Bomfyeni Inshita Yenu Mano Mano
1 Ukufwaisha ukutemuna Yehova, e kulenga tulebika sana amano ku fifwaikwa mu kupepa kwesu. Icebo cakwe citufunda ‘ukufwaya intanshi ubufumu’ no ‘kushininkisha ifyacilapo ukucindama.’ (Mat. 6:33; Fil. 1:10) Kuti twalubula shani inshita pa kuti tuibomfye ku fya Bufumu no kukanapoosa inshita ikalamba ku fintu ifishacindama?—Efes. 5:15-17.
2 Bikeni Imilimo ya Bufumu Intanshi: Ishibeni bwino ifya kucita pa kuti inshita yenu taipwilile ku fintu ifishacindama. Ilyo umweshi uuli onse watendeka, bamo balashilila libela pali kalenda wabo inshiku bakafumina mu mulimo wa mwi bala. Nga bacite fyo balabikako amano pa kuti kwiba icili conse ica kupumfyanya ifyo bapekenye. Na pa kulubula inshita ya kusangwa mu kulongana, iya kukwata isambililo lya pa lwesu, ne ya kusangwa ku kulongana kwa citungu, kuti twacita cimo cine. Abengi balipekanya ukulabelenga Baibolo pa kutendeka nelyo pa mpela ya bushiku bumo na bumo. Pekanyeni inshita yalinga iya kucita ifintu ifyacindama, kabili mwileka ifintu fimbi ifishilingile fipumfyanye ifyo mupekenye.—Luk. Mil. 3:1; 1 Kor. 14:40.
3 Mwilabomfya Sana Icalo: Mu fyalo fimo, ifyangalo, ifya kusekesha, ifya kuleseshako icitendwe ne fintu fimbi fyalifula. Abengi balapoosa inshita ikalamba mu kutamba TV nelyo ukubomfya kompyuta. Lelo, ukupoosa inshita iikalamba ku mangalo na ku kubomfya ifibombelo fimbi ifya muno nshiku ifyo icalo cileteleko, kukatusha mu bulanda. (1 Yoh 2:15-17) E co Amalembo yatukonkomesesha ukukanabomfya sana icalo. (1 Kor. 7:31) Nga mwaumfwila uko kufunda kwa mano, kuti mwalangisha Yehova ukuti ukumupepa e kwisa intanshi mu bumi bwenu.—Mat. 6:19-21.
4 Inshita isheleko iya ubu bwikashi naicepa sana. Ababika ifya Bufumu intanshi, bakaba aba nsansa kabili bakasenaminwa na Lesa. (Amapi. 8:32-35; Yako. 1:25) E ico kanshi, natubomfye bwino inshita yesu iyacindama.