Bakacita wa Cebo ca kwa Lesa Balasanga Insansa

“Kalanda umo uwa pe Bungano lya Citungu ilya Nte sha kwa Yehova ilya “Bakacita wa Cebo ca kwa Lesa” pa kwisula ukulongana atile: “Natwishiba ukuti kuno kulongana kuli pa fintu fimo ifyo Yehova atupeele ku kutupekanishisha ku mulimo wa Bufumu uwalundwako.” Atwalilile ukuti: “Natuipekanya ukusambilishiwa pa lwa mikalile ya nsansa sha lupwa, ukukoseleshiwa ukwikala mu kupalamisha no kuteyanya kwa kwa Yehova, ukucincishiwa ukusungilila ukupimpa kwesu mu mulimo wa Bufumu, kabili no kucinkulwako pa lwa kukabila kwa kuba abalola.”

UKUFUMA fye ku kupwa kwa May 2000, imintapendwa ya bakacita wa cebo ca kwa Lesa pamo ne fibusa fyabo bakonkomokele ku fifulo ifingi ifyapekanishiwe mwi sonde lyonse ku kupokelela amasomo ayacindama aya Baibolo. Cinshi basambilile pali ili bungano lya nshiku shitatu?

Ubushiku bwa Kubalilapo—Mwilaba Ifya Kutesa fya kwa Yehova

Mu lyashi lya kwiswila, ceyamani alaalike ibumba ukuipakisha amapaalo ayaba mu kupepa Yehova mu kwikatana pa mabungano. Bonse abali mwi bumba balishininwe ukuti icitetekelo cabo cali no kukoselako kabili ukuti bucibusa bwabo na Yehova bukakoselako.

“Lesa uwa [nsansa, NW],” alishiba fintu tukabila pa kuti tube ne nsansa pa lwesu. (1 Timote 1:11) E co, ilyashi lyaleti “Ukucita Ico Lesa Afwaya Kulaleta Insansa” lyakomailepo ukuti Icebo ca kwa Yehova, Baibolo, cilalondolola inshila iyawamisha iya kwikalilamo. (Yohane 13:17) Ukwipushe Nte ishabombela Yehova pa myaka iingi kwalangile ifyo ukucita ukufwaya kwa kwa Lesa mu mibele iili yonse kupeela imifwaile ku bumi bwesu. Ilyashi ilyakonkelepo ilyaleti, “Saminweni Ubusuma bwa kwa Yehova,” lyakomaile pa kuti, nga Abena Kristu “abapashanya Lesa,” tulefwaya ukulangisha “ubusuma bonse” mu bumi bwesu. (Abena Efese 5:1, 9) Inshila imo iyapulamo iya kucitilamo ici yaba ukupitila mu kushimikila imbila nsuma no kupanga abasambi.—Amalumbo 145:7.

Ukulanshanya ukwaleti “Koseleleni nga Abamona Uushimoneka” kwalangile ifyo icitetekelo cakosa citwafwilisha “ukumona” Lesa uushimoneka. Kalanda alondolwele ukuti abantu ba bumupashi balishiba imibele ya kwa Lesa, balishiba no kuti alikwata maka aya kwishiba nangu fye ifyo tutontonkanya. (Amapinda 5:21) Abaipushiwe ifipusho balondolwele ifyo bacitapo mu bumi pa kulundulula icitetekelo cakosa no kutangishako ifya ku mupashi mu bumi bwabo.

Iciputulwa ca lucelo capwile ne lyashi likalamba ilyaleti, “Lumbanyeni Yehova—Kacita wa Fipesha Mano.” Ici ciputulwa cayafwile ibumba ukumfwikisha ukuti ilyo tulesambilila ifingi pali Yehova, tukaba ne fingi ifya kulumbanishisha Yehova nga Kacita wa fipesha mano. Kalanda atile: “Ilyo tuletontonkanya pa milimo ya kwa Lesa iishaiwamina iya bubumbo pamo ne fintu fyonse ifyo aletucitila nomba, ukutasha kwa pa mutima kutulenga ukumulumbanya. Ilyo tuleetetula pa fipesha amano ifyo acitile abantu bakwe ku numa, tufwaya ukumulumbanya. Kabili ilyo tuletontonkanya pa malayo yapesha amano Yehova akacita, tulafwayafwaya ne nshila sha kumutashishamo.”

Iciputulwa ca mu cungulo catendeke ne lyashi ilyaleti “Mwinenuka mu Kucite Cawama,” ilyacinkwileko ibumba ukuti amafya ya muli cino calo yaleshininkisha ukuti impela ili mupepi. (2 Timote 3:1) Lelo, pa kukananenuka, kuti twashininkisha ukuti “tatuli abakwinda no konaika; lelo tuli abakwate citetekelo no kusunge mitima yesu.”—AbaHebere 10:39.

Kufunda nshi ukwa Baibolo kwapeelwe pa lwa bumi bwa lupwa? Ilyashi lya kubalilapo ilya kukonkana pe bungano ilyaleti “Umfwileni Icebo ca kwa Lesa” lyatendeke no lubali lwa kuti “Ilyo Mulefwaya uwa Kuupana Nankwe.” Ukufwaya uwa kuupana nankwe kwaba pa fintu fyacindama sana fintu abantu bapingulapo. E co, Abena Kristu balalolela ukuupa nelyo ukuupwa ukufikila bakosoka, kabili bafwile ukuupila fye “muli Shikulu epela.” (1 Abena Korinti 7:39) Ulubali lumbi ulwa kukonkana lwalelanda ukuti Yehova afwaya indupwa sha Bwina Kristu shonse ukutunguluka ukuba ishakosa lwa ku mupashi, kabili lwalandile inshila ishibomba umo ici cingacitwa. Ulubali lwa kulekelesha lwacinkwileko abafyashi ukuti pa kusambilisha abana babo ukutemwa Lesa abafyashi balingile ukutendekelapo ukumutemwa.

Ifishinka ifyalandilwe mu lyashi ilyaleti “Cenjeleni ku Mang’umfung’umfu no Mulomo” fyayafwilishe bonse ukumona ukuti nangu cingati ifintu fya kupapusha filacitika, tulingile ukwankulako mano mano, te mu kukanapelulula ilyo twaumfwa amalyashi ya kucincimusha. Abena Kristu kuti bacita bwino ukulanda pa co baishiba ukuti e cine—imbila nsuma iya Bufumu. Abengi basangile ilyashi lyakonkelepo ilyaleti, “Ifya Kushipikisha ‘Umuunga mu Mubili,’” ukuba ilya kusansamusha no kukulilila. Lyalibafwile ukumona ukuti te mulandu na mesho tupitamo lyonse, Yehova kuti atukosha ukupitila mu mupashi wakwe uwa mushilo, Icebo cakwe, na muli bamunyina ba Bwina Kristu. Ukukoseleshiwa ukukalamba kwafumine mu fyo umutumwa Paulo umwine apitilemo.—2 Abena Korinti 12:7-10; Abena Filipi 4:11, 13.

Ubushiku bwa kubalilapo bwalekelesheko ne lyashi ilyaleti “Ukwendela Pamo no Kuteyanya kwa kwa Yehova.” Ili lyashi lyalandile pa mbali shitatu umo ukuteyanya kwa kwa Lesa kwaselela pa ntanshi: (1) ukumfwikisha ulubuuto lwa ku mupashi ukufuma kuli Yehova (2) ubutumikishi Lesa aseekesha ifwe, na (3) ukuteuluka kwa pa nshita yalinga mu fya mibombele ya kuteyanya. Lyena kalanda asosekeshe ukuti: “Tulefwaisha sana ukwishiba ifili no kucitika.” Aipwishe ukuti: “Bushe te kuti tusungilile ukucetekela twakwete pa kubala ukufika na ku mpela?” (AbaHebere 3:14) Icasuko cali icaishibikwa. Pa numa kwaishilebako ukufumya broshuwa umupya uuleti Kuti Mwaba Cibusa wa kwa Lesa! Uyu broshuwa akaba cibombelo ca maka mu kwafwilisha abantu abashafika apatali mu masomo ya ku sukulu nangu abashaishiba kubelenga bwino pa kuti bengasambilila pa lwa kwa Yehova.

Ubushiku bwa Cibili—Twalilileni Ukulongole Ifipesha Mano fya kwa Lesa

Pa numa ya kulanda pe lembo lya bushiku, ubushiku bwa cibili ubwe bungano bwatwalilile ne lyashi lya kukonkana ilyaleti “Abatumikishi ba Cebo ca kwa Lesa.” Ulubali lwa kubalilapo lwalandile pa kutunguluka kwa mulimo wa mwi sonde lyonse uwa kushimikila. Nangu cibe fyo, ukushipikisha kwesu muli uyu mulimo kuleshiwa ku cintubwingi, abakaana ubukombe bwa Bufumu. Bakasabankanya abakokole abengi balondolwele ifyo batwalilila aba buseko mu butumikishi ukupitila mu kukosha amatontonkanyo ne mitima yabo ku kulolenkana no bwesho bwa kukanayangwako no kukaanya. Ulubali lwa cibili lwacinkwileko abasangilwe kwi bungano ukuti Inte sha kwa Yehova balatukuta ukulanshanya na bantu konse konse, ukuya ku ng’anda ne ng’anda no kushimikila kwa mu lyashi. No lubali lwa kulekelesha lwalondolwele inshila ishapusanapusana umo Abena Kristu bonse bengalundulwila ubutumikishi ngo muntu umo umo. Kalanda akomailepo ukuti pa kucite ci, tulingile ukutangishako Ubufumu bwa kwa Lesa, nangu ca kuti ukucite co kulabimbamo ukupumfyanishiwa no kuipusula.—Mateo 6:19-21.

Apo twikala mu calo icabulamo bukapepa icifwaya fye ifikwatwa, ilyashi ilyaleti “Lundululeni Bukapepa no Kuteka Umutima” lyali ilyalinga. Ukushimpa ukulandapo kwakwe pali 1 Timote 6:6-10, 18, 19, kalanda alangilile ifyo bukapepa bwafwilisha Abena Kristu ukukanatemwa indalama, uko kwingabalufya no kuleta amalangulusha ayengi. Akomaile pa kuti te mulandu ne mibele yesu mu fya ndalama, insansa shashintilila pali bucibusa na Yehova no butuntulu bwesu ubwa ku mupashi. Abengi balicincishiwe ne fishinka ifyali mu lyashi ilyaleti “Ukukanabikila Lesa Ica Kukwatilapo Insoni.” Icishinka ca kuti Yehova talaba Inte shakwe isha busumino calilandwapo libili libili. Ica kumwenako icapulamo ica kwa Yesu Kristu—uwaba “ifyo fine mailo, na lelo, na ku nshita sha muyayaya”—cikafwilisha abengi ukubutuka no kushipikisha mu lubilo lwa kuya ku bumi.—AbaHebere 13:8.

Mu kupwisha iciputulwa ca lucelo kwaliko ilyashi lya lubatisho—lyonse iliba cintu icipulamo pa kulongana kukalamba ukwa Nte sha kwa Yehova. Fintu cali ica buseko ukumona abapya abaipeele ukukonka mu nkasa sha kwa Yesu ukupitila mu lubatisho lwa mu menshi! (Mateo 3:13-17) Bonse abacite co balipwishishisha ifingi nga bakacita wa cebo ca kwa Lesa. Ukulundapo, lintu babatishiwa balaba abatumikishi babishiwa aba mbila nsuma, ukusango buseko ubukalamba mu kwishiba ukuti baleshisha ishina lya kwa Yehova.—Amapinda 27:11.

Ukufunda ukwa kukanapita mu mbali kwalipeelwe mu lyashi ilyaleti “Ukukosoka Kulakabilwa pa ‘Kupaatululo Busuma Ukubulekanya no Bubi.’” Ifipimo fya kwishibilako icalungama ne calubana ifya calo fyalipelebela icabipisha. E co tulingile ukushintilila pa fipimo fya kwa Yehova. (Abena Roma 12:2) Bonse balikoseleshiwa ukubombesha nga nshi pa kunonka ukwishiba kwalungika ukwa nshila sha kwa Lesa no kufika ku kukosoka. Lyena, ukupitilila mu kubomfya ukulingulula kwesu tukakanshiwa “ukupaatululo busuma ukubulekanya no bubi.”—AbaHebere 5:11-14.

Lyena kwaishileko ukukonkana kwa lyashi lyaleti “Bombesheni Ukulundulula Bumupashi.” Abena Kristu ba cine balebukila pa lwa bucindami ubwaba mu kulundulula no kusungilila bumupashi bwabo. Ici cibimbamo ukubombesha, e kuti kubelenga, ukusambilila, no kwetetula. (Mateo 7:13, 24; Luka 13:24) Abantu ba bumupashi balatwalilila ne “mipepele yonse ne mipaapaatile.” (Abena Efese 6:18) Twalishiba ukuti amapepo yesu yasokolola ukushika kwa citetekelo cesu no kuipeelesha, bumupashi bwesu, ukubikapo fye na fintu tumona ukuba “ifyacilamo.” (Abena Filipi 1:10) Ubucindami bwa kulundulula bucibusa ubwapalamisha ubwa kutemwa na Yehova nabo bwalikomailwapo, filya umwana wa cumfwila aipakisha ukuba na wishi uwa nkumbu. Tatwakwata fye imipepele nangu ca kuti imipepele yesu ya cine—lelo tulafwaya ukukuula icitetekelo cakosa, ‘nga abamona Lesa.’—AbaHebere 11:6, 27.

Na kabili ukulunduluka kwa ku mupashi kwalilandilwepo mu lyashi ilyaleti “Lekeni Ukulunduluka Kwenu Kumoneke.” Imbali shitatu umwa kulunduluka shalibebetelwe: (1) ukulundulula ukwishiba, ukwiluka, na mano, (2) ukulundulula ifisabo fya mupashi wa kwa Lesa, na (3) ukubomba imilimo yesu mu lupwa.

Mu lyashi ilya kulekeleshako pali ubu bushiku abasangilwe kuli ili bungano balicincimwike ukupokelela icitabo icipya icaleti: Ukusesema kwa kwa Esaya—Ulubuuto lwa Bantu Bonse I. Ici e citabo ca ntanshi pa fitabo fibili ifilelondolola ibuuku lya Baibolo ilya kwa Esaya ukukonka icipandwa ne cipandwa. Kalanda atile: “Ibuuku lya kwa Esaya na ifwe bene lyalitukwatila ubukombe ilelo.” Atwalilile ukuti: “Ca cine ukuti ukusesema kwa liko ukwingi kwacitike ku numa mu nshiku sha kwa Esaya. . . . Lelo, ukusesema kwa kwa Esaya ukwingi kulefikilishiwa ilelo, na kumbi kukafikilishiwa mu calo cipya ico Lesa alaya.”

Ubushiku bwa Citatu—Beni Bakacita wa Cebo ca kwa Yehova

Ubushiku bwa kulekelesha ubwe bungano bwatendeke no kulanshanya kwe lembo lya bushiku. Lyena kwaliko ukukonkana kwa malyashi ayaleti: “Ukusesema Kwabamo Ubupilibulo Ukwa kwa Sefania ku Bacita Ukufwaya kwa kwa Lesa.” Amalyashi yatatu ayali mu kukonkana yalangilile ukuti, nga fintu Yehova acitile ku bashalecita ukufwaya kwakwe mu nshiku sha baYuda, e fyo akaleta no kumanama pa bakaana ukumfwila ukusoka kwakwe. Pa mulandu wa kuti ni Lesa babembukila, bakalapulumpunta kwati ni mpofu, ukwabula ukusanga ipusukilo. Nangu cibe fyo, Abena Kristu ba cine, muli bucishinka batwalilila ukufwaya Yehova, kabili bali no kubelama mu bushiku bwa bukali ubwa kwa Lesa. Mu kulundapo, balaipakisha amapaalo ayengi na pali lelo. Balipaalwa mu kulanda “ululimi lwine lwine” ulwa cine ca Baibolo. (Sefania 3:9) Kalanda atile: “Ukulanda ululimi lwine lwine kusanshamo ukusumina icine, ukucisambilisha kuli bambi no kulenga imibele yesu ukulaumfwana na mafunde ya kwa Lesa ne fishinte fyakwe.”

Abasangilwe kuli ili bungano mu kufwaisha bapembelele icilangililo icaleti “Ifyacitike Kale Ifya Kutusoka Lelo.” Ici cilangililo ca mingila calangilile ifyo abena Israele abengi bafwilile pa mupaka wa Calo Calaiwe pa mulandu wa kulaba Yehova no kubelelekwa ku banakashi abasenshi mu bulalelale na mu kupepa kwa bufi. Umo uwalumbwilwe sana mu cilangililo ni Yamini—uwali ne mitima ibili, taishibe ica kucita pa kubala nga ali no kunakilako pa kusembelekwa ku banakashi abena Moabu nelyo ukuipeela kuli Yehova. Ukupelulula kwa bufi no kutontonkanya kwa kulufya ukwa kwa Simri uushali ni kapepa kwalimonekeshe nge fyo ne citetekelo no kuipeelesha ifya kwa Finehasi fyamonekeshe. Ububi ubwaba mu kubishanya na bashatemwa Yehova bwalilangililwe bwino bwino.

Icilangililo capekenye amatontonkanya ya bakomfwa ku lyashi lyakonkelepo ilyaleti, “Mwiba Bakoomfwa wa Cilafi.” Ukubebeta ilembo lya 1 Abena Korinti 10:1-10 kwalangilile ukuti Yehova alesha icumfwila cesu pa kumona nga natulinga ukupyane calo cipya. Kuli bamo, ifya ku mubili kuti fyacilikila amabuyo ya ku mupashi na pali lelo, ilyo tuli mupepi no kwingila mu bwikashi bupya. Bonse balikoseleshiwe ukukanapanye shuko lya ‘kwingila mu kutusha kwa kwa Yehova.’—AbaHebere 4:1.

Ilyashi lya cintubwingi lyakwete umutwe waleti “Umulandu Tufwile Ukutontonkanishisha pa Fipesha Amano fya kwa Lesa.” “Ifipesha mano” fya kwa Yehova filangilila amano yakwe na maka ya kuteka pa bubumbo bumoneka. (Yobo 37:14) Ifipusho fya kufwailisha ukufuma kuli Yehova fyali ifyakumanina ku kulenga Yobo ukumona amaka ya kwa Kabumba wa maka yonse. Kabili ku nshita ya ku ntanshi Yehova akacitila ababomfi bakwe aba busumino “ifipesha mano.” Kalanda asondwelele ukulanda ukuti: “Kwaliba imilandu iingi iya kutontonkanishisha pa fipesha amano ifya kwa Yehova, ifyo acita ku numa, ifyo alecita ino ine nshita mu fyo abumba, na fintu alaya ukwisacita nomba line.”

Pa numa ya kusupawila kwa cipande ice sambililo lya Ulupungu lwa kwa Kalinda ilya mulungu, ilyashi lya kulekelesha ilye bungano lyalilandilwe. Ili lyashi lya kucincimusha ilyaleti “Katamikeni Nga Nshi Ishuko Lyenu Ilya Kuba Kacita wa Cebo ca kwa Lesa,” lyakonkomeshe ukuti ukuba bakacita wa cebo ca kwa Lesa caba lishuko lya mucinshi. (Yakobo 1:22) Ibumba lyalicinkwilweko ukuti ishuko lyesu ilya kuba bakacita wa cebo ca kwa Lesa lyaliibela, kabili ilyo tuletwalilila ukuba bakacita wa cebo ca kwa Lesa, e lyo tukalacindikilako fye ili shuko. Bonse abasangilweko balikoseleshiwe ukulangisha ukuti nabanonkelamo muli ili bungano lya citungu pa kufwaisha ukuba bakacita wa cebo ca kwa Lesa na maka yonse. Iyi e nshila fye yeka iya kusangilamo insansa sha cine cine.

[Akabokoshi ne Cikope pe bula 25]

Kuti Mwaba Cibusa wa kwa Lesa!

Pa bushiku ubwa kubalilapo icungulo broshuwa mupya uuleti Kuti Mwaba Cibusa wa kwa Lesa! alifumine. Kuli ukukabila ukukalamba ukwa kwangusha amasomo ya Baibolo mu ncende ishingi ishe sonde, kabili uyu broshuwa akabomfiwa ku kwisushisha uko kukabila. Uyu broshuwa akaba lipaalo likalamba ku bantu abashaishiba ukubelenga bwino e lyo na ku basambilila lelo abashibelenga bwino ululimi ululandwa mu ncende bekalilamo.

[Akabokoshi ne Fikope pe bula 26]

Ukusesema kwa kwa Esaya—Ulubuuto lwa Bantu Bonse

Abasangilwe ku kulongana balisekelele pa kupokelela Volyumu 1 uwa pa mavolyumu yabili uuleti Ukusesema kwa kwa Esaya—Ulubuuto lwa Bantu Bonse. Muli ulu lupapulo, ukukomaila kuli pa fyo ukusesema kwa kwa Esaya kubomba mu nshiku shenu.