Ni Shani Fintu Indupwa Shingakosa lwa ku Mupashi?
1 Tuletasha indupwa sha Bwina Kristu pa “kucita aba ng’anda yabo iine umwabela bukapepa.” (1 Tim. 5:4) Nalyo line, apo twashingulukwa no kusonga kwabipa ukwingi ukwinganasha icitetekelo cesu, calicindama ukuti indupwa shabombesha pa kutwalilila ishakosa lwa ku mupashi. Ni shani bengacita ifyo?
2 Pashanyeni Bumutwe bwa kwa Kristu: Imitwe ya ndupwa ilingile ukupashanya Yesu Kristu mu fyo babomba imilimo yabo ku kukosha indupwa shabo. Yesu atulangile ukutemwa kwakwe pa kufwa imfwa ya bulilambo, kabili alitwalilila ‘ukulela no kuteesa’ icilonganino. (Efes. 5:25-29) Abafyashi ba kutemwa bakonka ici ca kumwenako pa kusunga bwino no kusakamana indupwa shabo ku fyo shikabila lwa ku mupashi cila bushiku. Ukucita ifyo kusanshamo ukutungulula isambililo lya Baibolo ilya lupwa cila mulungu, ukulanshanya kusuma ukwa fintu fya ku mupashi ilyo mwasangako inshita, no kubombela pa mafya nga yaisa.—Amala. 6:6, 7.
3 Mu Mulimo wa mwi Bala: Bonse aba mu lupwa bafwile ukumfwikisha ukuti ukushimikila bambi pa lwa kwa Yehova no bufwayo bwakwe lubali lwacindama ulwa kupepa. (Esa. 43:10-12) Nga ca kutila mwe bafyashi mulefwaya abana benu ukuba Inte sha kwa Yehova aba busumino, mulingile ukutendeka ilyo bacili abanono ukuteyanya imitima yabo ku kubomba ubutumikishi. Lanshanyeni ubucindami bwa kuipelesha no kushimikila cila mulungu. (Mat. 22:37-39) Lyene teyanyeni ukulabomba na bo lyonse umulimo wa mwi bala.
4 Na kabili afwilisheni ulupwa ukumfwikisha ubucindami bwa mulimo wa kushimikila pa kushako inshita ya kupekanya no kupituluka mu fya kulanda ilyo mulesambilila isambililo lya lupwa cila mulungu. Kansheni umwana umo umo mu butumikishi, afweni abana bonse ukulunduluka ukulingana ne mishinku yabo na maka bakwete. Pa numa ya kubomba na bo mu butumikishi, lanshanyeni ifyo baimwenene ubusuma bwa kwa Yehova. Shimikeni ifya kukumanya fya kukosha icitetekelo. Ilyo aba mu lupwa ‘basonda sana ukuti Kristu musuma,’ e lyo bapalamina sana kuli Yehova, no kubakosha ukukaana “ububi bonse.”—1 Pet. 2:1-3.
5 Ku Kulongana: Ifyo ciwama nga ca kuti aba mu lupwa balekoseleshanya ukusangwa ku kulongana kwa cilonganino, maka maka nga ca kuti umo nanaka, nafupuulwa, nelyo napomponteka! Nkashi wacaice umo atile, “batata nga babwela ku ncito, balanaka. Lelo ndabeba icishinka cimo icalalandwapo ku kulongana icungulo, kabili balakoseleshiwa ukuya. Kabili nga nine nakile, balankoselesha ukuya.”—Heb. 10:24, 25.
6 Ukucitila Ifintu Pamo: Indupwa shilingile ukucitila ifintu capamo, pamo nga ukwaafwana imilimo ya pa ng’anda. Mufwile ukushako ne nshita ya kwangala ubwangalo busuma. Ukusenda utwa kulya no kuyalila ku ncende imbi, ukololako amolu, ukwangalako amangalo, no kutandalila balupwa nelyo ifibusa kuti fyamuletela insansa kabili mukalasansamuka nga mwaibukisha.—Luk. Mil. 3:4.
7 Indupwa shakosa isha Bwina Kristu shilacimfya ificilikila bumupashi cila bushiku. Ukupalama sana lyonse kuli Yehova, kubalenga ukupokelela ubukose ubo apeela.—Efes. 6:10.