Bushe Cinshi Mwacindamika Sana?
1 Utubungwe twa mipepele utwingi twacindamika ukucita imilimo ya kwafwa abantu, pamo ngo kukuula amasukulu nelyo ifipatala. Nangu ca kuti Inte sha kwa Yehova tabasuulako ku “kucita icisuma no kupeelana ifintu,” bacindamika ukwafwilisha abantu mu fya ku mupashi.—Heb. 13:16.
2 Ifyo Cali mu Myaka ya Kutendeka kwa BuKristu: Ilyo Yesu aali pe sonde abombele imilimo iingi mu butumikishi bwakwe, lelo umulimo wacindamishe wa kushimike icine ubunte. (Luka 4:43; Yoh. 18:37; Imil. 10:38) Aebele abakonshi bakwe ‘ukuya, ukulenga aba nko shonse ukuba abasambi, ukubasambilisha.’ (Mat. 28:19, 20) Alangilile no kuti bonse abamutetekele baali no kubombako uyu mulimo ukucila na pa fyo Yesu acitile ilyo autampile. (Yoh. 14:12) Yesu acindamike umulimo wa kushimikila pantu ulaafwa abantu ukusanga inshila ya kwi pusukilo.—Yoh. 17:3.
3 Umutumwa Paulo amwene ukushimikila ngo “mulimo [alingile] ukubomba,” ngo mulimo ashali na kusengauka. (1 Kor. 9:16, 17) Ali-itemenwe ukuipusula mu fili fyonse, ukushipikisha ubwesho ubuli bonse, no kubulwa pa kuti fye afishepo ubutumikishi bwakwe. (Imil. 20:22-24) Umutumwa Petro na banankwe balangile imibele yapalako. Nelyo cingati kwali ukubikwa mu cifungo no kufopaulwa, “batwalilile ukwabulo kuleka ukusambilisha no kubila imbila nsuma pali Kristu, Yesu.”—Imil. 5:40-42.
4 Nga ifwe? Bushe twalicindamika umulimo wa kubilisha imbila nsuma ya Bufumu no kupanga basambi? Bushe twalyangwako icine cine ku bantu “balulunkaniwa kabili abapaswa nge mpaanga ishabula kacema,” pamo nge fya-angilweko Yesu? (Mat. 9:36) Ifilecitika mu calo ilelo no busesemo bwa mu Baibolo filelanga fye apabuuta ukuti ububifi bwalaswa bupwe! Ukwibukisha bwino ubucindami bwa mulimo wa kushimikila kukatulenga ukutwalilila ukushimikila mu kupimpa.
5 Bebeteni Imikalile Yenu: Apo imikalile ilingi line ilaaluka, cisuma ukulangulukapo mu nshita mu nshita nga kuti twaiteulula pa kuti tubombeshe mu mulimo wa kushimikila. Nkashi umo uwali ni painiya muli ba1950, ba1960, na muli ba1970 apatikishiwe kuleka pa mulandu wa kulwalilila. Lelo, mu kuya kwa nshiku alilekele ukulwalilila. Nomba line fye, uyu nkashi alilangulwike pa mikalile yakwe kabili amwene ukuti kuti atampa bupainiya na kabili. Ala aali ne nsansa nga nshi pa kusangwa kwi Sukulu lya Mulimo wa Bupainiya pa mushinku wa myaka 90! Nga imwe? Bushe muli mupepi no kupoka penshoni nelyo ukupwisha isukulu? Bushe ukwaluka kwa mibele kuti kwamusuminisha ukucitako bupainiya?
6 Ilyo Yesu amwene Marita “[aletabataba] ku kubomba imilimo iingi,” atubulwile cikuuku cikuuku ifyo kuti anonkelamo sana nga aangwisheko ifintu. (Luka 10:40-42) Bushe na imwe kuti mwa-angushako imikalile yenu? Bushe pali ukukabila kwine kwine ukwa umulume no mukashi ukulabomba incito? Nga paba ukuiteulula, bushe ulupwa kuti lwaikala fye bwino nga uulebomba umo fye? Abengi bali-inonsha lwa ku mupashi ilyo bateulwileko fimo pa kuti babombeshe mu butumikishi.
7 Shi ifwe bonse natukonke ica kumwenako ico Yesu na batumwa batushilile! Yehova akapaala ukweshaesha kwesu ukwafumaluka ukwa kufwaya kubombesha mu mulimo wacindamisha uwa kushimikila imbila nsuma iya Bufumu.—Luka 9:57-62.