Amabungano ya Kucincimusha Yasumbula Ukusambilisha kwa Bulesa

ILELO, icalo cilekumanya ukufumfumuka kwe lyashi. Pa televisioni na radio, mu musango wa fitabo nelyo ukupitila muli bakompyuta, ukupayanya kwa kwishiba pa mutwe uuli onse uwingelenganishiwa ni cikanga kube ukushingapelela. Nalyo line, abantu balalwala no kufwa. Imisoka, icipowe, no bupiina e ko fyaba ukushinguluke sonde, kabili ukufulunganishiwa kwa mu nkuntu kuleambukila abantu abengi ukucila kale lyonse. Amano yonse ayabako yalifilwa ukulungika imilandu. Mulandu nshi? Pantu umutundu wa muntu walifutatila amano ya kwa Lesa.

Fintu cali icalinga, lyene, ukuti “Ukusambilisha kwa Bulesa” wali e mutwe wasalilwe ku mabungano ya mu nshita sha nomba line aya Nte sha kwa Yehova! Programu acinkwileko abo abasangilweko ukuti kusambilisha fye kweka ukusangwa mu Cebo ca kwa Lesa, Baibolo, e kwakwata ubucindami bwine bwine, ubwa kupususho bumi.

Ibungano lya kubalilapo lyatendeke pali Cine, June 3, mu Uniondale, New York, U.S.A. Ukufuma ilyo no kutwalilila, programu alipeelwe mu misumba yalekanalekana iya calo cimo pa numa ya cibiye, ukulekelesha mu calo cikalamba ica Africa na South America.

Icungulo ca Bushiku bwa Kubalilapo

Ubushiku bumo na bumo bwalikwete umutwe uyo uwalekomaila pa lubali lwa kusambilisha kwa bulesa. Ku ca kumwenako, programu wa bushiku bwa kubalilapo ashimpilwe pa mutwe wa kuti “Ukwishibe Sambilisho Lyafuma Kuli Lesa.” (Yohane 7:17) Ili tontonkanyo lyalilundulwilwe bwino mu kupita kwa ubu bushiku.

Pa numa ya lwimbo ne pepo, ceyamani we bungano aiswile programu mu kuba ne lyashi lya mutwe wa kuti “Ukusambilisha kwa Bulesa Kutuleta Capamo.” Alondolwele ukuti abantu ba kwa Yehova baliba abaikatana pa kusambilila imibele Yakwe no kwenda mu nshila Shakwe. (Mika 4:1-5) Ukusambilisha kwa bulesa kulakosha ukwikatana kwabo. Abakubungana balikoseleshiwe ukusekelela mu kubishanya kwabo ukwaikatana.—Ilumbo 133:1-3.

Inshita inono pa numa mu cungulo, ukulongana kwa lyonse ukwa cilonganino kwalilandilwepo mu kukonkana kwakwete umutwe wa kuti “Ukulongana Ukutusambilisha pa lwa Nshila sha kwa Yehova.” Kalanda wa kubalilapo acinkwileko abakubungana ukuti lintu twalongana pamo, tucindika Yehova na muli ifyo tupokelela ipaalo   Lyakwe. Kalanda wakonkelepo akomaile pa kukabila kwa kwakanamo mu kulongana. Mu kucite fyo, tulumbanya Yehova pa cintubwingi, ukulangilila icitetekelo cesu, no kukosha icitetekelo ca bambi. Kalanda wa butatu muli uku kukonkana alangishe ukukabila kwa kubomfya ico tusambilila pa kulongana. Tulingile ukuba “bakacita wa cebo, te ba kuumfwa fye iyo.”—Yakobo 1:22.

Mu kukonkapo kwaishile ukulanshanya kushaiwamina ukwa kwimbila Yehova amalumbo. Ukwimba kwa kufuma ku mutima lubali lwakatama ulwa kupepa kwesu. Ili lyashi lyakonkelwepo ne lyashi likalamba, “Ukusambilisha kwa Bulesa Kulacimfya.” Mwandi mutwe wawamisha! “Yehova e Ntulo ya kusambilisha kwawamisha uko uuli onse engapokelela,” e fyasosele kalanda. Lyene, pa numa ya kulandapo ukwipi ukwa cipapwa ca bongobongo wa buntunse, atile: “Tulingile ukubomfya amaka yesu aya kutontonkanya maka maka ku kupokelela ukusambilisha kwa bulesa. Ni yeka fye e yafumamo amano ya cine cine.” Fintu cili ica cine!

Ulucelo lwa Bubili

“Twalilileni Ukupulamike Isambilisho lya kwa Lesa Umupusushi Wesu” wali e mutwe wa bushiku bwa bubili ubwe bungano. (Tito 2:10) Ici cishinte caishile pa bwelu mu lyashi lya kuti “Ukusambilisha kwa Bulesa Kwalolenkana ne Fisambilisho fya Fibanda.” Ee, ifibanda fyalikwata ifisambilisho fya fiko. (1 Timote 4:1) Nga fintu kalanda alondolwele, ukusambilisha kwa bulesa kulacimfya “amano” ya kwa Satana pa kusansalika ifisambilisho fya bufi ne nshila sha bucenjeshi isha kwa Ciwa. Pa mulandu wa ici, Abena Kristu ba mitima yalungama mupepi na 4,500,000 tababa na kabili abasha ku mfifi ya kwa Satana.—Yohane 8:32.

Nalyo line, tuli no kutwalilila ukucincintila Satana. Ici calikomailwepo ku lyashi “Bushe Ulecincintila Umupashi wa Calo?” Umupashi wa ici calo wa kulenge mfwa. Ukoselesha imibele yabotelela, imimwene ya bucipondoka ukulosha ku bulashi, no kufwaisha kwabamo ulunkumbwa ukwa fimoneka. Umwina Kristu ali no kuibebeta umwine lyonse. Bushe acili alikwata ifipimo fyasumbuka lintu caisa ku fintu atamba, ifyo akutikako, nelyo ukubelenga? Mu kukoselesha, kalanda atile: “Tulemutasha bamunyina, bankashi, na bacaice, pa kubombesha kwa mukoosha uko mulecita kale kale muli uku kuloshako.”—1 Yohane 2:15-17.

Kwaliba ica kusangwilako icicilenga ukuba icakosa ukucincintila umupashi wa calo. Ca kusangwilako nshi ico? Ifwe bonse twaba abashapwililika. Ca cine, Yesu afwilile membu shesu, lelo nalyo line tuli no kulwisha ukukongama kwa kubembuka. Ici calilangulwikwepo mu lyashi lya kuti “Ukulwisha Ukufyambata kwa Lubembu pa Mubili Uwawa.” Pa kati ka fintu fimbi, kalanda atile kuti twacimfya ukushomboka kwesu no lubembu nga ca kuti twafwala ubuntu bupya no kusengauka icili conse iciikusha ukukongama kwesu ukwa lubembu.

“Lenga Isambilisho Ilituntulu Ukuba Inshila Yobe iya Bumi” wali e mutwe wa lyashi lyakonkelepo. Bamo balyangwako mu kucishamo pa lwa butuntulu bwabo ubwa ku mubili. Mu cishinka, nangula ni fyo, ubutuntulu bwa ku mupashi bwaliba ubwacilapo ukucindama. Kalanda akomaile pa kukabila kwa kusenda ifishingamo fyesu mu kukatama muli uku kuloshako, kabili akwete amashiwi ya kukoselesha ukucilisha ku banakashi ba Bwina Kristu. Atile: “Tulatasha apakalamba bonse bankashi bacikalamba na banakashi bacaice ababa abashikatala bwino mu kupimpila kwabo ubutumikishi na mu kusakamana kwabo ukwa fishingamo fya pa lwabo.” Ee, kabili bonse ifwe tutasha Yehova pe sambilisho ilituntulu ilyo ilitulekanya ukufuma ku calo.

Ilyasondwelele programu wa lucelo lyali lyashi lya kuti “Ukusambilisha kwa Bulesa Kwasokolola Imifwaile ya Bumi.” Kalanda atile: “Pa nshita imo, mupepi no uli onse alatwishiko kuti, ‘Cinshi caba imifwaile ya bumi?’” Mu kuba no kupaasha kwa maka, ashinine ukuti ni Baibolo fye yeka e ipeela icasuko ca cine cine kuli ico cipusho. Lyene, kalanda alangishe ukuti amalayo yawamisha aya kwa Lesa yatupeela imifwaile ya bumi mu kufumamo cimo. Mu kupalishako, abengi mwi bumba baletontonkanya abati, ‘E fintu fye abantu mu cifulo candi ica kubombelamo balekabila ukumfwa.’ E fyatontonkenye ne Bumba Litungulula. Broshuwa mupya, uwa mutwe wa kuti Cinshi Caba Imifwaile ya Bumi? alikakwilwe pa mpela ya ili lyashi. Fintu uuli onse aali uwacankwa! Ukutuusha kwa kasuba pa kati kwapeele ishuko lya mu nshita ilya kutambamo muli ulu lupapulo lupya.

Icungulo ca Bubili

Ilyashi lya kubalilapo icungulo lyakwete umutwe wa kusansamusha uwa kuti “Poosa Amasakamika Yobe Yonse Pali Yehova.” Ifintu ifingi filalenga amasakamika; lelo, Icebo ca kwa Lesa citila tulingile ukupoosa amasakamika yesu yonse pali wene. (1 Petro 5:6, 7) Ca cine, impika shimo kuti shatwalilila, kabili ukukuma kuli ici kalanda acincishe ukuti: ‘Beni abatekanya. Pembeleleni pali Yehova. Mu kushangila cetekeleni ukuti ukukonka Baibolo lyonse e kwawamisha. Nga ca kuti twasunga imitima yesu iyatonta pali Yehova, tukalaipakisha “umutende wa kwa Lesa” uwapulamo mu kwiluka konse.’—Abena Filipi 4:6, 7.

Amalyashi yakonkelepo yane yalangishe ukuti ukusambilisha kwa bulesa kulabomba mu bumi bwa lupwa. Ilya kubalilapo, “Ukulenga Icupo Ukuba Icikakilo Cibelelela,” lyacinkwileko abakubungana ukuti mu menso ya kwa Yehova icupo tacimonwa nge cintu ca kupoosa fye, nga fintu cimonwa ku bengi mu calo. Nangu cibe fyo, ku kulenga icupo ukutunguluka, tuli no kukonka ukutungulula kwa kwa Yehova. E watupangile. Kanshi, Icebo cakwe icapuutwamo cabamo ukufunda kwa cupo ukwawamisha ukwingasangwa.

Ilyashi lya kuti “Bombesha ku Kupusunsuka kwa ba mu Ŋanda Yobe” lyalandile pa kusonsomba kwa kusakamana ulupwa muli ishi nshita shayafya. (2 Timote 3:1) Abafyashi basambilisha abana babo ubusaka bwa ku mubili, imibele isuma, ifya kubomba, ne fya kuba bakapekape kabili abasakamana bambi. Icacilapo ukucindama, bafwile ukusambilisha ubufyashi bwabo ukuba ababomfi ba kwa Yehova abaipeelesha.—Amapinda 22:6.

Mu kulanshanya kwakonkelepo, “Mwe Bafyashi, Abana Benu Bakabila Ukusakamana Kwalamuka,” kalanda acinkwileko abakubungana ulwa kukabila kwa kutasha abana, ilintu bashilesuulako ku mabunake yabo. Abafyashi ukucilisha bafwile ukuba abapempwila ku kulemenena ku kubulwa ubufumacumi, ukutemwe fimoneka, nelyo akaso.

Abakubungana bacaice ukucilisha balikutike mu kusakamanisha ku lyashi lyaletila “Mwe Misepela—Fisambilisho fya kwa Ani Mumfwila?” Ifintu fyalikosa ku Bena Kristu bacaice ilelo. Ukuya ne calo kwaliba ukwayanguka, lelo ico citungulula ku mfwa. Nangula ca kuti ukukakatila ku kusambilisha kwa bulesa kufwaya ubukose ku bacaice, kuletako amapaalo yakalamba nomba no bumi bwa ciyayaya ubuli no kwisa.—1 Timote 4:8.

Ubushiku bwa bubili bwasondwelele mu kuba ne cilangililo ca kukafyo mutima ica kuti “Imisepela Iibukisha Kalenga wa Iko Nomba.” Mu mitendekele, katungulula aitile abacaice mu kuteyanya kwa kwa Lesa “umulalo wa teokratiki muli bucishinka abaibimba mu mulimo wa kuipeelesha kuli Yehova Lesa ne Mfumu yakwe iyasontwa iya mu muulu, Kristu Yesu.” Alundilepo ukuti: “Abacaice besu mu cine cine balepwishishisha icintu cimo icawamisha!” Icilangililo calangishe mu kumonekesha ifyo nga ca kuti umufyashi akansha umwana bwino, ico cikawamina umwana lintu akula no kubombela Yehova pa lwakwe.

Ulucelo lwa Bushiku Bwalenga Shitatu

Umutwe wa bushiku bwalenga shitatu wali wa kuti “Twalilileni Ukusambilisha Aba Nko Shonse.” (Mateo 28:19, 20) Abakubungana ukwabulo kutwishika baenekele ukufunda kwa pa nshita yalinga pa mulimo wa kushimikila, kabili tabalengelwe nsoni. Ukukonkana kwakwete umutwe wa kuti “Mu Buseko Ukufikilisha Umulimo Wesu Uwa Kushimikila no Kusambilisha” kwakoseshe umupampamina wabo uwa kutwalilila ukwakana mu mulimo wa kucitilo bunte. Ilyashi lya kwiswila lyalandile pa kutandala kwa kubalilapo; ilya bubili, pa fipempu fya kubwelelamo; ne lya butatu, pa masambililo ya Baibolo. Bamishonari ukushinguluke calo balilaalikwe ukubwelela ku mwabo no kusangwa kwi bungano ne ndupwa shabo ne fibusa. Bamishonari balyakene muli ulu lubali lwa programu. Cali ica kulengo buseko ukupokelela ukubuutushiwa pa kutunguluka balekwata mu mulimo wabo. Mu kukonkapo, ilyashi lya kuti “Ukufika pa Uli Onse ne Mbila Nsuma” lyalandile pa maka ya bunte bwa mu lyashi.

Ulucelo lwasondwelele ne lyashi lya lubatisho, ica kucitika capulamo lyonse pa kubungana kukalamba ukwa Nte sha kwa Yehova. Pe bungano ilili lyonse, ibumba likalamba ilya baipeela bapya lyaliminine pa ntanshi ya mabumba yalongene kabili mu kucetekela ukwasuka mu kusuminisha ku fipusho fibili ifyalungatikwe kuli bene. Lyene bapitile mu lubatisho lwa pa cintubwingi. Mwandi bushininkisho bwa maka ubwa kusonga kukalamba ukwa kusambilisha kwa bulesa!

Icungulo ca Bushiku Bwalenga Shitatu

Programu wa cungulo atendeke no kulanshanya kwashika ukwa mu Malembo. Inte sha kwa Yehova baliba ababeleshanya na mashiwi ya pali Mateo icipandwa 24 na Luka icipandwa 21. Bushe bamo batontonkenye ukuti tapali icili conse icipya icali no kusoswa pali ifi fipandwa fya mu Baibolo? Fintu balubile! Amalyashi “Cinshi Cikaba Icishibilo ca Kubapo Kwenu?” na “Twebeni, Ni Lilali Ifi Fintu Fikabako?” yatungulwile abakubungana ukupula mu kulanshanya kwa kucincimusha ukwa fiputulwa fya ifyo fipande fibili no kupeela ubulondoloshi bupya ubwa fikomo fimo fimo. Kwali ukulanshanya kwakaba pa numa ya ciputulwa ca kulongana ilyo abakubungana balelinganya ifyo balembele ku kumona nga ca kuti balyumfwikishe ifishinka. Ukwabulo kutwishika, ifipusho ifingi fikasukwa lintu ifi fyebo fyasabankanishiwa mu Ulupungu lwa kwa Kalinda.

Umutwe wa kusambilila Baibolo walitwalilile mu lyashi lya kuti “Ifyasuko Fyabamo Kufunda ku Fipusho Fyobe Ifya Baibolo.” Lyene programu aile intunga yapusanako. Umwaka wa 1993 waishibishe imyaka 50 ya Watchtower Bible School of Gilead. Ilyashi lya kuti “Imyaka 50 iya Kukansha kwa Bumishonari Ukwa Gileadi ne Mibombele” lyalangishe abakubungana icapwishishiwe muli ici ciputulwa ca nshita. Nga ca kuti kwali bamishonari abali bonse mu kati ka lyashi lyaleti “Ifya Kupwishishisha fya Bukabila bwa Mbila Nsuma mwi Bala lya mu Cibulungwa,” balilaalikwe ukwakana fimo ifya kukumanya fyabo ne bumba. Ukumfwa ku bulondoloshi bwa bamishonari kwali kwa kucincimusha!

Ilyashi lyakonkelepo, “Umulandu Inte sha kwa Yehova Batwalilila Ukuba Abalola,” lyali lisambililo na limbi ilya mu lyashi lya kale. Lyalangishe ukuti Abena Kristu baliba abalola ukutula mu mwanda wa myaka uwa kubalilapo C.E. ukufika ino nshita. Ico catungulwile ku ca kupapusha na cimbi. Mu kutendeka fye kwe lyashi lyakonkelepo, ilyakwete umutwe wa kuti “Bakabilisha ba Bufumu Abacincila mwi Sonde Lyonse,” kalanda aimishe volyumu mupya umukalamba (lintu kale kale aliko mu lulimi lwa cikaya) no kusoso kuti: “Cili buseko ukubilisha pano ilelo ukukakulwa kwa ici citabo cipya, icikwete umutwe wa kuti Jehovah’s Witnesses—Proclaimers of God’s Kingdom.” Icitabo cakwatamo ubulondoloshi bwa kulonsha ubwa lyashi lya muno nshiku ilya Nte sha kwa Yehova. Cishimika ilyashi lya kucincimusha ilya kushipikisha, umupampamina, no kutunguluka, ukupeela ubushininkisho bwa maka ubwa mupashi wa kwa Yehova ukubo wacincila pa babomfi bakwe.

Ulucelo Lwalenga Bune

Kale kale bwali bushiku bwa kulekelesha ubwe bungano. Umutwe wa bulya bushiku, “Ukuinonsha fwe Bene ku Kusambilisha kwa Bulesa,” watubulwile akalume kashaiwamina aka programu. (Esaya 48:17) Ulucelo ukusakamana kwa bakubungana kwayalwililwe ku kukonkana kwa malyashi yatatu aya maka. Uku kukonkana kwakwete umutwe wa kuti “Ubukombe Bwapuutwamo Ubwa Kusoka Ubwa kwa Yeremia—Ubwa ku Nshita Yapita ne ya Nomba,” kwalimo ukulanshanya kwa cikomo ne cikomo ukwa kwa Yeremia ifipandwa 23, 24, na 25. Mwandi bukombe bwakosa ifi fipandwa fyakwatamo! Israele wabulwo busumino uwa mu kasuba ka kwa Yeremia afwile alitutwime ku kusoka kwakwe ukwabulo kulamba, ukwapuutwamo na bulesa. Icalo conse calitutwime ukucilanapo lintu uko kusoka kwafikilishiwe. Bushe ifintu fili ifyapusanako ilelo? Nakalya. Inte sha kwa Yehova mu bukose balashimikila ubukombe bwa bupingushi ubwa kwa Lesa. Mu kupelako, iyi micitile ya fintu yonse ili no kulolenkana ne ncitilo sha mapingushi isha kwa Yehova. Ico cikapilibula ubonaushi bwapwililila ku calo ca kwa Satana.

Ulucelo lwa pa Mulungu lwasondwelele mu kuba ne cilangililo calenga bubili, “Mwilufiwa Nelyo Ukusenteka Lesa.” Mu nshila yamonekesha, calangishe ifyo ukusambilisha kwa bulesa kwingatucingilila ukufuma ku kusongwa na mavideo yabotelesha ne nyimbo no kufuma ku kukongamina ku kulimba imbuto sha kukansana pa kati ka Bena Kristu banensu. Pa kusondwelela kwa cilangililo, ceyamani ayambwile aya mashiwi ya kusonsomba itontonkanyo aya umo uwa bali mu cilangililo aya kuti: “Tatwakunkuma ku kusonga kwa calo. Nga ca kuti tatucincintile, icalo mu mucenjelo kuti cabosha ukutontonkanya kwesu. Kabili nampo nga twatwalilila aba busumino nelyo iyo cikashintilila pa fintu tubyala.” Fintu caba ica cine!

Icungulo ca Kulekelesha

Ibungano lyalepalamina ku kupwa lubilo lubilo ilyo kalanda we lyashi lya cintubwingi, ilyakwete umutwe wa kuti “Ukusambilisha kwa Kwaafwa mu Nshita Shesu Ishayafya” aile pa cisebele. Mu nshila yaumfwika kabili iyabamo ukulongoloka, aishibishe impika sha mpikwe isho shitwambukila ilelo no kulondolola inshila shimo umo ukusambilisha kwa bulesa kwingatwaafwa ukuipakisha ubumi bwawaminako. Atile nga ca kuti tulekonka isambilisho lya mu Malembo nomba, tukaba na maka ya kukonka lyene kuli pe na pe mu calo cipya ica kwa Yehova.

Pa numa ya kusupawila kwe sambililo lya uyo mulungu ilya Ulupungu lwa kwa Kalinda, inshita ye lyashi lya kusondwelela yalishile. Kalanda mu kwangufyanya apitile mu fishinka fikalamba ifya programu wa nshiku shine kabili acinkwileko abakubungana ulwa mpapulo shipya. Na kabili abilishe ukuti video wa bubili mu kukonkana kwa The Bible—A Book of Fact and Prophecy mu kwangufyanya ali no kukakulwa. Na kuba, video wakwata umutwe wa kuti “The Bible—Mankind’s Oldest Modern Book” nomba e ko aba mu ciNgeleshi. Amalipoti ya kulengo bulanda yalibelengelwe ukufuma ku fifulo ukuli amafya yabipisha, pamo nga ku Bosnia na Herzegovina. Mu kusondwelela, kalanda abelengele amashiwi ya pali Lukala Milandu 12:13 ayatila: “Ukusupula kwa mulandu onse; fyonse nafyumfwika. Bela Lesa akatiina, baka amafunde yakwe; pantu ici e ca buntunse bonse.”

Mwandi kucinkulako kwawamisha! Lekeni tulolele ubushiku lintu umutundu wa muntu onse ukalumbanya Kafundisha wesu Uwakulisha, Yehova, no kumfwila ukusambilisha kwakwe ukwa bulesa.

[Ifikope pe bula 24, 25]

Amabungano ya “Ukusambilisha kwa Bulesa” mu Moscow na Kiev yafuminemo ubuseko bukalamba

[Ifikope pe bula 26, 27]

1. Ukupitila mu lubatisho, abengi balangishe ukuipeela kwabo kuli Lesa

2. Uwakubungana wa myaka ya bukulu 100 alicincimushiwe pa kupokelela ulupapulo lupya

3, 4. Ifilangililo fya kusonsomba itontonkanyo fyalitashiwe apakalamba

5. Bamishonari baipushiwe pa mabungano baebekeshe ubunonshi bwa kusambilisha kwa bulesa