‘Beni Abashipa’
1 Ilyo Yesu atumine abasambi bakwe aba kubalilapo, abebele ati: “Moneni! ndemutuma nge mpaanga mu kati ka mimbulu.” (Mat. 10:16) Bushe ico calengele batiine no kushimba? Iyo. Bakwete imibele iyo ku ntanshi umutumwa Paulo alandilepo ilyo aebele Abena Kristu banankwe ati: ‘Beni abashipa no kusosa amuti: “Yehova e kaafwa wandi; nshakatiine. Ngo muntu engancita nshi?”’ (Heb. 13:6) Balisekelele pa kulingwa abawamino kusaalwilwa pe shina lya kwa Yesu, kabili batwalilile ukusambilisha no kubila imbila nsuma ukwabula ukuleka.—Imil. 5:41, 42.
2 Ilelo umulimo wa mwi sonde lyonse uwa kushimikila uli ku nsondwelelo. Nga fintu fye Yesu asobele, twaba abapatwa ku nko shonse. (Mat. 24:9) Abantu balikaanya umulimo wesu uwa kushimikila no ku-upumya, kabili mumo mumo, baliubinda no ku-ubinda. Akubula ukuba ne citetekelo, nga twalitiina. Lelo, ukwishiba ukuti Yehova ni Kaafwa wesu kulatupembesula no kutukosha ukuti tushipikishe.
3 Ukushipa e kukosa, ukupama, ukupambana. Kwapusana no mwenso na bukuuwe. Abasambi ba kwa Yesu lyonse bakabila ukushipa pa kuti bashipikishe. Cilafwaikwa ukukanaleka imibele ne micitile ya ba pano calo ababa balwani ba kwa Lesa ukulenga imitima yesu ukusunguluka. Fintu citukoselesha nga tuletontonkanya pa ca kumwenako capulamo ica kwa Yesu, uwacimfishe aba pano calo! (Yoh. 16:33) Ibukisheni na batumwa abo ilyo bali mu fya kwesha fyatapata mu kushipa babilishe ati: “Tufwile ukunakila Lesa nga kateeka ukucila ukunakila abantu.”—Imil. 5:29.
4 Tatuli Abakwinda: Tulingile ukwesha ukuba ne mibele isuma ukukuma ku mulimo wesu. (Heb. 10:39) Lyonse muleibukisha ukuti ni Yehova e watutuma kabili iyi ni nshila alangilamo ukutemwa kwakwe ne nkumbu ku bantunse bonse. Tatuma ababomfi bakwe ukucita icili conse icishikwete bufwayo bwine bwine. Fyonse ifyo twatumwa ukucita kwi pele pele fikalenga cikawamine bonse abatemwa Lesa.—Rom. 8:28.
5 Ukwenekela ifisuma kukalenga tutwalilile ukufwaya abapale mpaanga mu cifulo tushimikilamo. Napamo kuti twamona imisuula ya bantu ukuti e mulefumina ukufulunganishiwa kwabo no kubulwe subilo. Lekeni ukutemwa kwesu kutulenge ukubalangulukilako no kubatekanishisha. Lyonse ilyo twashalika ulupapulo nelyo ukumona umo alesekelela nangu fye panono, ubuyo bwesu bulingile bwaba bwa kubwelelako bwangu bwangu no kulundulula uko kusekelela. Tatufwile ukutwishika ulwa maka yesu aya kutampa isambililo lya Baibolo nelyo aya kulitungulula bwino bwino. Lelo, tulingile ukulomba ukwafwa kwa kwa Yehova no butungulushi lyonse kabili mu kubamo ipepo, ukushininkisha ukuti akatwafwa.
6 Twalitetekela sana ukuti Yehova akatungilila uyu mulimo ukufika ku mpela. (Linganyeniko Abena Filipi 1:6.) Ukutetekela wene umupwilapo pamo nga Kaafwa wesu kulatukosha, ica kuti “[tatunenuka] mu kucite cawama.”—Gal. 6:9.