Ubutumikishi bwa Bwina Kristu E Mulimo Wesu Uukalamba

¹ Ifwe bonse twalikwata imilimo yalekanalekana iyo tufwile ukubomba. Lesa afwaya umuntu alepekanishisha aba mu ng’anda yakwe. (1 Tim. 5:8) Lelo, umulimo waba mu kupekanishisha aba mu ng’anda ya umo taufwile ukucindama ukucila uwa kushimikila Ubufumu no kupanga abasambi.—Mat. 24:14; 28:19, 20.

² Yesu atupeele icipasho ca kukonka pa ‘kufwaya intanshi ubufumu.’ (Mat. 6:33; 1 Pet. 2:21) Nangula takwete ifya ku mubili ifingi, aobelwe fye no kucita ukufwaya kwa kwa Wishi. (Luka 4:43; 9:58; Yoh. 4:34) Alepikintika ukushimikila pa nshita yonse. (Luka 23:43; 1 Tim. 6:13) Acincishe abasambi bakwe ukoobelwa mu nshila imo ine mu mulimo wa kulobolola.—Mat. 9:37, 38.

³ Ukupashanya Yesu Lelo: Kuti twapashanya ifyo Yesu acitile nga tuletukuta ukwikala imikalile ya-anguka iitungululwa no butumikishi bwa Bwina Kristu. Nga natukwata ifyo tukabila mu mikalile, natuleumfwila ukufunda kwa mu Baibolo ukwa kukanaitutilila ifyuma fya cino calo. (Mat. 6:19, 20; 1 Tim. 6:8) Ifyo cingawamapo ukufwaya ukulundako imibombele yesu mu mulimo wa kushimikila! Nga twaponenwa ne fyayansha, natupilikite nga fintu Yesu acitile, ukukanaleka amasakamika ya mikalile ukufimbilikisha umulimo wesu uukalamba uwa kubilisha imbila nsuma ya Bufumu.—Luka 8:14; 9:59-62.

⁴ Nangu ni balya bakwata imilimo iingi bacindamika sana umulimo wa kushimikila. Munyina umo uwakwata ulupwa lukalamba abomba incito ikabila inshita ikalamba, kabili ni eluda mu cilonganino ca Bwina Kristu atila: “Ine ubutumikishi e mulimo wandi uukalamba.” Nkashi painiya atila: “Bupainiya bwalicila nga nshi pa mulimo usuma uwa ku calo.”

⁵ Te mulandu ne mibele twabamo, natukonke ica kumwenako ca kwa Yesu. Kuti twacita shani ifyo? Pa kulenga ubutumikishi bwa Bwina Kristu ukuba e mulimo wesu uukalamba.