Pashanyeni Kristu mu Mulimo Wenu
1 Yesu atushilile icilangililo ico ifwe tulingile ukukonka ilyo tulebomba umulimo wesu uwa kubila. Alangile ukuti alitemwa Lesa na bantu pa miku iingi kabili mu nshila ishingi. Asambilishe abafuuka icine kabili alebombela abalecula imilimo isuma pantu alibatemenwe.—Mat. 9:35.
2 Icilangililo ico Yesu Atushilile E lyo ne fyo Alesambilisha: Yesu talekele umulimo wakwe no kutendeka ukuipoosa mu mapolitiki nelyo ukulawamya fye ubumi ne mikalile ya bantu. Kabili talekele nangu fimo ifyalemoneka ukuti fisuma ukumupumbula nelyo ukulaba umulimo wakwe uukalamba. (Luka 8:1) Abikile amano ku kubila imbila nsuma ya kuti Ubufumu bwa kwa Lesa e bukapwisha amafya ya bantunse epela. Yesu alikwete umulimo uukalamba uwa kubomba lelo inshita yena yali inono. Ilyo abantu baleikala mu Kapernahumu balefwaya ukutila Yesu eya, aebele abasambi bakwe ukuti: “Tuleyeni kumbi . . . pa kuti nshimikile na ko kwine, pantu e co mfumiine.”—Marko 1:38.
3 Ilyo Yesu apwile ukusambilisha abasambi, aya e mashiwi abebele ukulabila: “Muleshimikila amuti, ‘Ubufumu bwa mu muulu nabupalama.’” (Mat. 10:7) Afundile abakonshi bakwe ukutila imilimo ya Bufumu e yo balingile ukubalilapo ukubomba. (Mat. 6:33) Amashiwi Yesu alandile ilyo alelaya abasambi bakwe ilyo talanina ukuya ku muulu yalilondolwele bwino ico baali no kucita. Atile: “E ico kabiyeni, kalengeni aba nko shonse ukuba abasambi.”—Mat. 28:19.
4 Ico Ubufumu Bwacindamina: Icikalamba ico Yesu alelandapo Bufumu bwa kwa Lesa, kabili acincishe abasambi bakwe ukulamupashanya. Abantu nangu bengesha shani ukupwisha amafya ya bantunse te kuti batunguluke. (Yer. 10:23) Bufumu bwa kwa Lesa epela e bukacindika ishina lya kwa Lesa no kulubula bantu ku kucula. (Mat. 6:9, 10) Ukusambilisha abantu icine ca Bufumu “abateta no kulila pa fya muselu fyonse ifilecitwa,” kulabafwa ukuba ne nsansa, balekala bwino pali ino nshita no kucetekela isubilo lya cine ilya ku ntanshi.—Esek. 9:4.
5 Yesu taleka ukwafwilisha umulimo wa kubila imbila nsuma ya Bufumu bwa kwa Lesa, kabili alitulaya ukuti akalatwafwa. (Mat. 28:20) Bushe umulimo wesu ni pi wafika nga twaulinganya kuli ulya Yesu atushilile? (1 Pet. 2:21) Muli shino nshiku shayafya, shi natubombeshe ukulingana na pengapela amaka yesu ukulakonka icilangililo Yesu atushilile!