Ukubomfya Bwino Inshita Yesu
1. Cinshi citulenga ukubomfya bwino inshita yesu?
1 Inshita yalicindama. Nga filya caba ku ndalama, inshita kuti yaonaulwa nelyo kuti yabomfiwa bwino. Bushe mulebomfya shani ici cintu cacindama? Pamo nga Bena Kristu, ukutemwa twatemwa Yehova, Yesu Kristu na bantu banensu kulingile ukutulenga ukubomfya bwino inshita, ‘ukulubula inshita.’—Efes. 5:16.
2. Bushe ifyo tubomfya inshita yesu fitulenga twapusana shani na bantu bambi?
2 Nga ca kuti Umwina Kristu abomfya bwino inshita imikalile yakwe ilapusana sana ne ikonka abatemwa buno bwikashi bukote. Yesu alishibe ukuti kuti twaonaula inshita ku kucishamo ukusakamikwa pa lwa mikalile. (Luka 12:16-21; 17:28, 30) Paulo asobele ukuti abantu ba mu nshiku sha kulekelesha bakaba “abatemwo kwangala.” (2 Tim. 3:4) Bushe cilamukosela ukukwata na programu musuma uwa kucita ifya ku mupashi? Bushe mutila kanshi nga mwalikwete inshita yafulilako iya kubomba ubutumikishi? Bushe kuti twabomfya shani inshita yesu bwino?—Amalu. 90:12; Fil. 1:9-11.
3. Fintu nshi twingacita pa kuti tuletangisha ifya ku mupashi?
3 Ifya ku Mupashi E fya Ntanshi: Yesu tacindamike sana ukulya, ukunwa nelyo ukwangala. Nangu ca kuti ali muntu uwaishibe imilimo, talengele ifya ku mubili nelyo ubukwebo bwa lupwa ukumupumfyanya. Lelo, abekelwe mu kucita ukufwaya kwa kwa Wishi. (Mat. 13:55; Luka 9:58; Yoh. 4:34) Kuli ifintu twingacita pa kuti tulebomfya bwino inshita. Cimo icingafwa kukwata programu uo twingakonka bwino. Nangu ca kuti muli programu wesu kuti mwaba ne nshita ya kutuusha, ifya ku mupashi fifwile e fyacindama. Muli iyi programu mufwile mwaba ne nshita ya kusangwa ku kulongana konse, iya kuya mu mulimo wa mwi bala ne nshita ya kucita isambililo lya pa lwesu ilya Baibolo pa kuti tuleendela pamo ne cine.
4. Mulandu nshi abafyashi balingile ukupoosela amano kuli programu wa lupwa lwabo?
4 Abafyashi balikwata no mulimo wa kwaafwa abana babo ukuba abacincila mu milimo ya ku mupashi. E co bali no kunonkelamo mu kukwata programu bengakumanisha ukukonka uwa milimo ya Bufumu iya lupwa lonse. Ukucite fyo kulanga ukuti balasakamana abana babo ne fyo babomfya bwino inshita.—Amala. 6:6-9; Efes. 6:4.
5, 6. Bushe ukukwata ubuyo bwa pa lwesu mu butumikishi kuli no kutwafwa shani ukubomfya bwino inshita?
5 Ukupoosa Amano ku Cipimo ca Maawala ne Misambilishishe: Cisuma ukuba no buyo bwa pa lwesu mu mulimo wa butumikishi. Kuti twasala ukuipimina icipimo ca maawala ya kubomba mu mulimo wa mwi bala cila mweshi. Abengi balisanga ukuti bupainiya bwa kwafwilisha nelyo ubwa nshita yonse buyo busuma. Nga ca kuti pali ino nshita te kuti mulundeko amaawala ya kushimikila, bushe kuti mwawamyako umulimo wenu? Bushe kuti mwabomfya shani bwino inshita ilyo muli mu butumikishi?
6 Bushe kuti mwawamyako imisambilishishe yenu pa kubomfya inshila shalekanalekana isha kutendekelamo ukulanshanya ilyo muleshimikila? (km January 2002 ibu. 3) Bushe kuti mwawamyako mu kutungulula amasambililo ya Baibolo nelyo ukuwamyako inshila mutungulwilamo abantu ku Cebo ca kwa Yehova no kuteyanya kwakwe? (km June 1996 Ica mu kati, amapara. 14-16) Mu kucite fyo kuti mulebomfya bwino inshita yenu mu mulimo.
7. Bushe kuti twalubulako shani inshita ya kucita ifya ku mupashi, kabili tunonkelamo shani mu kucite co?
7 Nga ca kuti kuli umo mulekabila ukuteuluka citenipo cimo bwangu. Bushe kuti mwalubulako amaminiti 30 cila bushiku ukufuma ku milimo imbi? Iyo e nshita mwingakabila ukubelenga Baibolo onse mu mwaka umo. Ico kuti camunonsha nga nshi lwa ku mupashi! (Amalu. 19:7-11; 119:97-100) Ibukisheni ukutantike nshita ya kubelenga Baibolo, ukupekanya ukulongana, no kuya mu butumikishi bwa mwi bala. (1 Kor. 15:58) Ukubomfya bwino inshita kuli no kumwafwa ‘ukulakutuluka icabo kufwaya kwa kwa Yehova.’—Efes. 5:17.