Ifya Kulubula Inshita

¹ Ukupikintika mu mulimo wa kwa Yehova kulatulenga ukuba abapamfiwa lyonse! (1 Kor. 15:58) Twalishiba ukukabila kwa kusambilila pa lwesu na pamo nga ulupwa, ukubelenga Baibolo cila bushiku, ukupekanishisha ukulongana kwa cilonganino no kusangwako, no kubombako lyonse mu butumikishi bwa mwi bala. Bakangalila balikwata ifishingamo fya bucemi, kabili balasakamana ne milimo imbi iya cilonganino. Bamo balikwata ifishingamo fya lupwa ifyafina nelyo ifishingamo fyalekanalekana fimbi kuli bambi. Pa kuti fyonse fibombwe bwino, onse alakabila ukuba uwashikatala kabili uwaiteyanya bwino pa lwakwe.

² Imikeni Ifya Kucita Intanshi: Ukutunguluka mu ‘kulubule nshita yesu’ kushintilila pa mucetekanya no bupingushi busuma. (Efes. 5:15, 16) Tulekabila ukwishiba ifyaba “ifyacilamo” no kufibika pa muulu wa mutande wesu uwa fya kutendekelapo ukucita. (Fil. 1:10) Abaupana babili balondolwele iŋanda yabo iya teokrasi muli iyi nshila: “Mu bumi bwesu tulesushamo icine . . . Icine tacaba lubali lwa bumi bwesu, caba e bumi bwesu. Icili conse ico tucita cishinguluka fye pali cene.” Ukubika ukupepa kwa kwa Yehova no mulimo wakwe intanshi mu bumi bwa umo kwalikatama.

³ Ishibeni Ifyonaula Inshita: Mu mulungu umo mwaba amaawala 168, kabili tukabila ukubomfya inshita tukwete mano mano. Pa kuti twingakwata inshita yakumanina iya milimo ya teokrasi, tulekabila ukwishiba ifyonaula inshita no kuficefyako. Ukufwailisha kumo kwasokolwele ukuti umuntu umukalamba mu United States mu cinkumbawile apoosa amaawala 30 cila mulungu ukutamba TV! Kuli bambi, inshita ikalamba ilonaika ku kubelenga ifitabo fya ku calo. Bamo nakalimo kuti basanga ifyo balapoosa inshita yacishamo ku milimo ya mu bwikashi, ifya kuleseshamo icitendwe, ukukokoloka, nelyo ku mibombele imo iya pa kompyuta. Nakalimo tulekabila ukubebeta imitantikile yesu iya cila bushiku ku kumona fintu twingabomfya inshita yesu mu kuwaminako. Ukubomfya amano kufwaya ukuti twalinga inshita intu tubomfya ku fintu fishakatama.

⁴ Lundululeni Imitantikile Isuma: Te mulandu na fintu imibele ya pa lwesu ingaba, umo umo uwa ifwe kuti alubula inshita ya kusupila ifya ku mupashi. Bamo balisanga ukuti ukutendeka mu kubangilila cila bushiku kulabaafwa ukupwishishisha ifyafulilako. Nga ca kuti tulabomfya inshita ikalamba ukwenda muli bamotoka ukuya ku ncito nelyo ukupembelela bambi, nakalimo kuti twabomfya inshita ya musango yo imo ku kubelenga Baibolo, ukupekanishisha ukulongana, nelyo ukukutika ku fyebo fyapayanishiwa na Sosaite pa makaseti. Indupwa shilamwenamo apakalamba pa kulubulako inshita yaimikwa iya kusambilila lyonse capamo. Nga ca kuti icilundwa ca lupwa cimo cimo cilesunga inshita pa kwisa kwi sambililo lya lupwa, umo umo alanonkelamo pa kushala ne nshita yakumanina.

⁵ Pa bushiku bumo bumo ubwapita, tulingile ukuba abaibukila mu kusakamanishisha ukuti “naipipe nshita iyashalako.” (1 Kor. 7:29) Ubumi bwesu bwashintilila pa fintu tubomfya inshita ya mutengo iisheleko. Tukapaalwa nga ca kuti twalubula inshita pa kuti twingabika amabuseko ya Bufumu intanshi.—Mat. 6:33.