“Icebo Icasoswa Apayene”
1 Bushe cilamukosela ukwebako bambi ubukombe bwa kupeelo mweo? Bushe mutila mufwile ukweba abantu ifyashika pa kuti batemwe? Ilyo Yesu atumine abasambi bakwe, abebele ati: “Na po muleya, mulebila, amuti, Nabupalama ubufumu bwa mu muulu.” (Mat. 10:7) Ubukombe bwali ubwaololoka kabili ubwayanguka ukwebako bambi. E fyo caba na lelo.
2 Ilingi line mashiwi fye ayanono yakabilwa ku kutendeka ukulanshanya. Ilyo Filipi akumenye mutungwi umwina Etiopia, amwipwishe ati: “Bushe waishibe fyo ulebelenga?” (Imil. 8:30) Mwafumine ukulanshanya kusuma muli cilya “icebo [icasoselwe] apayene.”—Amapi. 25:11.
3 Kuti mwabomfya imitendekele yapalako na imwe mu butumikishi. Kuti mwacita shani? Pa kuba abapempwila no kusala amashiwi ayalingana ne mibele. Ipusheni icipusho, no kukutika ku casuko. Cipusho ca musango nshi mwingepusha?
4 Ifipusho Fimo Ifingepushiwa: Ku kutendeka ukulanshanya, kuti mwaesha ukwipusha icipusho icili conse pa fyakonkapo:
◼ “Bushe mulapepa ipepo lya We Shifwe?” (Mat. 6:9, 10) Lumbuleniko amashiwi yamo aya mwi pepo, e lyo mutile: “Bamo balepusha abati, ‘Bushe ishina lya kwa Lesa ilyo Yesu atile libelwe akatiina, lishina nshi?’ Bamo bepusha abati, ‘Bushe Ubufumu Yesu atile tulepepela e cinshi?’ Bushe mwalitala amusanga ifyasuko ifyamusekesha pa lwa ifi?”
◼ “Bushe mwalitala amulangulukapo ati: ‘Bushe ubumi bwaba na mifwaile nshi?’” Langilileni ukuti imifwaile ya bumi yalyampana no kwishiba Lesa.—Luk. Mil. 12:13; Yoh. 17:3.
◼ “Bushe mulatontonkanyapo ukuti imfwa ikatala aifumishiwapo?” Belengeni Esaya 25:8 na Ukusokolola 21:4 ku kupeela icasuko cacetekelwa.
◼ “Bushe kwaliba inshila yayanguka iya kupwishishamo icimfulumfulu ca pe sonde?” Londololeni ukuti Lesa asambilisha ati “uletemwo mubiyo.”—Mat. 22:39.
◼ “Bushe akayofi ka fya mu lwelele e kali no konaula isonde bushiku bumo?” Landeni pa fyo Baibolo yalaya ukuti isonde likekalilila umuyayaya.—Amalu. 104:5.
5 Shimikileni imbila nsuma mu nshila yayanguka, iyaololoka kabili iya cikuuku. Yehova akapaala ukubombesha kwenu ukwa kwebako bambi “icebo” ca cine.