Icebo ca Kusesema ica kwa Lesa Citulenga Ukuba ne Subilo lya ku Ntanshi
PA MULANDU wa Cebo ca kwa Lesa, Baibolo wa Mushilo, Abena Kristu ba cine balisumina mu nshita ya ku ntanshi kabili balikwatamo isubilo. Apo fibusa na Yehova Lesa, balikwata isubilo lya ku ntanshi. Nga fintu ilyashi lya kutendekelako pa Mabungano ya Citungu aya “Icebo ca Kusesema Ica kwa Lesa” lyalondolwele, pa myaka iingi Inte sha kwa Yehova shalipoosako amano ku kusambilila ukusesema kwa mu Baibolo. E co, finshi Yehova apekanishishe abantu bakwe pali aya mabungano? Ninshi bekete amaBaibolo mu maboko bonse balefwaisha ukumfwa. Umutwe wa bushiku bumo na bumo uli kamutwe kamo na kamo muli ici cipande.
UBUSHIKU BWA KUBALILAPO: Ukwenda mu Lubuuto lwa Cebo ca kwa Lesa
Ilyashi lyaleti “Icebo ca kwa Lesa Calitutungulula” lyalondolwele ukuti abantu ba kwa Yehova baba ngo muntu uwimo lwendo ubushiku ninshi napafiita. Ilintu akasuba kaletula amona icibuutubuutu, lelo atendeka ukumwenekesha ifintu fyonse lintu akasuba kafika pa kati ka mutwe. Nga fintu casobelwe pa Amapinda 4:18, abantu ba kwa Yehova balitendeka ukumona bwino inshila yabo mu lubuuto lwa cine ukufuma mu cebo ca kusesema ica kwa Lesa. Tabaipununa mu mfifi ya ku mupashi.
Ilyashi likalamba ilyaleti, “Angweniko ku Cebo ca Kusesema ica kwa Lesa,” lyacinkwileko abalekutika ukuti abashintilila pali Yehova tabalengwa insoni no kubepwa nga fintu caba ku bantu bakonka bamesia babufi na bakasesema. Lelo, fingi fishininkisha ukuti Yesu Kristu ni Mesia wa cine! Ku ca kumwenako, ukwaluka kwa kwa Yesu ukwa cipesha mano kwali citontonshi ca pali wene nge Mfumu ya Bufumu bwa kwa Lesa. Ukutula apo atendekele ukuteka mu Bufumu mu 1914, Yesu na kabili aba “lutanda lwa lucelo” ulwalumbulwa pali 2 Petro 1:19. Kalanda atile: “Pamo ngo Lutanda lwa Lucelo ulwa buMesia, alabilisha ukuca kwa bushiku nelyo ukutendeka kwa nkulo iya bantu aba cumfwila.”
Ilyashi lyaiswilile programu wa cungulo ilyaleti, “Ukulabalika nge Fyengelo” lyalondolwele Abena Efese 5:8, apo umutumwa Paulo atufunda ‘ukwenda nga bana ba lubuuto.’ Abena Kristu baba fyengelo, te mu kushimikilako fye bambi Icebo ca kwa Lesa lelo na mu kubomfya Baibolo mu bumi bwabo mu kupashanya Yesu.
Pa kuba icengelo ca musango yu, tulingile ‘Ukubekelwa mu Kubelenga Icebo ca kwa Lesa.’ Uyu mutwe walondolwelwe mu malyashi yatatu ayakonkene. Pa numa ya kwambula Abraham Lincoln, uwaitile Baibolo ngo “bupe bwawamisha ubo Lesa apeela abantunse,” kalanda wa kubalilapo aipwishe ibumba ulwa fyo imibelengele yabo yalelangilila pa lwa fyo batesekesha Icebo ca kwa Yehova. Abalekutika bakoseleshiwe ukupoosako amano ilyo balebelenga Baibolo, ukwelenganya amalyashi ya mu Malembo no kwampanya ifishinka fipya ku fishinka baishiba kale.
Ilyashi lyakonkelepo muli uku kukonkana lyakomaile pa kusambilila, nga tuli no kulya “ifilyo ifyakosa,” te kubelenga fye iyo. (AbaHebere 5:13, 14) Kalanda atile isambililo kuti lyatukosha sana maka maka nga ca kuti intanshi ‘twateyanye mitima yesu’ nga fintu Esra shimapepo wa bena Israele alecita. (Esra 7:10) Lelo mulandu nshi isambililo lyacindamine fi? Ni pa mulandu wa kuti lilakuma bucibusa bwesu na Yehova mu kulungatika. E co, isambililo lya Baibolo lilingile ukuba ilya mutengo, ilisansamusha, no kupembesula nangu cingati libimbamo ukupoosako amano no kubombesha. Ni shani twingasanga inshita ye sambililo lisuma? Kalanda wa kulekelesha uwa uku kukonkana atile kupitila mu “kulubulako inshita.” (Abena Efese 5:16, NW) Icingatwafwa ukusanga inshita kubomfya bwino inshita twakwata.
Ilyashi lyaleti “Lesa Alakosha Abapomponteka” lyatile abantu abengi ilelo bali aba naka. Pa kuti tukwate “ukucishamo kwa maka” mu butumikishi bwa Bwina Kristu, tulingile ukushintilila pali Yehova, ‘uupeela amaka ku wapomponteka.’ (2 Abena Korinti 4:7; Esaya 40:29) Fimo ifingatukosha fyaba Cebo ca kwa Lesa, ipepo, icilonganino ca Bwina Kristu, ukubombako lyonse mu butumikishi, bakangalila ba Bwina Kristu, ne fya kumwenako fya bambi aba busumino. Ilyashi lyaleti “Beni Bakasambilisha pa Mulandu wa Kupite Nshita” lyakomaile pa kukabila kwa Bena Kristu ukwa kuba bakasambilisha kabili ababilisha no kubombesha ku kulundulula ‘imisambilishishe.’—2 Timote 4:2.
Ilyashi lya kulekelesha pali ubu bushiku ilyaleti “Abalwa na Lesa Tabakacimfye,” lyalandile pa matukuto ya nomba line aya bantu bashaishiba ifishinka pali ba Nte mu fyalo fimo aya kufwaya ukulenga Inte sha kwa Yehova ukwishibikwa nge cakaniko cabipa. Lelo tatulingile ukutiina, pantu Esaya 54:17 itila: “Icilwilo conse icafulilwa iwe tacakashuke; no lulimi lonse ulwaimina iwe mu kupingula ukalufulunganya. Ici e cikwatwa ca babomfi ba kwa Yehova, no bu e bulungami bwabo ubwafuma kuli ine, cisemo ca kwa Yehova.”
UBUSHIKU BWA CIBILI: Ifintu Fyalengwo Kwishibikwa mu Malembo ya Bakasesema
Pa numa ya kulanshanya pe lembo lya mu Baibolo ilya ubu bushiku, abalongene bakutike ku lyashi lya cibili ilya kukonkana ilya ili bungano. Ili lyashi lyaleti “Ukucindika Yehova nga Bakasenda ba Lubuuto.” Ilyashi lya kubalilapo lyalangilile ukuti ubuyo bwa Mwina Kristu kucindika Yehova ukupitila mu kushimikila ukuli konse. Ilyashi lyakonkelepo muli uku kukonkana lyalandile pa bucindami bwa kutungulula abalefwaya icine ku kuteyanya kwa kwa Lesa. Mu nshila nshi? Kupitila mu kubomfyako amaminiti 5 nelyo 10 ilyo tushilatendeka isambililo lya Baibolo ilya pa ng’anda nelyo pa numa ku kulangilila ifyo ukuteyanya kwa kwa Yehova kubomba. Ilyashi lya butatu muli uku kukonkana lyakomaile pa bucindami bwa kucindika Yehova ukupitila mu milimo isuma.
Ilyashi lyaleti “Temwisheni Ifishimiko fya kwa Yehova” lyalandile pa fikomo fimo fimo ifya Amalumbo 119. Ukwabula no kutwishika, tulakabila ifishimiko, pantu ilingi tulalaba. Fintu cacindama ukutemwa ifishimiko fya kwa Yehova nga fintu kemba wa malumbo acitile!
Lyene kwaishile ilyashi lyaibela ilya lubatisho ilyaleti “Ukumfwila Icebo ca Kusesema Kutungulula ku Lubatisho.” Abaleya ku lubatisho bacinkwilweko ukuti bapashanya Yesu ukupitila mu kubatishiwa na mu kukonka mu makasa yakwe. (1 Petro 2:21) Mwandi lishuko aba bapya bakwata ilya kubimbwamo mu kufishiwapo kwe lembo lya pali Yohane 10:16 apo Yesu asobele ukuti ali no kulonganika “impaanga shimbi” ku kubombela pamo na basambi bakwe abasubwa no mupashi!
Ilyashi lyaiswilile programu wa cungulo ilyaleti “Umfweni ico Umupashi Ulesosa” lyalondolwele ukuti umupashi wa kwa Yehova ulanda kuli ifwe ukupitila muli Baibolo, “umusha wa cishinka kabili uwashilimuka,” na kampingu wesu uwakanshiwa na Baibolo. (Mateo 24:45) E co, Abena Kristu tabakabila ukumfwa ishiwi ukufuma mu muulu pa kuti bacite ifitemuna Lesa. Ilyashi lyakonkelepo ilyaleti “Natutungilile Isambilisho Ilyalingana na Bukapepa,” lyakonkomeshe Abena Kristu ukukanakonkelela imfundo shabipa isho cino calo cisabankanya. Cine cine, nga twacilamo ukufwaisha ukwishiba ifintu, kuti twalabelenga ne fyebo fyabipa ifyo abasangu balemba na bambi abo Satana abomfya. Fintu cingacilapo ukuwama ukulabelenga Baibolo lyonse pamo ne fipande fya mu Ulupungu lwa kwa Kalinda na Loleni!
Ilyashi lyakonkelepo ilyaleti “Twalilileni Ukukonke Cipasho ca Fyebo Fituntulu” lyakomaile pa bucindami bwa kubeleshanya ne “cipasho” ica cine. (2 Timote 1:13) Ukukonka ici cipasho kuti kwatulenga ukuba no kuipeelesha kwa bukapepa no kwishiba icintu icishumfwana ne cine.
Citontonkanyeni, ukumonwa kuli Yehova ngo musuma. Mwandi uko kucindikwa! Ukushimpwa pa kusesema kwa kwa Hagai, ilyashi lyaleti “‘Ifisuma’ Fileisusha Ing’anda ya kwa Yehova” lyali ilya kukoselesha nga nshi pa mulandu wa kuti lyakonkomeshe abalekutika ifyo uuli onse uwaba mwi “bumba likalamba” musuma icine cine kuli Yehova. (Ukusokolola 7:9) E co, Yehova akabapususha ilyo ‘akatenshe’ nko umuku wa kulekelesha mu “bucushi bukalamba” ubuleisa. (Hagai 2:7, 21, 22; Mateo 24:21) Lelo, pali nomba, abantu ba kwa Yehova balingile ukuba abalola lwa ku mupashi, nga fintu calondolwelwe mu lyashi lyaleti “Amalembo ya mu Kusesema Yatucilimusha Ukuba Abalola.” Kalanda ayambwile amashiwi ya kwa Yesu aya kuti: “E ico loleni, pa kuti tamwaishibo bushiku Shikulwinwe akesamo.” (Mateo 24:42) Ni shani fintu twingatwalilila ukuba abalola lwa ku mupashi? Kupitila mu kuba abapamfiwa mu mulimo wa kwa Yehova, ukupepa lyonse, kabili ukutwalilila ukulafuluka ubushiku bukalamba ubwa kwa Yehova.
Ilyashi lya kulekelesha pa bushiku bwa cibili lyaleti “Icebo ca Kusesema mu Nshita ya ku Mpela.” Tukalibukisha pa myaka iingi. Mulandu nshi? Ni pa mulandu wa kuti kalanda abilishe icitabo icipya ica—Angweniko ku Kusesema kwa kwa Daniele! Kalanda atile: “Ulu lupapulo lwakwata ifikope ulwa mabula 320 lulelanda pali fyonse ifyalembwa mwi buuku lya kwa Daniele.” Mwandi bushinino bukosha icitetekelo ubwa kuti Yehova alesanikila pa Cebo cakwe ica kusesema!
UBUSHIKU BWA CITATU: Icebo ca Kusesema ica kwa Lesa Tacifilwa
Ubushiku bwa kulekelesha ubwe bungano bwatendeke na malyashi ya kukonkana ayakwete umutwe waleti “Ifyebo fya Kusesema Ifya ku Nshita Yasontwa.” Aya malyashi yatatu yabebetele ubukombe butatu ubwa bupingushi bwa kwa Yehova ubo Habakuki abilishe. Ubwa ntanshi bwali bwa kuli Yuda wapondweke kabili ubwa cibili bwali bwa kuli Babele wa culukusu. Ubwa kulekelesha, ubuli no kufishiwapo bwa bonaushi buli mupepi ubwa bantu babifi bonse. Pa lwa Armagedone, munyina walekeleshe muli aya malyashi ya kukonkana alengele abalekutika ukuba na katiina ka bukapepa ilyo atile: “Cine cine, lintu Yehova akalekulukamo amaka yakwe yonse apo yapela, cikaba ca kutiinya.”
Umutwe wa cilangililo ca mu Baibolo ica kucincimusha pali ili bungano waleti “Ukukatamika Ubupyani Bwesu Ubwa ku Mupashi.” Ici cilangililo calefika pa mutima calingenye imibele ya kwa Yakobo ku yo Esau akwete pa lwa fya ku mupashi. Esau asuulile ubupyani bwakwe ubwa ku mupashi, ica kuti bwapeelwe kuli Yakobo, uwabukatamike. Abasangilwe kuli ili bungano baipushiwe ukuti: “[Bupyani nshi ubwa ku mupashi] Yehova atupeela?” Kalanda ayaswike ukuti: “Icine ca Cebo cakwe, Baibolo; isubilo lya mweo wa muyayaya; ne shuko lya kumwimininako nga bakabilisha ba mbila nsuma.”
Ilyashi lyakonkelepo lyaleti “Bushe Ubupyani Bwesu Ubwacindamisha Bupilibula Cinshi Kuli Imwe?” Tulanga imibele isuma pa lwa bupyani bwesu ubwa ku mupashi ukupitila mu kutangisha umulimo wa kwa Yehova na mashuko ya fya ku mupashi ukucila ifya pa lwesu nelyo ifya ku mubili. Muli yi nshila ubumi bwesu butonta pali bucibusa bwesu na Yehova, ukupusanininako na Adamu, Esau, na bena Israele bashakwete ubusumino.
Ilyashi lya ku cintubwingi ilyaleti, “Ukulenga Ifintu Fyonse Ifipya—Nga Fintu Casobelwe,” lyasuntinkenye ukusesema kune pa lwa “myulu ipya” ne “calo cipya.” (Esaya 65:17-25; 66:22-24; 2 Petro 3:13; Ukusokolola 21:1, 3-5) Nga fintu caumfwika, kuli Yehova kwali ukufishiwapo kukalamba ukwa uku kusesema ukucila ukwacitike lintu abantu bakwe babweshiwe mu 537 B.C.E. Uko kufishiwapo kukalamba kwa pa lwa buteko bwakwe ubwa Bufumu (“imyulu ipya”) na bekashi ba buko (“icalo cipya”), abakekala muli paradise wa pe sonde.
Ilyashi lyali ilya kulekelesha kabili ilyali ilya kucincimusha pe bungano lyaleti “Ifyo Tuleenekela Ilyo Icebo ca kwa Lesa Ciletutungulula.” Lyacinkwileko bonse ukuti “naipipe nshita yashalako” iya kupwishishishamo umulimo wa kubilisha Ubufumu. (1 Abena Korinti 7:29) Tuli mupepi ne nshita ya kufishiwapo kwa cipope ca kwa Yehova kuli Satana no bwikashi bwakwe bonse ubwabipa. Natukwate imimwene yakweteko kemba wa malumbo uwaimbile ukuti: “Imitima yesu ilinda Yehova: wene e kwafwa kwesu kabili ni nkwela yesu.” (Amalumbo 33:20) Mwandi lisubilo lishaiwamina ilyo abenekela ifyashimpwa pa cebo ca kusesema ica kwa Lesa bakwata!
[Icikope pe bula 7]
Icilangililo ca kucincimusha calengele ababomfi ba kwa Yehova ukucilapo ukutesekesha ubupyani bwa ku mupashi
[Icikope pe bula 7]
Abengi abaumfwilile icebo ca kusesema ica kwa Lesa balibatishiwe