Bushe Muli Abapamfiwa Nga Nshi?
1 Paulo akoseleshe ukuti ‘tulepikintika pe mu mulimo wa kwa Shikulu.’ (1 Kor. 15:58) Tulacincishiwa ukusungilila imitantikile ya lyonse iye sambililo lya pa lwesu, ukubomba lyonse mu butumikishi, ukusangwa ku kulongana lyonse, no kusakamana imilimo ya cilonganino mu mukoosha. Ukusansha pali ico, tufwile ukwaafwa bambi abalekabila ukwaafwa kwesu. Mu kuba ne fyafulisha ifyo ifya kucita, inshita shimo kuti twayumfwa abanaka, ukutontonkanya ukuti tufwile ukufwaya inshila isha kucefeshamo umulimo wesu.
2 Kulabako imibele iicilenga ukuba ica mano kabili icabamo kupelulula ukucefyako imibombele imo nelyo ubwingi bwa fya kubomba. Abantu bamo bayumfwa ifyo balenekelwa ukucita icili conse ico bambi babepusha ukucita. Ukubulisha ukushikatala muli ici kuti kwalenga ukutitikisha no kukanshika ifyo mu kupelako fingaba ifya konaula.
3 Ba Uwashikatala: Ica kwaafwa cakatama caba mu kubomfya ukufunda kwa kwa Paulo ukwa ‘kushininkisha ifyacilamo.’ (Fil. 1:10) Ico cilepilibula fye ukuti twangwe ifintu ifyo mu cituntulu fyacindama kabili, nga inshita ne mibele fyasuminisha, e lyo twaangwa ifintu fimo ifishicindeme sana. Ukukakililwako kwa lupwa ukwabula ukutwishika kwaliba pali ifyo fintu fyakatama. Ifishingamo fya ncito ya ku calo fifwile ukubombwapo. Nangu cibe fyo, Yesu asambilishe ukuti ifyo tulekabila ukubomba mu kubalilapo fifwile ukushimpwa pa cishinte ca kuti twafwaya Ubufumu intanshi. Tufwile intanshi ukucita ifintu ifyo fikatusuminisha ukufikilisha ukuipeela kwesu kuli Yehova.—Mat. 5:3; 6:33.
4 Ilyo tuleibukisha ici, tukashininkisha ukuti ku kutantika kwesu ukwapamfiwa twafumyako ifintu fya pa lwesu ifili fyonse ifishilekabilwa, imibombele ya kukokoloka iyacishamo, no kukakililwako kushakatama ukwa kuli bambi. Ilyo tulepekanya imibombele yesu iya cila mulungu, tukashako inshita yalinga iye sambililo lya pa lwesu, iya kwakanamo kwalinga mu mulimo, ukusangwa ku kulongana, ne fintu ifili fyonse fimbi ifyo fyalundanishiwa mu kupalamisha no kupepa kwesu. Inshita yashalako kuti yaakanishiwa ku kubomfiwa ku fintu fimbi, ukushintilila pa fintu fisangwila ku kufika pa buyo bwesu bukalamba ubwa kuba Abena Kristu bashikatala ababika Ubufumu intanshi.
5 Nangu cibe fyo, nakalimo kuti twatwalilila ukuyumfwa ukuti icisendo cesu ciletutitikisha. Nga e fyo cili, tulekabila ukwankula ku bwite bwa kwa Yesu ubwa kuti: “Iseni kuli ine, bonse mwe bacucutika kabili abafinwa, na ine nalamupeelo kutusha.” (Mat. 11:28) Na kabili, shintilileni pali Yehova, ‘uutusendela [icisendo, NW] ubushiku no bushiku’ kabili uupeela amaka ku wapomponteka. Alaya ukuti takasuminishe uwalungama ukutelententa. (Ilu. 55:22; 68:19; Esa. 40:29) Kuti twaba abacetekela ukuti amapepo yesu yakasukwa, ukucilenga ukuba icayanguka kuli ifwe ukuba aba mukoosha mu mibombele yesu iyacincila iya teokrasi.
6 Ilintu twaliba abashininkisha ukuba abapamfiwa mu kukonkelela amabuseko yasuma aya Bufumu, kuti twaba abasekelela mu kwishiba ukuti ukucucutika kwesu te kwa fye muli Shikulu.—1 Kor. 15:58.