Ico Tulingile Ukubika pa Ntanshi
1. Bushe Yesu alangile shani ukuti umulimo wa kushimikila e wacindamishe kuli ena?
1 Yesu abikile umulimo wa kushimikila pa ntanshi ya fyonse. Alebombesha, ukwenda amakilomita ayengi mu Palestine ukulashimikila abantu abengi. Alicefesheko ifya kucita pa kuti alekwata inshita iikulu iya kushimikila. (Mat. 8:20) Ilyo abantu abaali ibumba likalamba baeseshe ukumwikalika pa kuti aposhe abalwele babo, atile: “Na mu misumba imbi ndi no kubila imbila nsuma iya bufumu bwa kwa Lesa, pantu e co natumiinwe.”—Luka 4:43.
2. Cinshi Yesu acindamikile sana umulimo wa kushimikila?
2 Cinshi Yesu acindamikile sana umulimo wa kushimikila? Icalengele sana ca kuti alefwaya ishina lya kwa Yehova ukuba ilya mushilo. (Mat. 6:9) Alitemenwe sana Wishi wa ku muulu kabili alefwaisha ukucita ubufwayo bwakwe no kumfwila amafunde yakwe yonse. (Yoh. 14:31) E lyo alesakamana bwino sana abantu kabili alefwaya ukubafwilisha.—Mat. 9:36, 37.
3. Finshi twingacita pa kulanga ukuti umulimo wa kushimikila e o twabikako sana amano?
3 Pashanyeni Yesu: Ukubika umulimo wa kushimikila pa ntanshi ya fyonse tucita nga filya Yesu acitile, kulaafya pantu mu calo mwaba ifya kucita ifingi ifitupwishisha sana inshita kabili ifitupumbula. (Mat. 24:37-39; Luka 21:34) Kanshi tufwile ukwishiba bwino bwino ifyacilapo ukucindama, ukutantika inshita ya kupekanya ifyebo ifya kushimikila abantu e lyo no kulaya mu kushimikila lyonse. (Fil. 1:10) Tulabombesha ukucefyako ifya kucita no kukanabomfya sana icalo.—1 Kor. 7:31.
4. Mulandu nshi ino nshita cicindamine ukuti tulebika umulimo wa kushimikila pa ntanshi?
4 Umuntu wa mano abalilapo ukubomba umulimo wacindama intanshi, nga amona ukutila inshita naicepa. Ku ca kumwenako, nga aishiba ukuti icimwela cikalamba calaisa, abika amano na maka ku kupekanya umwa kupusukila ulupwa lwakwe kabili alebako na bena mupalamano bakwe pa busanso. Ifintu fimbi ifishacindama sana kuti aisaficita inshita imbi. Inshita isheleko pa kuti inkondo ya Armagedone ifike naicepa nga nshi. (Sefa. 1:14-16; 1 Kor. 7:29) Nomba pa kuti tuipusushe fwe bene no kupusushako na balya tushimikila, tufwile ukulaisakamana fwe bene no kulabika amano ku fyo tulesambilisha aba mu cilonganino e lyo na bantu bambi. (1 Tim. 4:16) Cine cine, pa kuti tukapusuke tulekabila ukubika umulimo wa kushimikila pa ntanshi ya fyonse!