Lingeni Ukwangala
1 Muli shino nshiku shayafya, bonse mu nshita mu nshita tukabila ukucitako ifintu fyalekanalekana. Ukwangala kwalinga kusuma. Lelo, ukupoosa sana inshita ku kwangala, ukutuusha, no kwangalila pamo ne fibusa kuti kwasendela sana umuntu inshita ya kubomba ifya ku mupashi. Tufwile ukulinga ukwangala. (Mat. 5:3) Kuti twalinga shani? Nga twakonka ukupanda amano kwa pa Abena Efese 5:15-17.
2 Ishibeni Umwa Kupelela: Paulo alembele ukuti Abena Kristu bafwile ‘ukucenjela’ ku fyo baleikala mu mikalile yabo. Ukulinga no kuilama filakabilwa pa kuti inshita ya kwangala yaba fye iyalinga. Cisuma ukutontonkanyapo sana pa fyo tubomfya inshita yesu iya kutuusha. Ukwangala kufwile kwatuletela ubusuma, takufwile ukutulenga twatontonkanya ukuti twaonaula fye nshita nelyo ukutusha abanaka. Nga ca kuti pa numa ya kwangala twamona ukuti tupoosele fye nshita, nga tuleumfwa kwati natucita umulandu, kuti calanga ukuti tufwile ukwalula ifyo tubomfya inshita yesu.
3 Beni Abashilimuka: Paulo afundile pa ‘kubomfye nshita’ ku kucita ifyacindama mu mikalile, te kuba “abashashilimuka.” Abena Kristu baipeela te kuti baleke imikalile yabo yaba ya kwangala fye. Nangu line ukutuusha no kwangala kuti fyatubwesesha amaka yesu, ukukosa lwa ku mupashi kufuma ku maka yabomba aya kwa Lesa. (Esa. 40:29-31) Tupokelela umupashi wakwe ilyo tulebomba imilimo ya teokrasi, ifili nga ukusambilila Baibolo, ukusangwa ku kulongana kwa pa cilonganino no kubombako umulimo wa mwi bala, tatupokelela umupashi ilyo tuleyangala.
4 Ishibeni Ifyacindama: Paulo aebele Abena Kristu ukuba “abeluka icabo kufwaya kwa kwa Shikulu.” Yesu afundile ukuti tufwile ukubika Ubufumu bwa kwa Lesa intanshi pali fyonse ifyo tucita mu mikalile yesu. (Mat. 6:33) Ca mano ukuti twacita intanshi ifintu ifingalenga twaikalila umwabela ukuipeela kwesu kuli Yehova. Lyene kuti twayangalako inshita yalinga. Nga twacite co, ukwangala kukatuletela ubusuma kabili tukaipakisha nga nshi.—Luk. Mil. 5:12.