Ukuseekeshiwa Imbila Nsuma
1 Mwandini twalicindamikwa pa kuseekeshiwa imbila nsuma ya kwa Lesa! (1 Tes. 2:4) Nangula bamo kuti bakaana ubu bukombe bwa maka, aba mitima yafumaluka balakulilwa kuli ubu bukombe nga ku cena cisuma. (2 Kor. 2:14-16) Ku bapokelela no kuumfwila imbila nsuma, ibatwala kwi pusukilo. (Rom. 1:16) Bushe tufwile ukusakamana shani ici caseekeshiwa kuli ifwe?
2 Yesu na Batumwa: Yesu abikile umulimo wa kubilisha imbila nsuma pa ntanshi. (Luka 4:18, 43) Na lintu anakile kabili aali ne nsala, ukutemwa atemenwe abantu ne fyo acindike ubu bukombe fyamulengele ukwebako bambi. (Marko 6:30-34) Mu fyo alesosa no kucita, alengele abasambi bakwe ukumona ubucindami bwa mulimo wa kushimikila Ubufumu.—Mat. 28:18-20; Marko 13:10.
3 Abatumwa bapashenye Yesu no kubilisha ubukombe bwa Bufumu mu kupimpa. Na lintu bapuminwe no kuleshiwa ukushimikila, “batwalilile ukwabulo kuleka ukusambilisha no kubila imbila nsuma.” (Imil. 5:40-42) Umutumwa Paulo abombele uyu mulimo ukwabula ukunaka. (1 Kor. 15:9, 10; Kol. 1:29) Alingenye ishuko lya kushimikila imbila nsuma ku misha akwatile abantu banankwe, kabili ali-itemenwe ukuipusula ifya bwanalale pa kuti abombe uyu mulimo.—Imil. 20:24; Rom. 1:14-16.
4 Ishuko Lyesu Ilelo: Ukutasha pa mulimo washila twaseekeshiwa kukatulenga ukufwaya inshila sha kubombesha mu mulimo wa kushimikila. (Rom. 15:16) BaEdward, bale-endela pa ncinga ya balemana, baleikala pa mwinshi we hotela no kulanda na baleikala mu hotela ulwa fisumino fyabo. Lelo, pa kufwaya ukubomba ifyafulilako, bakuulishe kacipinda ku cipampamu ca motoka wabo, kabili babomfeshe uyu motoka ku kubomba bupainiya pa myaka iingi, baleenda bakilomita abengi ilyo baleshimikila. Nga fintu baEdward bacitile, abengi ilelo baliteulula imikalile yabo pa kuti babombeko sana umulimo wa kusalanganya imbila nsuma.
5 Na ifwe ilelo, natupashanye Yesu na batumwa no kutangishako lyonse umulimo wa kushimikila mu mikalile yesu. Nga tulecite fyo, tulanga ifyo twatemwa abantu ne fyo tutasha pa mbila nsuma yaseekeshiwa kuli ifwe.