Bushe Ukubishanya kwa Bwina Kristu Kwacindama Shani?
1 “Umuntu onse alakabila abantu banankwe.” Ayo mashiwi yalandilwe na kalemba wa nshintu uwa mu myaka ya ba 1800 yapalana na mashiwi ya mu Baibolo, ayalanda pa co umuntu akabila nga nshi, ne co cintu caba kubishanya na bantu banankwe. (Amapi. 18:1) Ukubishanya kwesu ukwa Bwina Kristu kulenga twibulisha ici cintu tukabila. Ni mwi tuipakisha ukubishanya?
2 Mu Butumikishi: Mumo umo tuipakisha sana ukubishanya na bamunyinefwe ni mu butumikishi bwa ku cintubwingi ilyo batukosha no kututungilila. Yesu atumine abasambi “babili babili” ku kushimikila. (Marko 6:7; Luka 10:1) Ukukonka filya fine Yesu acitile, ilyo tulebomba na banensu mu mulimo wa mwi bala, tulashininkisha ukuti amashiwi yaba pali Lukala Milandu 4:9, 10 ya cine. Ilyo tulebombela pamo ubutumikishi, icitetekelo, icumfwila, no kutemwa ifyo abanensu bakwata fitucincisha ukushipa no kutwalilila abapimpa.
3 Ukutwaafwa: Bamunyinefwe na kabili balatukoselesha no kutwebako ifya kucita pa kushipikisha amafya no kukaana amatunko. Abena Kristu banensu kuti batucinkulako pa malembo yalanda pa bwafya buletucusha. Kuti batupepelanako, nga filya fine na ifwe tubapepelako. (2 Kor. 1:11) Kabili ica kumwenako cabo icisuma cine cine na co cilatucincisha no kutukoselesha ku kubombe milimo isuma.
4 Ku Kulongana: Amapaalo ya kubishanya kwa Bwina Kristu yalabako lyonse ilyo tusangwa ku kulongana kwa pa cilonganino. (Heb. 10:24, 25) Kulaba amalyashi ayabamo amafundisho ayengi aya ku mupashi, kabili ukusangwa ku kulongana kutupalamika ku basumina banensu. Uku kulongana kulenga twaba ne shuko lya kukutika kuli bamunyinefwe ne nkashi ilyo balelanda ico batetekela, cibe ni pa cisebele nelyo ni mwi bumba. (Rom. 1:12) Ukutemwana kwesu kulakosa lintu tulanshanya ilyo ukulongana kushilatendeka na lintu kwapwa. Ukuba pa kulongana kulenga twaba na kashita ka kushimikila bambi ifya kukumanya fyesu ifya kukosha icitetekelo. Ubuntu bwesu bulawaminako ilyo tulebishanya bwino na batemwa Yehova, Icebo cakwe, umulimo wakwe na bantu bakwe.—Fil. 2:1, 2.
5 Tulakabila Abena Kristu banensu. Ukwabula bene, kuti cayafyako ukwenda mu nshila ya kamfyemfye iitwala ku mweo. Lelo, apo fye balitutemwa kabili balatukoselesha, kuti twatwalilila ukuya ku calo cipya ca kwa Yehova icalungama.—Mat. 7:14.