Lekeni Imikalile Yesu Icindike Yehova—Ulubali 1
1 Ku numa uku twalifundwa sana pa lwa mikalile ya mu lupwa. Cili bwino ukubwekeshapo ifishinka fimo pa kuti bonse tumwenemo, ukusanshako na beshibe fye nomba line icine pali iyi myaka iinono iyapitapo.—2 Pet. 1:12.
2 Tumona Shani Icupo? Icupo caba mitantikile ya mucinshi. Cisuma kabili cabikwako na Yehova, na bana bakwe aba pe sonde balacenekela. Lelo, Baibolo taitila icupo no kufyala abana e cacindamisha. (Luk. Mil. 12:13; Marko 12:30) Yesu taupile icalengele no kuti apoose inshita yakwe iikalamba ne fya bupe fyakwe mu butumikishi. Yohane Kabatisha na o ali umushimbe. E co, bushe cisuma ukusuula bamunyina na bankashi ba Bwina Kristu ababombela Yehova mu bushimbe?
3 Umulandu uushili wa mu malembo uwa kutontonkanya ati umuntu fye onse afwile ukuupa nelyo ukuupwa no kufyala abana wafuma fye ku ntambi shimo. Mu ncende ishingi icupo no kukwata abana fimonwa ukuti e mikalile isuma iya kukonka. E co, abatwalilila ukuba abashimbe nelyo imbula bana bamonwa kwati te batuntulu. Ukutontonkanyapo bwino pa fyo twasumina, ukwabula no kutwishika kukalenga bamunyina na bankashi ukukanapatikisha no kusuusha abana babo nelyo abacaice bambi mu cilonganino pa mulandu wa kuti bashimbe.
4 Pali Mateo 19:11, 12 Yesu akoseleshe ubushimbe nga ca kuti umo kuti akumamo. Alangilile ukuti imifwaile yali ya kulenga Umwina Kristu wa musango yo ukubombela Lesa ukwabula ukupumbulwa. Yesu atile tufwile ukutesekesha Ubufumu. Pa nshita Yesu ali pe sonde abantu tabalefwaya ukutangishako umulimo wa kwa Lesa, ifya Bufumu Bwakwe, baletangishako icupo, kwati fye ni fi fine caba na lelo. Pa mulandu wa kuti Yesu alitemwishishe Yehova kabili aali no mupampamina wa kulwisha ishi ntambi, alisukile atunguluka. Ukulundulula umuntontonkanya wa kwa Kristu pali uyu mulandu kukafwa Umwina Kristu ukutunguluka mu bushimbe bwakwe.
5 Lesa taabinda ukuupa nelyo ukuupwa; cili fye bwino kuli abo abashilesanga insansa mu bushimbe nelyo abalebelelekwa kuli bucisenene. (1 Kor. 7:8, 9, 28, 32-34, 38) Lelo, Baibolo taikoselesha ukuupa nelyo ukuupwa bwaice bwaice, ukucila itila cisuma ukuupa ilyo umo acila pa mushinku wa bwaice, lintu insuuna ya kulaalana taiba na kabili e mulandu uulelenga ukupingulapo ukucite co. Na kabili ilalandilapo fye limo ati icupo fye conse cikakwata amafya kabili cikacilikila Umwina Kristu imilimo imo iya kubombela Yehova. Pa kutila abasalapo ukuupa nelyo ukuupwa beshibe ukuti mwaliba na mafya, umutumwa Paulo asosele ati icupo caba no bucushi.—1 Kor. 7:28, NW.
6 Bamo kuti bafwaya ukuba abashimbe pa nshita imo, bambi na bo kuti batemwa ukubelelela abashimbe. Pali aba twalikwata bamunyinefwe na bankashi abatemwikwa ababomba bupainiya nelyo ababombela mu mayanda ya Bethel. Lelo ni shani pa lwa bana besu? Bushe kuti twaba ne nsansa nga ca kuti basalilepo ukukanaupwa nelyo ukuupa pa kuti bapeele inshita yabo yonse ku kubombela Yehova, ukupala Samwele, umwana mwanakashi wa kwa Yefta, Timote, na bamunyina ba cishinka abashalapo pa basubwa? Nga ca kuti ukutontonkanya kwesu kuleumfwana sana no kwa kwa Lesa, e lyo tukaba ne nsansa sana.