Bushe E Cipindami Cilemulesha Ukushimikila?

¹ Abantu abengi baba abapamfiwa. Inte sha kwa Yehova na bo epo baba pa bantu bapamfiwa, balasambilila Icebo ca kwa Lesa, ukusangwa ku kulongana, no kubomba umulimo wa kushimikila. Na kabili tulaya ku ncito, tulabomba imilimo ya pa ng’anda ne ya ku sukulu, ne milimo imbi iingi, yonse ikabila inshita. Ubu bwafya ubwine bwine maka maka ku mitwe ya ndupwa.

² Pa mulandu wa kwafya kwa mikalile mu fyalo ifingi, abafyashi abengi bafwile ukubombesha no kucucutika pa maawala ayengi pa kuti fye basange umwa kuliila. Pa mulandu wa kuti incito shilabasendela inshita ikalamba no kubapoka amaka, bashala na maka ayanono ne nshita ifikabilwa ku mulimo wa kushimikila. Apo balikwata umulimo wa kupekanishisha ulupwa ifya ku mubili, bamo kuti batontonkanya ukuti tabafwile ukubombesha mu mulimo wa kushimikila. (1 Tim. 5:8) Kwena te kuti tukaane ukuti pali lelo cintu cayafya ukusanga ifikabilwa mu mikalile. Lelo incito umuntu abomba taifwile ukuba cipindami ca kumulesha ukushimikila imbila nsuma. (Marko 13:10) Kanshi kuti cawama ukubebeta imibombele yesu.

³ Apo muno calo lyonse kuleisa ifipya, umufyashi kuti alemenena ku kubombesha incito, pa kuti asungeko indalama sha kubomfya ilyo kwapona ica mankumanya. (1 Kor. 7:31) Nangu line ca cine ukuti ukubombesha ku ncito kuti kwalenga umo ukukwatako ifya ku mubili na fimbi nelyo ifintu na fimbi ifya kubomfya ku kwangalako no kukokoloka, bushe kuti fyalenga ulupwa ukulundako insansa nga ca kuti fyacitwa ilyo twalekelesha ifya ku mupashi no kulongana lyonse? Kuti twatemwa ukutaluka kuli conse icingalenga bumupashi bwesu ukuba mu bwafya. Ca mano ukumfwila ukufunda kwa kwa Yesu ukwa ‘kututile fyuma mu muulu’ no kuba ‘abacindama kuli Lesa.’—Mat. 6:19-21; Luka 12:15-21.

⁴ Fwayeni Ifya Bufumu Intanshi: Yesu asambilishe abakonshi bakwe ukucindika ifya ku mupashi ukucila icintu conse. Abacincishe ukuti: “Mwisakamikwa, amuti, Tulelya nshi? nalimo, Tulenwa nshi? nalimo, Tulefwala nshi?” Cinshi asosele fyo? Alondolwele ukuti: “Pantu Shinwe wa mu muulu aishiba ukuti mukabile fi fyonse.” Nga cine cine twalisumina aya mashiwi, takwakabe icipindami cingatulesha ukucita ico Yesu akonkeshepo ukulanda ukuti: “Lelo, mubale mufwaye ubufumu bwa kwa Lesa no bulungami bwakwe, ne fi fyonse [ifyo mukabila] fikalundwako kuli imwe.” Lesa akatupa ifyo tukabila! (Mat. 6:31-33) Ino mwandini te nshita ya kupusaulwa ku kucilamo ukusakamikwa pa fya mu mikalile nelyo ukufwaya ukwikala ubumi bwa kucibondola muli buno bwikashi buli mupepi no kuya.—1 Pet. 5:7; 1 Yoh. 2:15-17.

⁵ Umulandu ukalamba uo umuntu engilila incito waba kuipekanishisha ifyo akabila. Lelo fintu finga tukabila? Umutumwa Paulo alembele ukuti: “Pa kuba ne fya kulya ne fya kufwala, tuteke imitima kuli ifyo fine.” Bushe mulefwaya ukukwata ifyacila pali ifi? Nga e fyo, nalimo kuti mwaba mu bwafya ubo ico cingaleta ubo Paulo asokelepo muli aya mashiwi: “Abafwayo kuba ne fyuma bawila mu kweshiwa kabili mu lukose, kabili mu lunkumbwa ulwingi ulwa kutumpa kabili ulwa kucena, ifyo ifiibisha abantu mu kupomonwa kabili mu boni.” (1 Tim. 6:8, 9; Mat. 6:24; Luka 14:33) Kuti twaishiba shani nga ca kuti ukucilamo ukufwaya ifintu e cipindami ciletulesha ukucindamika ifya Bufumu?

⁶ Nga ca kuti pa mulandu wa ncito tubomba, tulafilwa ukubombesha mu mulimo wa mwi bala nelyo tulefilwa ukuipusula pa mulandu wa mbila nsuma, ninshi tufwile ukutontonkanyapo na kabili pa fyo twacindamika. (Heb. 13:15, 16) Ukwikala fye imikalile yayanguka kukatwafwa sana ukufumyapo ico cipindami ciletulesha ukushimikila. Ifya Bufumu lyonse fye e fifwile ukuba ifya kubalilapo pa kubomfya inshita yesu na maka.

⁷ Ukucucutika Ukushili kwa Fye: Amashiwi ya kwa Paulo yatukoselesha “ukupikintika pe mu mulimo wa kwa Shikulu, pa kwishibo kuti ukucucutika [kwesu] te kwa fye muli Shikulu.” (1 Kor. 15:58) ‘Umulimo wa kwa Shikulu’ uwacindama ukucila imilimo yonse waba wa kushimikila Ubufumu no kupanga abasambi. (Mat. 24:14; 28:19, 20) Pa kubombako uyu mulimo na maka yesu yonse, tufwile ukutantika inshita ya kuya mwi bala cila mulungu no kweshako ukukaanacita fimbi pali yo nshita. (Efes. 5:15-17) Nga twacite co, incito nelyo icintu cimbi tacabe cipindami ca kutulesha ukushimikila.

⁸ Nga twaipeelesha ku kushimikilako bambi icine ca muli Baibolo, tukakwata insansa sha cine cine ishaba mu kupeela. (Imilimo 20:35) Pa kubombesha umulimo wa kushimikila Ubufumu, kuti twatontonkanya pa nshita ya ku ntanshi no kucetekela, “pantu Lesa tali uushalungama; takalabe umulimo [wesu] no kutemwa uko [twalangile] kwi shina lyakwe.”—Heb. 6:10.