe bungano lya citungu, uyu musambi aali pa kati ka bantu ba nsansa abaaleya ku lubatisho!
13 Abengi balekuntwa ku kupeela ubumi bwabo kuli Yehova pa numa ya kupwisha ukusambilila icitabo ca Ukwishiba. Mu cilonganino cimo mu Angola, impendwa ya masambililo ya Baibolo yantu bakasabankanya batungulwile yalingilishiweko ukufuma pali 190 ukufika kuli 260 ne mpendwa ya balesangwa ku kulongana yalilundilweko imiku ibili ukufuma pali 180 ukufika kuli 360 mu myeshi fye ine pa numa ya kutendeka ukubomfya icitabo ca Ukwishiba muli ilya ncende. Bwangu bwangu fye, cabele icakabilwa ukupangako icilonganino na cimbi.
14 Munyina umo pa numa ya kutendeka isambililo lyakwe ilya kubalilapo mu citabo ca Ukwishiba, atile ukulitungulula “kulanguka nga ca kuti katungulula aleipusha fye ifipusho, ukubelengako amalembo yamo ayalingile, no kushininkisho kuti umusambi aumfwa.” Nangu cingatila lyonse aletontonkanyo kuti ni bakasabankanya fye abafikapo sana e bengatungulula amasambililo ya Baibolo ayalunduluka no kuti wene taali na kucicita, aishileiluke fyo kuti atungulula, ukusoso kuti: “Nga ine ningatungulula, uuli onse kuti atungulula.”
15 Ni mu kutungulula amasambililo ya Baibolo ngo lubali lwa butumikishi bwesu e mo tufikilishisha ubuyo bwa kupanga abasambi. Abo abaalundulula amaka ya kubombako ulu lubali lwa butumikishi balalusanga ukuba ulwa kwikushe cine cine kabili ulwa kulambula nga nshi. Shi nacikalandwe ulwa ifwe ukuti na ifwe bene ‘tulebilo bufumu bwa kwa Lesa, no kusambilishe fya kwa Shikulu Yesu Kristu no kushipa konse.’—Imil. 28:31.