Twalilileni Ukubika Ubufumu Intanshi
1 Ukubika Ubufumu bwa kwa Lesa intanshi mu mikalile yesu no kutwalilila ukucite fyo fine kwalyafya nga tuli na mafya ya ndalama nelyo amafya yambi. Kuti twatwalilila shani ukubika Ubufumu intanshi ilyo twaba na mafya? Ni shani nga ca kutila batweba ukwingila incito iya kuti iletulenga ukupuswa ku kulongana nelyo ilepumfyanya umulimo wesu uwa mwi bala? Bushe ninshi Ubufumu bulingile ukwisa pa numa?
2 Icitetekelo Cakosa Cilakabilwa: Ilyo icitetekelo cesu cileeshiwa kuli aya mafya, tatufwile ukulaba ubulayo bwa kwa Yehova na Yesu ubwa kututungilila nga twafwaya Ubufumu intanshi. (Amalu. 37:25; Mat. 6:31-34) Ukusonga kwaba mu calo na mafya kuti fyatulenga ukukanamona bwino ifintu no kutucilikila ukutwalilila ukubika Ubufumu intanshi. Bamo basuminisha ukulumbuka pa ncito nelyo ukukwata indalama ukuba e fintu ifikalamba mu mikalile yabo. Lelo, nga Paulo, tulingile ukutontonkanya bwino sana pa co tufwile ukucindamika mu mikalile yesu.—Fil. 3:7, 8.
3 Bushe Ukwaluka Kulekabilwa? Kasabankanya atile: “Napoosele sana amano ku bukwebo bwandi—e cintu natemenwe sana. Naletontonkanya ukuti ukupoosa sana inshita yandi ku bukwebo takwingandesha ukuba Inte.” Lelo lyonse aleumfwa kutila kuti alundako ukubombela Yehova. Mu kuya kwa nshita, alekele ubukwebo bwakwe ubwalemucilikila ukulunduluka lwa ku mupashi. Lintu aipeele onse ku mulimo wa Bufumu, asosele fye no kuti: “Nomba ndeyumfwa ukuti Yehova alemona bwino imikalile yandi, ici e cifwaikwa sana.”
4 Ica kutasha ca kuti abengi balileka imilimo yabo iyo balebomba ne fintu baleenekela ukubaletela indalama ishingi, balyangusha imikalile yabo, kabili balitendeka umulimo wa nshita yonse. Ababomfi batumikila abacaice kabili abashimbe na baeluda abasangwa kwi Sukulu lya Kukansha Ilya Butumikishi e fyo bacita kabili baleipakisha amashuko yasuma aya mulimo. Ukupashanya ica kumwenako cisuma ica kwa Paulo, bateka imitima pa kuba ne fikabilwa fya ku mubili.—1 Kor. 11:1; 1 Tim. 6:6-8; Heb. 13:5.
5 Nangu line icalo kuti catupumya pa fyo tumona imikalile, twalikwata amapaalo ya kwa Yehova. (1 Kor. 1:26-31) Bushe tatukoseleshiwa ukwishiba ukuti akatubomfya ukulingana na po umwine alefwaila kabili akatwafwa ukufishapo umulimo wakwe? Ishuko tukwete pali ndakai ilya kubilisha Ubufumu bwaimikwa ubwa kwa Lesa talyakabwekeshiwepo. E co ino ine e nshita ya kutwalilila ukubika Ubufumu intanshi mu mikalile yesu.