Angweni ku Milimo ya Kusungusha Iya kwa Lesa

¹ Pa nshiku shitatu ishishaiwamina, twalongene pe Bungano lya Citungu ilya “Bakacita wa Cebo ca kwa Lesa.” Twatalile twalabako ku masakamika ya cila bushiku lelo twatontomeshe fye pa milimo ya kusungusha iya kwa Yehova. Programu ateyanishiwe mu musango wa kutwaafwa ukukusha icitetekelo muli Lesa na mu Cebo cakwe, ukukosha bucibusa bwesu na wene, no kutulenga ukulundako ukupimpila ubutumikishi. Tulemwenamo shani mu fyo twasambilishiwe?—Yoh. 13:17.

² Mwe Ndupwa Umfwileni Icebo ca kwa Lesa: Ilyashi lya kukonkana ilyaleti “Umfwileni Icebo ca kwa Lesa” lyatwaafwile ukubebeta bumupashi bwa ndupwa shesu. Abana balitemwa ukusambilila. E co, abafyashi ba bukapepa bakoseleshiwe ukulenga isambililo lya Baibolo ilya lupwa ukuba umufula wa kukuulilapo ulupwa lwa ku mupashi ulwakosa. Imitwe ya ndupwa iingi ilelanshanya na bana ba iko muli broshuwa mupya uuleti Kuti Mwaba Cibusa wa kwa Lesa! Ici cikabaafwa ukulundulula bucibusa bwa nsansa kabili ubwacetekelwa na Yehova. Mwe bafyashi, fundeni abana benu ifya kwangwa ku fyo Lesa ayumfwa pa fintu. Mulelangisha ifyo mwamutemwa ne fyo mwatemwa ifya kutesa fyakwe. (Amalu. 103:2) Bombeleni pamo ukwimika no kufika pa mabuyo yene yene aya ku mupashi ayaampana ku kubombela Yehova inshita yonse.

³ Icebo ca kwa Lesa Cilabuutushe Nshila Yesu: Twalitemenwe nga nshi ukupokelela icitabo cipya icileti Ukusesema kwa kwa Esaya—Ulubuuto lwa Bantu Bonse I. Mufikile pi ukubelenga ici citabo ca kubalilapo? Ibuuku lya kwa Esaya lisobela amapingushi ya kayofi pa nko ishishipepa Lesa e lyo na mapaalo ya Bufumu ayashaiwamina ku bantu ba kwa Lesa. (Esa. 34:2; 35:10) Lilatwafwa no kukuula icitetekelo cine cine muli Yehova na mu nshila acitilamo ifintu.—Esa. 12:2-5.

⁴ Ilyo mulebelenga Ukusesema kwa kwa Esaya I, ico mwingabalilapo fye ukwishiba ni fintu Esaya akoselele muli bumpomfu bwakwe kuli Yehova uku ninshi ububifi buli fye mpanga yonse. Ilyo aipushiwe ukuba inkombe ya kwa Lesa, Esaya atile: “Moneni, ine; ntumeni.” (Esa. 6:8) Ukwetetula pa fyo aitemenwe ukubomba kukamukoselesha ukutwalilila ukubilisha imbila nsuma, ukubombako umulimo wa kushimiko “bunte ku nko shonse” mu kufikapo.—Mat. 24:14.

⁵ Ukwangwa ku milimo ya kwa Yehova kukacindika ubukulu bwakwe. Kanshi katamikeni ishuko mwakwata ilya kuba bakacita wa cebo ca kwa Lesa!